Uzou Avọ 32

Eme U Fo Eruo Evaọ Ẹdijala?

ẸDIJALA ọfa Jesu o te weze kpohọ uwou-egagọ jọ nọ o kẹle Abade Galili. Ọzae jọ nọ obọ riẹ o ko ọ jọ etẹe. Ikere-ebe gbe otu Farisi na a fiẹro h’otọ sọ Jesu o ti siwi ei. Uwhremu na a tẹ nọ nọ: “Ufore a siwi ẹdẹ ẹdijala?”

Isu egagọ ahwo Ju a rọwo inọ esiwo u kiehọ ọvo evaọ Ẹdijala otẹrọnọ uzuazọ o rọ awa. Wọhọ oriruo, a wuhrẹ nọ u fo ho evaọ Ẹdijala re a wọ onwa họ hayo re a fare omola. Fikiere ikere-ebe gbe otu Farisi na a be nọ Jesu evaọ omodawọ re a jọ oma riẹ ruẹ afuẹwẹ jọ.

Rekọ Jesu ọ riẹ iroro rai. Evaọ okiọvo na, o vuhumu nọ eriwo rai kpahe oware nọ u re zue uzi ẹdẹ Ẹdijala na o thọ gaga, o tẹ jẹ wọso Ikereakere na. Fikiere Jesu ọ tẹ ruẹrẹ afe na họ kẹ avro ologbo nọ ọ ta kẹ ọzae nọ obọ riẹ o ko na nọ: “Nyaze etenẹ.”

Whaọ, nọ ọ rẹriẹ ova ku ikere-ebe gbe otu Farisi na, Jesu ọ tẹ ta nọ: ‘Whai ọ vẹ o re wo ogodẹ ọvo nọ o kie fihọ ọgọdọ ẹdẹ ẹdijala, nọ o gbe si ei no ho?’ Nọ a rẹ zẹ ogodẹ na, a rẹ nyase iẹe ba ọgọdọ rite okiokiọ riẹ hẹ, re ọ mọ jẹ wha uvru se ai. U te no ere no, Ikereakere na e ta nọ: “Ohwo okiẹrẹe ọ rẹ rehọ ẹro te uzuazọ arao riẹ.”

Be rehọ onana wawo, Jesu ọ tẹ gbẹ ta haro nọ: “Kẹvẹ ohwo ọ rẹ ghare vi ogodẹ te re! Fikiere ufore a ru uwoma ẹdẹ ẹdijala.” Isu egagọ na a sae vro iroro eliọliọ, avọ ohrọ itieye na ha, fikiere a te fibo.

Avọ evadha, jegbe uweri kpahe ugheghẹ eva egaga rai, Jesu o te rri wariẹ. Ọ tẹ ta kẹ ọzae na nọ: “Riẹ obọ ra.” Ọ tẹ riẹ obọ riẹ, obọ na o tẹ ruẹrẹ họ.

Ukpenọ eva e were ai nọ obọ ọzae na o ruẹrẹ họ no, otu Farisi na a tẹ nya ruọ otafe, a te si uzou koko vẹrẹ vẹrẹ kugbe ogba ilele Herọd re a kpe Jesu. Ababọ avro ogba esuo enana i kugbe ahwo egagọ Sadusi. A rẹ rọ gba kugbe otu Farisi na vẹre he, rekọ aikpobi a kuomagbe kothi evaọ ẹwọsuọ Jesu rai. Matiu 12:9-14; Mak 3:1-6; Luk 6:6-11; Itẹ 12:10; Ọnyano 20:8-10.

▪ Eme o wha avro evaọ udevie Jesu gbe isu egagọ ahwo Ju na ze?

▪ Eme isu egagọ ahwo Ju na a rọwo kpahe esiwo evaọ Ẹdijala?

▪ Didi ọtadhesẹ Jesu ọ kẹ ro brukpe eriwo ethọthọ rai?