Uzou Avọ 37

Jesu O Si Uweri Aye-Uku No

U KRI hi nọ o siwi odibo olori isoja na no, Jesu o te kpohọ Nein, okpẹwho nọ u thabọ vi ikilomita 32 evaọ ofẹ obọze-ukiediwo-ọre Kapaniọm. Ilele riẹ gbe otu obuobu a bi lele iei. Oke u dina te obọ owọwọ no nọ a te ughe Nein. A tẹ nyaku ahwo nọ a dhuye họ be wọ ori nya i kie. Ugboma owhuowhu ọmoha jọ nọ a be wọ no okpẹwho na nya i kie.

Ohrọ oni riẹ o rẹ re owhẹ, keme aye-uku ọ rọ yọ ọnana ọvo họ ọmọ riẹ. Okenọ ọzae riẹ o whu, ọ jẹ rehọ ọmọ na kpairoro. Ẹruore riẹ, isiuru riẹ, gbe irẹro riẹ kpobi e tẹ roma hwa ọmọ na. Rekọ enẹna ohwo ọvo nọ o fiẹro họ ọ riẹ hẹ. O bi weri gaga nọ ahwo ẹwho na a bi su ei kpohọ oria ukio na.

Nọ Jesu o gbẹro kuọ aye na, uweri riẹ u te duobọ tei udu gaga. Fikiere avọ ẹwo, rekọ avọ ẹgba nọ o rẹ kẹ evaifihọ, ọ tẹ ta kẹe nọ: “Whọ viẹ hẹ.” Uruemu gbe owojẹ riẹ u te duobọ te iroro ogbotu na. Fikiere nọ ọ nya kẹle jẹ kaobọ te etehe nọ a wọ ọmọ na họ na, ahwo nọ a be wọe na a tẹ daji. U gbe ahwo na kpobi unu kpahe oware nọ o bi ti ruẹ.

Uzẹme o rọ inọ ahwo nọ a bi lele Jesu a rue riẹ nọ ọ rọ edhere igbunu siwi eyao ahwo buobu no. Rekọ o wọhọ nọ a te rueriẹ nọ ọ kpare ohwo ọvo no uwhu ze he. Kọ ọ sai ru oware otiọye na? Nọ ọ kpọ ẹme riẹ bru ori na, Jesu ọ tẹ ta nọ: “Ẹghele mẹ ta kẹ owhẹ nọ, Kparoma.” Ọzae na ọ tẹ kparoma! O te muọ ẹme họ ẹta, Jesu ọ tẹ rehọ iẹe kẹ oni riẹ.

Nọ ahwo na a ruẹ nọ ọmoha na ọ ghinẹ ziọ uzuazọ no, a te muhọ ẹta nọ: “Ọruẹaro ologbo jọ o no udevie mai ze [no]!” Efa a tẹ ta nọ: ‘Ọghẹnẹ ọ rẹriẹ ova ku ahwo riẹ no.’ Ababọ okioraha usi kpahe oware ugbunu onana o tẹ vaha ruọ Judia gbe erẹwho ekẹloma riẹ soso.

Jọn Ọhọahwo-Ame na ọ gbẹ rọ uwou-odi, yọ ọ gbẹ gwọlọ riẹ kpahe iruo nọ Jesu o bi ru. Ilele Jọn a tẹ ta kẹe kpahe eware igbunu enana. Eme họ uyo riẹ? Luk 7:11-18.

▪ Eme ọ jẹ via nọ Jesu ọ kẹle Nein no?

▪ Ẹvẹ oware nọ Jesu ọ ruẹ u ro kpomahọ iẹe, kọ eme o ru?

▪ Didi uyo ahwo na a kẹ kpahe oware igbunu Jesu?