Uzou Avọ 39

Erọ Omoya gbe Iruori Na

NỌ Ọ fodẹ ọtẹruo Jọn Ọhọahwo-Ame na no, Jesu ọ tẹ rẹriẹ ova dhe ahwo omoya, ahwo eviẹhọ nọ e wariẹ e riẹ họ. “Oge ọnana,” ere o whowho, “ọ wọhọ emaha na nọ e keria oria eki nọ e be ta ẹme se egbẹnya rai, anọ, ‘Ma kporo urete [kẹ] owhai wha gbe eha ha; ma viẹ e, wha weli hi.’ ”

Eme họ otofa eme Jesu? O ru rie vevẹ nọ: “Jọn ọ ze, ọ re emu hu, ọ da gbe he, a tẹ ta nọ, ‘[O] wo ẹzi-omuomu’; Ọmọ ohwo ọ nyaze, ọ re jẹ da, a ta nọ, ‘Ri, ọgba eriare, ọgba edada, ogbẹnyusu imiazọhọ gbe erahaizi!’ ”

O rọ bẹbẹ re a ru ahwo na eva were. Oware ovo nọ u re ru ai eva were o rọ họ. Jọn ọ jẹ rria uzuazọ omolahiẹ ọrọ omasino wọhọ Nazarait, evaọ ẹmeoyo kẹ ewhowho ẹnjẹle na inọ “ọ rẹ te da udi hi.” Yọ ghele ahwo na a tẹ be ta nọ o wo idhivẹri. Evaọ abọdekọ riẹ, Jesu ọ jẹ rria wọhọ ahwo edekọ, ọ jẹ kuọ oma riẹ dhere he, ghele a bọwo riẹ ota nọ o bi ru vrẹta.

Ẹvẹ eva ahwo na e ga te! A wọhọ ibe arozaha, enọ e se nọ a re gbile he nọ emọ edekọ a je kporo ekpata hayo enọ i weri hi nọ otu rai e jẹ viẹ. Ghele na, Jesu ọ ta nọ: ‘Iruo areghẹ a re ro dhesẹ iẹe kiẹrẹe.’ Ẹhẹ, imuẹro na—iruo—i dhesẹ vevẹ inọ ota nọ a be bọwo Jọn gbe Jesu na yọ erue gheghe.

Jesu ọ tẹ fodẹ ikpewho esa enọ ọ l’eka erọ Korazin, Bẹtsaida, gbe Kapaniọm, eria nọ o je ru eware igbunu riẹ buobu. O hae jọ nọ o ru iruo igbunu enana evaọ ikpewho Fonisia evaọ Taya gbe Saidọn, Jesu ọ ta nọ, ikpewho enana a hai kurẹriẹ eva ehọ-ẹkporo gbe enwo. Je bru kpe Kapaniọm, onọ o jọ ẹwho nọ ọ jẹ rria evaọ etoke odibọgba riẹ, Jesu o te whowho nọ: “Ẹdẹ ẹdhọ o rẹ lọhọ kẹ otọ [ẹwho] Sọdọm vi owhẹ.”

Jesu ọ tẹ jọ ẹgbede jiri Ọsẹ obọ odhiwu riẹ. Oma o wọ riẹ re o ru ere keme Ọghẹnẹ ọ ko uzẹme abọ-ẹzi eghaghae na no iwareghẹ gbe egbaeriariẹ rekọ o te rovie eware igbunu enana kẹ iwhrori, enọ e wọhọ emaha.

Ukuhọ riẹ, Jesu ọ tẹ kẹ uzizie isiuru na: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.”

Ẹvẹ Jesu ọ rọ kẹ omosasọ? O ru onana ẹkwoma ẹkẹ ufuoma no iruemu anwae igbo nọ isu egagọ na a rọ nẹ ahwo na nyaotọ, wọhọ oriruo, kugbe ẹwhaha uzi Ẹdijala na. O te je dhesẹ edhere ufuoma kẹ enọ isu na a bi kienyẹ gbe ahwo nọ izieraha rai i bi kpokpo. O te dhesẹ epanọ a rẹ sae rọ rehọ izieraha rọ vrẹ ahwo itieye nọ uye o be bẹ na gbe oghẹrẹ nọ a sae rọ reawere usu oghaghae kugbe Ọghẹnẹ.

Owha uvovori nọ Jesu ọ rọ kẹ họ orọ omarọkẹ Ọghẹnẹ, epanọ a rẹ rọ gọ Ọsẹ obọ odhiwu ororokẹ mai, ọnọ ọ vọ avọ ohrọ. Yọ owha olọlọhọ nọ Jesu ọ rẹ rọ kẹ ahwo nọ i bi bru ei ze họ orọ ẹmeoyo kẹ ẹgwọlọ Ọghẹnẹ kẹ uzuazọ, enọ e rọ ijaje Riẹ nọ a kere fihọ Ebaibol na. Yọ ẹmeoyo kẹ enana o rọ owha ogbẹgbẹdẹ vievie he. Matiu 11:16-30; Luk 1:15; 7:31-35; 1 Jọn 5:3.

▪ Ẹvẹ ahwo omoya, erọ eviẹhọ oge Jesu na a jẹ wọhọ emaha?

▪ Fikieme oma o jẹ wọ Jesu re o jiri Ọsẹ obọ odhiwu riẹ?

▪ Idhere vẹ uye o be rọ bẹ ahwo, kọ didi ufuoma Jesu ọ kẹ?