Uzou Avọ 40

Uwuhrẹ Kpahe Ohrọoriọ

O WỌHỌ nọ Jesu ọ gbẹ rọ Nein, oria nọ ọ jọ kpare ọmọzae aye-uku jọ kẹle na, hayo ẹsejọhọ o bi weze kpohọ okpẹwho ekẹloma jọ. Saimọn, ohwo Farisi, ọ tẹ gwọlọ riẹ kpahe ohwo nọ o bi ru eware igbunu itieye na viere. Fikiere o te zizie Jesu re ọ re emu kugbei.

Nọ o rri uvẹ na wọhọ okenọ ọ rẹ rọ gbodibo kẹ ahwo nọ e nyaze, Jesu ọ tẹ jẹ uzizie na rehọ, nwane wọhọ epanọ ọ jẹ uzizie na rehọ re o lele imiazọhọ gbe erahaizi re emu na. Ghele na, nọ ọ rueva uwou Saimọn, Jesu ọ ruẹ odederehọ nọ a rẹ kẹ erara ha.

Awọ riẹ e roro no jẹ rọ gbegbe fiki edhere ovu na, yọ o rọ uruemu ọrara-ọghọ re a rehọ ame odhedhẹ wozẹ awọ erara. Rekọ a wozẹ awọ Jesu hu nọ ọ nyaze. Yọ ohwo ọvo ọ viọlọ e riẹ unu hu, oware nọ o jọ uruemu unuakpọ yena. Yọ ewhri ọrara-ọghọ na a ku rie fihọ eto riẹ gbe he.

Evaọ etoke emuọriọ na, okenọ erara na a keria wariẹ emẹjẹ na, aye jọ nọ a zizie he ọ tẹ lẹlẹ ruọ uwou na. A jọ okpẹwho na riẹe wọhọ ogbọfariẹ. O sae jọ nọ o yo iwuhrẹ Jesu no, kugbe uzizie riẹ rọ kẹ ‘enọ uye o be bẹ re a bru ei ze kẹ omosasọ.’ Yọ fikinọ oware nọ ọ ruẹ je yo i duobọ tei, ọ tẹ gwọlọ Jesu via.

Aye na ọ tẹ nya ruọ emu Jesu eva emẹjẹ na o te kigwẹ fihọ awọ riẹ. Nọ irui oviẹ riẹ i bi kie fihọ awọ riẹ na, ọ tẹ be rehọ eto riẹ ririe ai no. Ọ tẹ jẹ rehọ ewhri isialẹ no umukoko riẹ ze, yọ nọ ọ be viọlọ awọ riẹ na, o te ku ewhri na họ ai. Saimọn o te je rri rie avọ evedha. “[Otẹrọnọ] ohwo ọnana ọ rọ ọruẹaro, ọ hẹ riẹ epanọ aye ọnana ọrọ, gbe eruo riẹ, ọnọ ọ rọ obọ te ei na, nọ, ọ rọ ọrahaizi.”

Nọ ọ riẹ kpahe iroro riẹ, Jesu ọ tẹ ta nọ: ‘Saimọn, me wo ẹme nọ mẹ gwọlọ ta kẹ owhẹ.’

Ọ tẹ kuyo nọ: “Didi ẹme, Owuhrẹ?”

Jesu o te muhọ nọ: “Whaọ omomigho jọ o wo eriosa ivẹ; ọjọ ọ riosa [isele] ẹgba-isoi, ọfa udhuvẹ gbe ikpe. Nọ a wo ugho ovo nọ a rẹ rọ hwa ha, ọ tẹ rehọ vrẹ ae ivẹ na. Kọ eriosa ivẹ na ọvẹ ọ rẹ mai yo yei?”

Saimọn ọ tẹ kuyo ẹsejọhọ avọ ehoo fikinọ o wọhọ nọ onọ na u fioka ha, ta nọ: “Me roro nọ, ọnọ ọmae rọ vrẹ.”

Jesu ọ tẹ ta nọ: “Whọ riẹ ta.” Ọ tẹ rẹriẹ ova ku aye na, ọ tẹ ta kẹ Saimọn nọ: “Whọ ruẹ aye ọnana? Mẹ ruọ uwou ra whọ kẹ omẹ ame ọvo fiki awọ mẹ hẹ, rekọ ọ rehọ irui vo awọ mẹ, ọ tẹ rọ eto riẹ ririe ai. Whọ kẹ omẹ ẹviọlọ ọvo ho, rekọ ọye, anwọ okenọ mẹ nyaze na o ri seri [awọ] mẹ ẹviọlọ họ họ. Whọ rehọ ewhri wholo uzou mẹ hẹ, rekọ ọ rehọ udẹ wholo awọ mẹ.”

Aye na ọ rehọ edhere otiọna dhesẹ nọ o kurẹriẹ n’eva ze kẹ uzuazọ ọfariẹ-ogbe riẹ vẹre. Fikiere Jesu o te kuhọ, ta nọ: “Fikiere mẹ ta kẹ owhẹ nọ, izieraha riẹ, nọ i re buobu, a rehọ erae vrẹ ino, keme ọye o [you ziezi], rekọ ọnọ a rehọ vrẹ kakao, ọye o you kakao.”

Orọnikọ Jesu ọ be kuvẹ kẹ ọfariẹ-ogbe hayo kọ ọ be jẹe rehọ họ. Ukpoye, oware onana nọ o via na u dhesẹ ọdawẹ otoriẹ nọ o wo kẹ ahwo enọ i ruthọ no evaọ uzuazọ rekọ enọ i dhesẹ nọ izieraha rai e da rai fikiere a te bru Kristi ze kẹ ufuoma. Nọ ọ jẹ kẹ aye na uvi omosasọ, Jesu ọ tẹ ta nọ: “A rehọ izieraha ra vrẹ owhẹ no. . . . Ẹrọwọ ra o si owhẹ no; nyawa tou.” Luk 7:36-50; Matiu 11:28-30.

▪ Ẹvẹ Saimọn o dede Jesu rehọ te?

▪ Ono ọ gwọlọ Jesu via, kọ fikieme?

▪ Didi ọtadhesẹ Jesu ọ kẹ, kọ ẹvẹ ọ fotọ riẹ?