Uzou Avọ 42

Jesu Ọ Whọku Otu Farisi Na

JESU ọ vro inọ otẹrọnọ ogaga Setan o bi ro le idhivẹri no, koyehọ Setan ọ ghale omariẹ no. Ọ tẹ gbẹ ta haro nọ: “Kiyọ who re ru ure woma, gbe ibi riẹ woma; hayo who re ru ure yoma gbe ibi riẹ yoma; ibi ure a re ro vuhu ure.”

O rọ gheghẹ re ohwo ọ ta nọ ibi iwoma ọrọ idhivẹri nọ a le no na yọ ẹkwoma Setan nọ Jesu ọ be gọ. Otẹrọnọ ubi na u woma, ure na o rẹ sae jọ gbogbo ho. Evaọ abọdekọ riẹ, ibi igbogbo otu Farisi nọ a be rọ bọwo Jesu ota je mu wọsuẹe na yọ imuẹro inọ a rọ gbogbo. Jesu o te bo nọ: “Whai emọ ibi, kẹvẹ whai enọ iyoma, wha rẹ sae ta eme iwoma? Keme eme ibuobu nọ erọ eva na unu a rẹ rọ tae via.”

Nọ ẹmeunu mai i re dhesẹ oghẹrẹ nọ idu mai e rọ na, ẹme nọ ma ta a re ro gu omai ẹdhọ. Jesu ọ ta nọ: “Mẹ ta kẹ owhai, ẹme ozuehọ nọ ahwo rẹ ta, a re ti kele ai eva ẹdẹ ẹdhọ na; keme eva ẹme ra ẹrẹreokie ra o reti no tha, jegbe eva ẹme ra obrukpe ra o re ti no tha.”

Makọ iruo igbunu nọ Jesu o ru kẹhẹ, ikere-ebe gbe otu Farisi na a yare nọ: “Owuhrẹ, ma guọlọ nọ ma rẹ jọ obọ ra ruẹ oka.” Dede nọ ezae enana nọ i no Jerusalẹm ze na a te rọ ẹro rai ruẹ iruo igbunu riẹ hẹ, ababọ avro imuẹro eware igbunu enana e riẹ. Fikiere Jesu ọ tẹ ta kẹ isu ahwo Ju na nọ: “Oge oyoma ibrẹnwae na a guọlọ oka, a rẹ sae rehọ oka kẹ ae he, rekọ oka Jona ọruẹaro na ọvo.”

Nọ ọ jẹ fotọ ẹme riẹ, Jesu ọ tẹ gbẹ ta haro nọ: “Keme epanọ Jona ọ jọ eva avatonwa edẹ esa gbe eso esa, ere Ọmọ ohwo ọ rẹte jọ eva otọ edẹ esa gbe eso esa.” Nọ eri na ọ lọe no, Jona o te no eva riẹ ze nọ o wọhọ ekparomatha, fikiere Jesu ọ be ruẹaro inọ o re ti whu jegbe nọ evaọ ẹdẹ avọ esa ọ vẹ te ziọ uzuazọ. Ghele na, isu ahwo Ju na, makọ okenọ Jesu ọ kparoma ze no, a se “oka Jona” na.

Fikiere Jesu ọ tẹ ta nọ ezae obọ Ninẹve enọ i kurẹriẹ kẹ usiuwoma ota Jona na a rẹ te kparoma eva ẹdẹ ẹdhoguo na ti brukpe ahwo Ju enọ e se Jesu. Epọvo na, ọ tẹ ta oghẹrẹ ẹme ọvo na kpahe ovie-aye Sheba, ọnọ o no oka akpọ na ze ti yo areghẹ Solomọn yọ eware nọ ọ ruẹ je yo i te gbei unu. Jesu o te muẹrohọ nọ: “Wha ri ọ nọ ọ ro vi Solomọn ọ rọ etenẹ.”

Kẹsena Jesu ọ tẹ kẹ oriruo ohwo nọ izi igbegbe i no oma ze. Ghele na, ọzae na ọ rehọ emamọ eware di eghogho na ha, fikiere izi igbegbe ihrẹ nọ e mai yoma e tẹ ruẹe oma. Jesu ọ tẹ ta nọ: “Ere o rẹte jọ kẹ oge oyoma ọnana re.” A ru orẹwho emọ Izrẹl na fo no a tẹ jẹ ruẹ inwene no—wọhọ ẹzi ogbegbe nọ o no ohwo oma. Rekọ ẹsiọ nọ orẹwho na a se eruẹaro Ọghẹnẹ, nọ u kuhọ evaọ ẹwọsuọ Kristi omariẹ, u dhesẹ eyero omuomu riẹ via nọ u yoma vi emuhọ riẹ.

Nọ Jesu ọ gbẹ rọ ẹme na, oni riẹ gbe inievo riẹ a tẹ nyaze a te dikihẹ akotọ ogbotu na. Fikiere ohwo jọ ọ tẹ ta nọ: “Ri, oni ra gbe imoni ra a dikihẹ obọ otafe a be guọlọ owhẹ ta ẹme kẹ.”

Jesu ọ tẹ nọ nọ: “Onohọ oni mẹ jegbe amono họ imoni mẹ?” Nọ ọ riobọ rri ogbotu na, ọ tẹ ta nọ: “Ri oni mẹ gbe imoni mẹ! Keme ohwo nọ o re ti ru eware nọ e rọ eva Ọsẹ mẹ nọ ọ rọ obọ odhiwu ọye họ oniọvo ọmọzae mẹ, gbe oniọvo ọmọtẹ mẹ, gbe oni mẹ.” Evaọ edhere ọnana Jesu o te dhesẹ nọ makọ oghẹrẹ nọ ọ kpekpe te kugbe imoni riẹ kẹhẹ, usu riẹ kugbe ilele riẹ oye o mai wo aghare. Matiu 12:33-50; Mak 3:31-35; Luk 8:19-21.

▪ Ẹvẹ otu Farisi na a ro ru “ure” na gbe “ibi” riẹ woma ha?

▪ Eme họ “oka Jona,” kọ ẹvẹ a rọ siẹe uwhremu na?

▪ Ẹvẹ orẹwho ikpe-udhusoi ọsosuọ emọ Izrẹl a rọ wọhọ ohwo nọ ẹzi ogbegbe o no oma ze?

▪ Ẹvẹ Jesu o ro dhesẹ usu okpekpe riẹ kugbe ilele riẹ?