Uzou Avọ 51
Ohwo-Okpe Evaọ Oke Ehaa Ẹdẹ-Eyẹ
NỌ Ọ kẹ ikọ riẹ ithubro no, Jesu o te vi ai vrẹ ivivẹ kpohọ ẹkwotọ na. O wọhọ nọ inievo na Pita avọ Andru a nyusu, epọvo na o jọ kẹ Jemis avọ Jọn, Filip avọ Batolomiu, Tọmas avọ Matiu, Jemis avọ Tadiọs, gbe Saimọn avọ Judas Iskariọt. Ẹko etausiuwoma ezeza na a te whowho emamọ usi Uvie na a te je siwi eyao evaọ oria kpobi nọ a nya.
Oke onana kpobi, Jọn Ọhọahwo-Ame na ọ gbẹ rọ uwou-odi. Ọ rọ etẹe te enwene ikpe ivẹ no. Whọ rẹ sae kareghẹhọ inọ Jọn ọ jọ ẹgbede whowho inọ o thọ kẹ Herọd Antipas re ọ rehọ Herọdias, aye oniọvo riẹ Filip, wọhọ aye obọ riẹ. Nọ Herọd Antipas ọ ta nọ o bi lele Uzi Mosis na, Jọn o te ghine rovie omakugbe ẹnwae-obro ọnana via. Fikiere Herọd o te gbolo Jọn fihọ uwou-odi, ẹsejọhọ fiki ẹkpakpa Herọdias.
Herọd Antipas ọ riẹ nọ Jọn yọ ohwo okiẹrẹe yọ ọ rẹ tubẹ gaviezọ kẹe avọ isiuru. Fikiere, ọ gbẹ riẹ epanọ o re ru ei hi. Evaọ abọdekọ riẹ, Herọdias o mukpahe Jọn ọ tẹ jẹ gwọlọ edhere nọ o re ro kpei. Uwhremu na, uvẹ nọ ọ be hẹrẹ anwẹdẹ na o tẹ ze.
Nọ ehaa Ọnyavrẹ ọrọ 32 C.E. o nwane vrẹ no, Herọd ọ tẹ ruẹrẹ ehaa ologbo ọrọ ẹdẹ-eyẹ riẹ họ. Ikpahwo gbe ilori isoja Herọd kpobi a kokohọ ehaa na, jegbe isu ahwo Galili. Nọ oke o be nyaharo na, Salomi, ọmọtẹ nọ Herọdias o yẹ kẹ ọzae ọsosuọ riẹ Filip, a te vi ei ze re o gbile rọ ghọ erara na. Ile nọ o gbe e tẹ were ogbotu ezae na oma gaga.
Eva Salomi e tẹ were Herọd gaga. O te whowho nọ: “Yare koware koware nọ o ruọ owhẹ.” Ọ tẹ tubẹ bọwo eha nọ: “Koware koware nọ whọ rẹ yare omẹ, mẹ rẹ kẹ owhẹ, makọ abọvo uvie mẹ dede.”
Taure ọ tẹ kuyo, Salomi ọ tẹ nya i s’umẹ kugbe oni riẹ. Ọ tẹ nọ nọ: ‘Eme mẹ rẹ yare?’
Uvẹ na o ze no! Herọdias ọ tẹ kuyo ababọ izudhe nọ: “Uzou Jọn Ọhọahwoame.”
Vẹrẹ vẹrẹ Salomi o te zihe bru Herọd ọ tẹ yare iẹe nọ: ‘Mẹ gwọlọ nọ whọ rẹ kẹ omẹ uzou Jọn Ọhọahwo-Ame na eva udo vẹrẹ.’
Oware na o tẹ da Herọd gaga. Ghele na, fiki erara riẹ enọ i yo iyowu nọ o duwu, omovuọ o ja riẹ se he, dede nọ onana u dhesẹ nọ ekpe ohwo ọvowa. Ọ tẹ nwani vi okpikpakpe kpohọ uwou-odi na avọ uthubro idudu riẹ. U kri hi o te zihe ze avọ uzou Jọn evaọ udo, ọ tẹ rehọ iẹe kẹ Salomi. Ọmọtẹ na ọ tẹ rehọ iẹe se oni riẹ. Nọ ilele Jọn a yo kpahe oware nọ o via, a tẹ nyaze a tẹ rehọ oma riẹ nya i kie, a tẹ niyẹrẹ ẹme na kẹ Jesu.
Uwhremu na, okenọ Herọd o yo kpahe usiwo nọ Jesu o bi siwi ahwo je bi le idhivẹri no ai oma, ozọ u te mu ei, be dhozọ inọ Jesu họ Jọn nọ ọ kpare oma no iwhuowhu ze. U no ere no, ọ tẹ gwọlọ nọ ọ rẹ ruẹ Jesu, orọnikọ re o yo usiuwoma ota riẹ hẹ, rekọ re ọ ruẹ sọ ozodhẹ riẹ na o gba. Matiu 10:1-5; 11:1; 14:1-12; Mak 6:14-29; Luk 9:7-9.
▪ Fikieme Jọn ọ jẹ rọ uwou-odi, kọ fikieme Herọd ọ gbẹ gwọlọ kpei hi?
▪ Ẹvẹ Herọdias ọ sai ro ru nọ a ro kpe Jọn uwhremu na?
▪ Nọ Jọn o whu no, fikieme Herọd ọ jẹ gwọlọ ruẹ Jesu?