Uzou Avọ 52
Jesu Ọ Rehọ Edhere Igbunu Ko Idu Ahwo
IKỌ 12 na a reawere erẹ usiuwoma ota igbunu no evaọ Galili kpobi. Enẹna, u kri hi nọ a kpe Jọn no, a te zihe bru Jesu ze re a gbiku eware igbunu nọ a ruẹ. Nọ ọ ruẹ nọ oma o lọhọ e rai no gbe nọ ahwo buobu a be nyaze jẹ nyavrẹ te epanọ a bi ro w’uvẹ re emu hu, Jesu ọ tẹ ta nọ: ‘Joma kpohọ oria nọ ohwo ọ rọ họ re wha serihọ.’
Nọ a ruọ okọ, ẹsejọhọ kẹle Kapaniọm, a te lehọ kpohọ oria nọ o kuomadhere, kpohọ ofẹ ovatha-ọre Jọdan vrẹ Bẹtsaida. Ghele na, ahwo buobu a rue rai nọ a jẹ nyavrẹ, amọfa a tẹ riẹ kpahe iẹe uwhremu na. Enana e tẹ rọ orotọ dhẹ haro, okenọ okọ na o kpahe no, ahwo na a te zere ai.
Nọ o no okọ na ruotọ jẹ ruẹ ogbotu obuobu na, ohrọ rai o tẹ re Jesu keme ahwo na a wọhọ igodẹ nọ i wo othuru hu. Fikiere o te siwi ẹyao rai o te je mu ai eware buobu họ ewuhrẹ.
Oke o tẹ dhẹ vrẹ vẹrẹ, yọ ilele Jesu a te bru ei ze ta nọ: “Oria nana ohwo ọ riẹ hẹ, yọ oke u bi kpo no re; vi ai vrẹ, re a kpo [erẹwho] gbe iwhre nọ e wariẹ edẹ oware ore.”
Ghele na, evaọ uyo Jesu ọ tẹ ta nọ: “Wha rọ kẹ ae re a re.” Kẹsena, nọ Jesu ọ riẹ oware nọ o bi ti ru no, ọ tẹ dawo Filip nọe nọ: “Ẹvẹ ma rẹ te rọ [dẹ] ebrẹdi re ahwo nana a re?”
No eriwo Filip ze oware na o sae te lọhọ họ. Whaọ, ezae nọ e riẹ i bu te 5,000, yọ a ti bu vi 10,000 otẹrọnọ a kele eyae gbe emaha na! Filip ọ tẹ kuyo nọ “ebrẹdi udhe usele ukpe [usele ọvo họ ugho iruo okpẹdẹ] i re te he re omomọvo ọ rehọ omokakao.”
Ẹsejọhọ re o dhesẹ epanọ o ga te re a ko ogbotu ahwo yena, Andru ọ tẹ ta nọ: “[Ọmọzae] jọ ọrọ etenẹ nọ o wo ikulu ebrẹdi ekakao isoi gbe imiyei ivẹ,” o te fibae nọ, “keme enana i re te, eva aro otu obuobu na?”
Nọ o rọ oke ẹvo na, taure ehaa Ọnyavrẹ 32 C.E. o tẹ nwani te na, ẹbe ọrọrọ ọ vọ riẹ. Fikiere Jesu ọ tẹ ta kẹ ilele riẹ nọ a ta kẹ ahwo na re a keria ẹbe na evaọ ẹko 50 gbe 100. Ọ tẹ rehọ ikulu ebrẹdi isoi gbe imiyei ivẹ na, o te rri kpohọ odhiwu, ọ tẹ lẹ. O te muọ ebrẹdi na họ ẹbẹre jẹ ghale imiyei na. Ọ tẹ rehọ ai kẹ ilele riẹ enọ e ghale rai kẹ ahwo na. Avọ igbunu, ahwo na kpobi a tẹ re evavọ!
Ukuhọ riẹ Jesu ọ tẹ ta kẹ ilele riẹ nọ: “Wha kua ibro nọ ikiọkọ na ovo u vrẹ hẹ.” Nọ a koko ai họ, ikete 12 i te kiọkọ no enọ a re ze! Matiu 14:13-21; Mak 6:30-44; Luk 9:10-17; Jọn 6:1-13.
▪ Fikieme Jesu ọ jẹ gwọlọ oria nọ u siomano kẹ ikọ riẹ?
▪ Diẹse Jesu ọ rehọ ilele riẹ kpohọ, kọ ẹvẹ a gbẹ rọ nyate ẹgwọlọ eriosehọ rai hi?
▪ Nọ oke u kpo no, eme ilele na a jẹ ta, rekọ ẹvẹ Jesu ọ rọ rẹro te ahwo na?