Uzou Avọ 58

Ebrẹdi na gbe Ẹvi Na

OGBOTU obuobu a zurie bru Jesu ze no evaọ Dẹkapọlis. Ibuobu a no ugbothabọ ziọ ofẹ orẹwho Egedhọ ọnana nọ ahwo a vọ na re a te gaviezọ kẹe re a je siwi eyao rai. A wha ikete hayo ekporo ilogbo lele oma enọ a rẹ rọ wha eware nọ a te bi kperẹ fa ekwotọ Egedhọ vrẹ.

Rekọ Jesu o te se ilele riẹ uwhremu na ọ tẹ ta nọ: ‘Ohrọ otu obuobu na o be re omẹ, epanọ a lele omẹ rọ anwọ ẹdẹ esa no, a gbe wo oware ovo nọ a rẹ ria ha; me te vi ai kpo obọ uwou rai eveva, aro o re ti bi ai evaọ edhere, keme ejọ rai i no ugbo ze.’

Ilele na a tẹ nọ nọ: “Bovẹ ohwo ọ jẹ sae jọ oria onana nọ ohwo ọ rọ họ na e rehọ ebrẹdi vọ ahwo enana eva?”

Jesu ọ tẹ nọ nọ: “Bro ikulu ebrẹdi wha wo?”

A tẹ kuyo nọ: “Ihrẹ, gbe imiyei ekakao jọ.”

Nọ ọ ta kẹ ahwo na nọ a keria otọ no, Jesu ọ tẹ rehọ ikulu ebrẹdi gbe imiyei na, ọ tẹ lẹ se Ọghẹnẹ, ọ tẹ bẹre ai, o te mu ai họ ẹrọ kẹ ilele riẹ. Ilele na a tẹ ghale ai kẹ ahwo na, aikpobi a tẹ re evavọ. Ukuhọ riẹ, nọ a koko enọ i kiọkọ họ, e tẹ vọ ikete ihrẹ, dede nọ ezae 4,000 e re emu na, kugbe eyae gbe emaha!

Jesu o te vi ogbotu na vrẹ, ọ tẹ ruọ okọ kugbe ilele riẹ, ọ tẹ fa vrẹ kpohọ abọdekọ okpa ukiediwo-ọre Abade Galili. Evaọ etenẹ otu Farisi, avọ ahwo ẹko egagọ Sadusi, a tẹ daoma re a dawo Jesu ẹkwoma onọ nọ a nọ riẹ re o dhesẹ oka no odhiwu ze.

Nọ ọ riẹ omodawọ nọ a be rọ dawo iẹe, Jesu ọ tẹ kuyo nọ: “Nọ o rọ owọwọ, wha rẹ ta nọ, ‘Ovao ehru ọ rẹ te ghariẹ, keme ehru ọ rẹ wawae.’ Eva ohiohiẹ, ‘Ehru o re ti fou-ofou nẹnẹ, keme ehru o ware fihọ je bi fiẹ.’ Wha riẹ epanọ a rẹ ta otọ ovao ehru, rekọ wha gbẹ sae ta otọ eware-oka oke onana ha.”

Fikiere, Jesu o te se ai oge omuomu ogbekuo ọ tẹ vẹvẹ ai unu inọ, wọhọ epanọ ọ ta kẹ otu Farisi vẹre na, a te kẹ ai oka ovo ho ajokpa oka Jona. Nọ o no etẹe, tei te ilele riẹ a tẹ ruọ okọ a tẹ wariẹ rọ ova hwa Bẹtsaida evaọ ofẹ okpa ẹkpẹlobọ-ovatha-ọre Abade Galili. Evaọ edhere ilele na a te vuhumu nọ a kareghẹhọ wha ebrẹdi lele oma ha, keme ukulu ebrẹdi ọvo o rọ ae obọ.

Avọ iroro ẹme nọ o lele otu Farisi gbe otu Sadusi enọ e be thọ Herọd uke na ta, Jesu ọ tẹ vẹvẹ unu nọ: “Wha yọrọ oma kẹ [ẹvi] otu Farisi gbe otu Herọd.” Fikinọ ọ fodẹ ẹvi ilele na a te roro nọ Jesu ọ be ta kpahe ebrẹdi nọ o thọre rai ẹro, fikiere a tẹ be rọ ẹme na vroavro. Nọ o muẹrohọ orithọ rai, Jesu ọ tẹ ta nọ: ‘Fikieme wha jẹ be vravro fiki ebrẹdi nọ wha wo ho?’

U ri kri hi nọ Jesu ọ rehọ edhere igbunu rọ ebrẹdi ko idu ahwo o te je ru oware igbunu urere onana wọhọ ẹdẹ ọvo hayo ivẹ nọ i kpemu. U fo re a riẹ nọ orọnikọ ọ be ruawa kpahe ebrẹdi nọ a wo ho ho. Ọ tẹ kareghẹhọ ai nọ: ‘Nọ mẹ bẹre ikulu isoi kẹ ezae idu isoi, bro ikete wha tọlọ vọ?’

A te yo nọ: “Ikpogbivẹ.”

‘Nọ mẹ bẹre ihrẹ kẹ ezae idu ene, bro ikete wha tọlọ vọ?’

A te yo nọ: “Ihrẹ.”

‘Kọ ri fienẹna wha te riẹ?’ ere Jesu ọ nọ. “Fikieme wha jẹ seba erimuo nnọ mẹ ta ẹme ebrẹdi hi? Wha yọrọ oma obọ eviẹhọ otu Farisi gbe Sadusi.”

Ẹme na o te vẹ ilele na ẹro uwhremu na. Ẹvi, oware nọ o rẹ wha ọguakugbe ze jẹ lẹliẹ ebrẹdi fu, yọ ẹme nọ a je ro dhesẹ egbogbo. Fikiere enẹna u te vẹ ilele na ẹro nọ Jesu ọ be rehọ ẹme na fodẹ oware, inọ ọ be vẹvẹ ai unu re a yọrọ oma ‘kpahe ewuhrẹ otu Farisi gbe Sadusi,’ uwuhrẹ nọ o rẹ wha egbogbo ze. Mak 8:1-21; Matiu 15:32–16:12.

▪ Fikieme ahwo na a jẹ wha ikete ilogbo lele oma?

▪ Nọ a no Dẹkapọlis no, didi erẹ okọ Jesu ọ nya?

▪ Didi otoriẹ othọthọ ilele na a wo kpahe ẹme Jesu ọrọ ẹvi na?

▪ Eme họ otọ ẹme Jesu na kpahe ‘ẹvi otu Farisi gbe Sadusi na’?