Uzou Avọ 54

‘Uvi Ebrẹdi No Obọ Odhiwu Ze’

ODẸ n’ukpo na o ghinẹ vọ avọ iruo. Jesu ọ rehọ edhere igbunu ko idu ahwo ọ tẹ dhẹ vabọ no omodawọ ahwo na nọ e jẹ gwọlọ rehọ iẹe mu ovie. Evaọ aso ọyena ọ nya ehru ẹkporo Abade Galili; siwi Pita, ọnọ o je ti kiediwi nọ ọ jẹ nya ehru ame ẹkporo na; o te furie ẹkporo re o siwi ilele riẹ no okọ-uzue.

Enẹna ahwo nọ Jesu ọ rehọ edhere igbunu ko evaọ ofẹ ẹkpẹlobọ-ovatha-ọre Abade Galili na a rue riẹ kẹle Kapaniọm a tẹ nọ nọ: “Oke ovẹ whọ rọ ze obonẹ?” Nọ ọ whọku ai, Jesu ọ tẹ ta nọ a nyaze be gwọlọ iẹe fikinọ a bi rẹro emu ọvọvẹ ọfa. Ọ tẹ ta kẹ ae ai inọ a gwọlọ, orọnikọ emu nọ ọ rẹ raha ha, rekọ emu nọ ọ rẹ kẹ uzuazọ ebẹdẹ bẹdẹ. Fikiere ahwo na a tẹ nọ nọ: “Eme ma re ruẹ, nọ ma je ru iruo Ọghẹnẹ?”

Jesu ọ tẹ fodẹ iruo ọvo jọ nọ o mai wo aghare. Ọ ta nọ: ‘Onana họ iruo Ọghẹnẹ, nọ, wha rẹ rọwo Ọnọ o vi ze.’

Ghele na, ahwo na a fi ẹrọwọ họ Jesu hu, ghelọ eware igbunu kpobi nọ o ru no na. U gbunu kẹ hẹ, makọ avọ eware igbunu nọ o ru no kpobi na, a tẹ nọ nọ: “Otẹrọ ere eme who [bi] ru re o jọ oka, re ma ruẹ ma rọwo owhẹ? Didi iruo who [bi] ru? Esẹ mai ere mana eva obọ ẹwọ; wọhọ epanọ a kere nọ, ‘Ọ rehọ ebrẹdi no obọ odhiwu ze kẹ ae re.’ ”

Evaọ uyo kẹ ayare rai kẹ oka, Jesu o te dhesẹ Ehri eware igbunu vevẹ nọ: ‘Orọnọ Mosis ọ rehọ ebrẹdi eyena no obọ odhiwu ze kẹ owhai hi; rekọ Ọsẹ mẹ ọ kẹ owhai uvi ebrẹdi na no obọ odhiwu ze. Keme ebrẹdi Ọghẹnẹ họ ọnọ o no obọ odhiwu ze otọ, nọ ọ jẹ kẹ akpọ uzuazọ.’

Ahwo na a tẹ ta nọ: “Olori, kẹ omai ebrẹdi ọnana kẹse kẹse.”

Jesu ọ tẹ ta nọ: “Mẹ họ ebrẹdi uzuazọ; ọ nọ o bru omẹ ze ohọwo u re kpei hi, ọ nọ ọ rọwo omẹ uru-ame u re kpei hi. Rekọ mẹ ta kẹ owhai, wha ruẹ omẹ, wha rọwo omẹ gbe he. Enọ Ọsẹ mẹ ọ kẹ omẹ kpobi i re ti bru omẹ tha; ọ nọ o bru omẹ ze mẹ gbẹ sai lei vievie he. Keme me no obọ odhiwu ze, ti ru orọ eva mẹ hẹ, rekọ orọ eva ọnọ o vi omẹ ze; onana họ oreva ọ nọ o vi omẹ ze, nọ, enọ ọ kẹ omẹ kpobi ọvo ọ rẹ sai vrẹ eva obọ mẹ hẹ, rekọ mẹ [rẹ] te kpare iẹe, eva edẹ urere. Keme onana họ orọ eva Ọsẹ na, nnọ, kohwo kohwo nọ ọ ruẹ Ọmọ na ọ tẹ rọwo iẹ ore wo uzuazọ ebẹdẹ bẹdẹ.”

Ahwo Ju a te muhọ ẹgo kẹ Jesu fikinọ ọ ta nọ, “Mẹ họ ebrẹdi nọ ino odhiwu ze.” Oware nọ a be jọ oma riẹ ruẹ kpobi họ ọmọ nọ ahwo-akpọ a yẹ fikiere evaọ edhere ọvo na wọhọ ahwo Nazarẹt, a tẹ vro, ta nọ: “Ọnana họ Jesu, ọmọ Josẹf na [ọna], ọnọ ma riẹ ọsẹ avọ oni riẹ? Kẹvẹ ọ jẹ be ta nọ, ‘Obọ odhiwu me nọ ze’?”

Jesu ọ tẹ kuyo nọ: “Wha jọ udevie rai gua ha. Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie; mẹ rẹ te kpare iẹ eva ẹdẹ urere. A kere họ eva eruẹaro na nọ, ‘Ai kpobi Ọghẹnẹ o re ti wuhrẹ.’ Kohwo kohwo nọ o yo, je wuhrẹ no obọ Ọsẹ na ze, o bru omẹ ze. Orọnọ ohwo jọ ọ ruẹ Ọsẹ na ha ajokpa ọnọ ono obọ Ọghẹnẹ ze; ọye ọ ruẹ Ọsẹ na. Uzẹme, uzẹme, mẹ ta kẹ owhai, ọnọ ọ rọwo o wo uzuazọ ebẹdẹ bẹdẹ.”

Be ta haro, Jesu ọ tẹ wariẹ nọ: “Mẹ họ ebrẹdi uzuazọ. Esẹ rai e re mana eva obọ ẹwọ, a te whu. Ọnana họ ebrẹdi nọ o no obọ odhiwu ze; re ohwo ọ re ọ seba ewhuo. Mẹ họ ebrẹdi uzuazọ nọ o no obọ odhiwu ze; ohwo nọ ọ re ebrẹdi ọnana, ọ rẹ te jọ bẹdẹ bẹdẹ.” Ẹhẹ, ẹkwoma ẹrọwọ nọ a re fihọ Jesu, ọnọ Ọghẹnẹ o vi ze na, ahwo a jẹ sai wo uzuazọ ebẹdẹ bẹdẹ. Emana ọvuọvo hayo ebrẹdi ọvo nọ ọ rẹ kẹ uzuazọ utioye o riẹ hẹ!

O wọhọ nọ ẹme kpahe ebrẹdi nọ o no odhiwu ze na o muhọ nọ ahwo na a nwane duku Jesu no kẹle Kapaniọm. Rekọ ẹme na ọ tẹ gbẹ nyaharo, o te ti kuhọ uwhremu na nọ Jesu o je wuhrẹ evaọ uwou-egagọ evaọ Kapaniọm. Jọn 6:25-51, 59; Olezi 78:24; Aizaya 54:13; Matiu 13:55-57.

▪ Didi eware e via vrẹ no taure ẹme Jesu kpahe ebrẹdi nọ o no odhiwu ze na o te muhọ?

▪ Fiki oware nọ Jesu ọ kaki ru no, fikieme ayare kẹ oka u gbe ro fo ho?

▪ Fikieme ahwo Ju a jẹ be go fikinọ Jesu ọ ta nọ ọye họ uvi ebrẹdi nọ o no odhiwu ze?

▪ Diẹse ẹmeọta kpahe ebrẹdi nọ o no odhiwu ze na o jẹ  roma via?