Uzou Avọ 55

Ilele Buobu A Siọ Jesu Ba Elele

JESU ọ be jọ uwou-egagọ wuhrẹ evaọ Kapaniọm kpahe ẹkẹ abọ riẹ wọhọ ebrẹdi uzẹme nọ o no odhiwu ze. O wọhọ nọ ẹme riẹ o no ẹme nọ ọ ta kiọkọ ze onọ o muhọ kugbe ahwo na okenọ a duku ei evaọ ezihetha rai no abọ ovatha-ọre Abade Galili ze, oria nọ a jọ re ebrẹdi gbe imiyei nọ a rehọ edhere igbunu ru kẹ ai na.

Jesu ọ tẹ ruabọhọ eme riẹ, ta nọ: “Ebrẹdi nọ mẹ [te] kẹ na oma mẹ fiki uzuazọ akpọ na.” Ikpe ivẹ ọvo nọ e vrẹ, evaọ ezi ẹvo ọ 30 C.E., Jesu ọ ta kẹ Nikodimọs inọ Ọghẹnẹ o you akpọ na hrọ te epanọ ọ rọ rehọ Ọmọ riẹ kẹ wọhọ Osiwi. Fikiere, Jesu ọ be jọ etenẹ dhesẹ nọ ohwo kpobi nọ ọ jọ akpọ na re ugboma riẹ evaọ edhere ẹwoho, ẹkwoma ẹrọwọ nọ o re dhesẹ fihọ idhe nọ ọ be te rọ kẹ kẹle na, o re wo uzuazọ ebẹdẹ bẹdẹ.

Ghele na, ahwo na a te zoruẹ fiki eme Jesu na. A tẹ nọ nọ: “Ẹvẹ ohwo ọnana ọ rẹ sae rọ rehọ oma riẹ kẹ omai ria?” Jesu ọ gwọlọ re enọ e be gaviezọ kẹe na a wo otoriẹ nnọ ẹriọ uwo riẹ yọ orọ ẹwoho. Fikiere, re o fiẹgba họ onana, ọ tẹ t’ẹme ọfa nọ ọ mai yoma evaọ ezọ nọ a tẹ rehọ iẹe gheghe epanọ ọ ta riẹ na.

Jesu o whowho nọ: ‘Ajokpa oma Ọmọ ohwo nọ wha rẹ re wha vẹ jẹ da azẹ riẹ, wha wo uzuazọ eva rai hi; ọnọ ọ re oma mẹ ọ tẹ jẹ da azẹ mẹ, o re wo uzuazọ ebẹdẹ bẹdẹ, mẹ rẹ te kpare iẹ eva ẹdẹ urere. Keme oma mẹ ghinọ emu, azẹ mẹ ghinẹ edada. Ọnọ ọ re oma mẹ jẹ da azẹ mẹ, ọ rọ eva mẹ, mẹ tẹ jẹ rọ eva riẹ.’

Uzẹme, ewuhrẹ Jesu o hae dheva gaga otẹrọnọ o bi wuhrẹ kpahe ẹriọ uwo ohwo-akpọ. Rekọ, orọnikọ Jesu ọ be ta nọ a ghinẹ re uwo jẹ da azẹ hẹ. Ẹme nọ ọ be ta na kpobi họ ahwo nọ a ti wo uzuazọ ebẹdẹ bẹdẹ a re fi ẹrọwọ họ idhe nọ o bi ti dhe na okenọ o te fi ugboma ogbagba ohwo-akpọ riẹ h’otọ o ve je ku azẹ uzuazọ riẹ kuotọ. Ghele na, makọ ilele riẹ buobu a daoma wo otoriẹ ewuhrẹ riẹ hẹ rekọ a te veghe uzou nọ: “Onana ẹme ọgaga; ono o re yoi?”

Nọ ọ riẹ nọ ilele riẹ buobu a be go, Jesu ọ tẹ ta nọ: “Onana u ru owhai eva dha? Kẹvẹ wha re ruẹ, re wha tẹ ruẹ Ọmọ ohwo nọ a te rehọ iẹ kpo obọ ehru oria nọ ọ jọ vẹre? . . . Eme nọ mẹ ta kẹ owhai eye họ ẹzi gbe uzuazọ. Rekọ ejọ nọ e rọwo ho erọ udevie rai.”

Jesu ọ tẹ gbẹ ta haro nọ: “Fiki onana mẹ jẹ ta kẹ owhai nọ, ohwo ọvo ọ sai bru omẹ tha ha ajokpa nọ Ọsẹ mẹ ọ rọwo kẹ e.” Nọ ọ ta ere no, ilele riẹ buobu a te kuomarẹriẹ a gbe lele iei ofa ha. Fikiere Jesu ọ tẹ rẹriẹ ova ku ikọ 12 na ọ tẹ nọ nọ: “Wha rẹ te nya vrẹ re?”

Pita ọ tẹ kuyo nọ: “Olori, ono ma rẹ nya brẹ? Who wo ẹme uzuazọ ebẹdẹ bẹdẹ; ma rọwo, ma tẹ riẹ nọ, whẹ họ Omamọ na ọrọ Ọghẹnẹ.” Ẹvẹ onana o rọ emamọ edhesẹ omarokpotọ te, dede nọ Pita gbe ikọ edekọ na a ti wo otoriẹ ewuhrẹ Jesu vọvọ evaọ ẹme ọnana ha!

Dede nọ uyo Pita o were riẹ eva, Jesu o te muẹrohọ nọ: “Mẹ sanọ owhai ikpogbivẹ na? Omọvo rai jọ ukumuomu.” Ọ be ta kpahe Judas Iskariọt. Ẹsejọhọ Jesu ọ jọ oma Judas muọ “emuhọ,” hayo owojẹ edhere oyoma họ ẹruẹ no.

U ri kri hi nọ Jesu o ru ahwo na oma vo evaọ omodawọ rai re a rehọ iẹe ru ovie, yọ ẹsejọhọ a bi je roro nọ, ‘Ẹvẹ ọnana ọ rẹ rọ jọ Mesaya otẹrọnọ ọ rẹ jẹ ọkwa Mesaya rehọ họ?’ Onana o tẹ jẹ rọ ẹme ọkpokpọ evaọ iroro ahwo na. Jọn 6:51-71; 3:16.

▪ Amono Jesu ọ rehọ uwo riẹ kẹ, kọ ẹvẹ ahwo nana a rẹ rọ ‘re uwo riẹ’?

▪ Eme Jesu efa vẹ i guegue ahwo na, rekọ eme o bi dhesẹ?

▪ Nọ ahwo buobu a siọ Jesu ba elele no, eme họ uyo Pita?