Uzou Avọ 62

Uwuhrẹ Evaọ Omarokpotọ

NỌ O siwi ọmọzae nọ idhivẹri e rọ oma na no evaọ ofẹ nọ o kẹle Sisaria Filipai, o tẹ ruọ Jesu nnọ o re zihe kpohọ Kapaniọm. Ghele na, ọ gwọlọ nọ tei te ilele riẹ ọvo a rẹ j’usu evaọ erẹ na re ọ ruẹse ruẹrẹ ai họ ziezi kẹ uwhu riẹ gbe owha-iruo rai nọ u ti lele iei. Ọ ta kẹ ai nọ: “A rẹ te rehọ Ọmọ ohwo họ abọ ahwo, a ve ti kpe i, nọ a kpe rie no, ọ vẹ te kparoma nọ edẹ esa e gba no.”

Dede nọ Jesu ọ kake ta kpahe onana no vẹre, gbe nnọ ikọ esa a ghinẹ ruẹ ẹrẹriẹ na nọ a jọ t’ẹme kpahe “uwhu” riẹ, ilele na a ti wo otoriẹ ẹme ọnana ghele he. Dede nọ ọvuọvo rai ọ daoma vro nọ o ti whu hu, wọhọ epanọ Pita o ru evaọ okiẹdẹ na, ozọ o be jae nọe onọ viere kpahe onana ha.

Ukuhọ riẹ a te te Kapaniọm, onọ o wọhọ ẹwho nọ Jesu o je he wohọ kẹ odibọgba riẹ. O rọ ẹwho Pita gbe ikọ na jọ re. Ezae nọ i re mi azọhọ etẹmpol na a tẹ nya bru Pita ze evaọ etẹe. Ẹsejọhọ re a ruẹsi gele Jesu fihọ ẹme ọ uzi-othọ uruemu nọ a jẹ rehọ, a tẹ nọ nọ: “Kọ owuhrẹ ra ọ rẹ jẹ [azọhọ etẹmpol na]?”

Pita ọ tẹ kuyo nọ: “E.”

Jesu, nọ ọ nwane rueva uwou na, ọ tẹ riẹ kpahe oware nọ o via na. Fikiere makọ taure Pita ọ tẹ te wha ẹme na bru ei ze, Jesu ọ tẹ nọ nọ: “Saimọn, ẹvẹ who roro? Ivie akpọ na abọ amono a je miẹ igho gbe azọhọ? Abọ emọ rai [manikọ] abọ erara?”

Pita ọ tẹ kuyo nọ: “Abọ erara.”

Jesu o te muẹrohọ nọ: “Koyehọ emọ na emuyẹ.” Nọ o rọnọ Ọsẹ Jesu họ Ovie ehrugbakpọ na, Ọnọ a be jọ etẹmpol na gọ na, uzi o gwọlọ nọ Ọmọ Ọghẹnẹ ọ jẹ azọhọ etẹmpol na ha. Jesu ọ tẹ ta nọ: “Rekọ kpere ma se ai ba e ru zoruẹ, kpo obọ abade, fi oghọlọ họ, whọ rehọ eri nọ ọ kake i mu, no who rovie unu riẹ, whọ te ruẹ ugho, rehọ iẹe, whọ rọ kẹ ae re o jọ ẹkẹ mẹ gbe ọra.”

Okenọ ilele na a kokohọ nọ a zihe no Kapaniọm ze no, ẹsejọhọ eva uwou Pita, a tẹ nọ nọ: “Ono họ ọnọ ọmaero eva uvie odhiwu?” Jesu ọ riẹ oware nọ o wha onọ rai na ze, keme ọ riẹ oware nọ o jọ udevie rai via okenọ a jọ emu riẹ nọ a je zihe no Sisaria Filipai ze. Fikiere ọ tẹ nọ nọ: “Eme wha jẹ ta eva obọ edhere?” Avọ omovuọ, ilele na a te fibo, keme a jẹ jọ udevie rai vro kpahe ohwo nọ ọ te mae rro.

Nọ Jesu o wuhrẹ ai te enwene ikpe esa no na, kọ u re gbunu inọ ilele na a wo oghẹrẹ avro otiọye na? Whaọ, u dhesẹ epanọ sebaẹgba ohwo-akpọ o ga te, jegbe egagọ nọ a jọ yọrọ ohwo. Egagọ ahwo Ju onọ a jọ yọrọ ilele na o re fiẹgba họ ọkwa evaọ iruẹru rai kpobi. Ofariẹ, ẹsejọhọ Pita, fikinọ Jesu ọ yeyaa kẹe nọ o ti wo ‘isiavẹ’ Uvie na, o te bi ru oma ororo. Ẹsejọhọ Jemis avọ Jọn a wo oghẹrẹ iroro evo na keme a wo aruoriwo nọ a rọ ruẹ ẹrẹriẹ Jesu.

Oghẹrẹ nọ o rọ kpobi, Jesu o te ru odhesẹvia ọjaja jọ avọ omodawọ re o fiobọhọ kpọ uruemu rai vi. O te se ọmaha jọ, rehọ iẹe dikihẹ udevie rai, gbalọ iẹe, ọ tẹ ta nọ: “Wha gbe kurẹriẹ ze wọhọ emaha ha, wha sae ruọ eva uvie odhiwu vievie he. Ohwo nọ ọ rẹ rọ oma kpotọ wọhọ [ọmaha] ọnana, ọye họ ọnọ ọmaero eva uvie odhiwu. Ohwo nọ ọ rehọ ọmaha otiọna eva odẹ mẹ, yọ ọ rehọ omẹ.”

Ẹvẹ onana o rọ edhere igbunu te nọ ọ rọ kpọ ilele riẹ vi! Orọnikọ Jesu o muofu kẹ ai je se ai nọ a bi ru oma ororo, avọ uvo-uthei, hayo isiuru-ọkwa ha. Ijo, rekọ o dhesẹ ewuhrẹ ọkpọvio riẹ ẹkwoma efihiruo oriruo emaha eboba, enọ i wo uruemu omurokpotọ jẹ kare isiuru-ọkwa gbe enọ i wo iroro ọkwa okpehru evaọ udevie rai hi. Fikiere Jesu o bi dhesẹ inọ u fo re ilele riẹ a wo ekwakwa enana nọ i re dhesẹ emaha omurokpotọ via na. Wọhọ epanọ Jesu o ku rie họ: “Ọnọ ọ mae kawo kpobi udevie rai ọye họ ọnọ ọ mae ro.” Matiu 17:22-27; 18:1-5; Mak 9:30-37; Luk 9:43-48.

▪ Nọ a je zihe no Kapaniọm ze, didi uwuhrẹ Jesu ọ wariẹ, kọ ẹvẹ a jẹ riẹ rehọ?

▪ Fikieme o gbẹ gba Jesu họ họ re ọ hwosa azọhọ etẹmpol na, rekọ fikieme ọ jẹ hwae?

▪ Eme o wọhọ nọ u fiba avro ilele na, kọ ẹvẹ Jesu ọ rọ kpọ ai vi?