Uzou Avọ 74

Ohrẹ kẹ Mata, gbe Uthubro Kpahe Olẹ

EVAỌ etoke odibọgba Jesu evaọ Judia, ọ tẹ rueva iwhre Bẹtani. Etenẹ Mata, Meri, avọ oniọvo rai Lazarọs a be rria. Ẹsejọhọ Jesu ọ kake nyaku imasa enana no evaọ odibọgba riẹ yọ fikiere o zihe ruọ ogbẹnyusu ọkpekpe rai no. Oghẹrẹ nọ o rọ kpobi, Jesu o kpohọ uwou Mata yọ o dede i rie rehọ.

Mata ọ rọ ọwhọwhọ re ọ rehọ eware nọ e mai woma kpobi ghọ Jesu. Evaọ uzẹme, o rọ ọghọ ologbo re Mesaya nọ a yaa na ọ kpahe uwou ohwo! Fikiere Mata o te muọ okpemu họ ethere jẹ be ruẹrẹ eware buobu efa họ re iweze Jesu o ruẹse jọ orọ omawere gbe omosasọ.

Evaọ abọdekọ riẹ, oniọvo Mata, Meri, ọ keria aro Jesu be gaviezọ kẹe. U ri kri hi na, Mata ọ tẹ nyaze ọ tẹ ta kẹ Jesu nọ: “Olori, whọ gbẹ daezọ nọ oniọvo ọmọtẹ mẹ ọ se omẹ ọvo ba iruo ẹbẹ o there? Ta kẹe i re o ti fiobọhọ kẹ omẹ.”

Rekọ Jesu ọ ta ẹme ọvo kẹ Meri hi. Ukpoye, ọ tẹ kẹ Mata ohrẹ inọ ọ be ruawa hrọ kpahe eware iwo. Ọ whọku ei avọ ẹwo anọ: “Mata, Mata, whọ be ruawa, lahiẹ oma eware buobu; oware ovo u fo ewo.” Jesu ọ be ta nọ u du fo ho re a raha oke buobu ruẹrẹ oghoghẹrẹ emuore buobu fihọ. Umutho jọ ọvo hayo oghẹrẹ emuore ọvo dede u te.

Iroro Mata e rọ ziezi; ọ gwọlọ nọ ọ rẹ ghọ ọrara riẹ ziezi. Ghele na, ẹkwoma oma nọ ọ rọ kẹ ekwakwa iwo hrọ, uvẹ nọ ọ rẹ rọ rehọ uthubro no obọ Ọmọ Ọghẹnẹ dẹẹ ze u te bi vru mi ei! Fikiere Jesu o te ku ei họ nọ: “Meri ọ ha abọ owoma no, nọ a rẹ sai ti mi ei hi.”

Uwhremu na, evaọ okiọfa, olele jọ ọ tẹ nọ Jesu nọ: ‘Olori, wuhrẹ omai epanọ ma rẹ lẹ wọhọ epanọ Jọn o wuhrẹ ilele riẹ na.’ Ẹsejọhọ olele ọnana ọ jariẹ hẹ ole ukpe ọvo gbe ubro nọ o vrẹ no okenọ Jesu ọ rehọ olẹ oriruo na kẹ evaọ Ovuẹ obọ Ugbehru riẹ. Fikiere Jesu ọ tẹ wariẹ ithubro riẹ rekọ ọ tẹ kẹ ọtadhesẹ jọ nọ u dhesẹ ẹgwọlọ nọ a re ro thihakọ evaọ olẹ.

Jesu o muhọ nọ: “Whai ọvẹ o re wo ọzọ re ọ nyabru ei udevieaso, ọ rẹ ta kẹe nọ, ‘Ọzọ, momo ikulu esa kẹ omẹ; keme ọzọ mẹ jọ ọ kpare erẹ bru omẹ ze, me gbe wo oware nọ me re fihọ aro riẹ hẹ; o re ti yo nọ obọ uwou tha nọ, ‘Whọ lahiẹ omẹ hẹ; a wuhu ethẹ [no], mẹ avọ emọ mẹ a gbẹrọ ehwa; mẹ rẹ sae kparoma kẹ owhẹ oware ovo ho’? Mẹ ta kẹ owhai, makọ ọ hẹ rọ epa ọzọ riẹ rọ kẹe he, rekọ fiki uye riẹ ọ rẹ kparoma ọ vẹ [kẹe] utho nọ ọ guọlọ.”

Orọnikọ Jesu ọ be rehọ ẹwawọ ọnana dhesẹ nọ Jihova Ọghẹnẹ ọ rẹ kpẹlẹ obọ re ọ gaviezọ kẹ ayare mai hi, wọhọ epanọ ogbẹnyusu na ọ jọ evaọ ikuigbe na. Ijo, rekọ o bi dhesẹ inọ otẹrọnọ ogbẹnyusu nọ u no eva ze he ọ rẹ kparoma fiki ayare nọ a ruabọhọ, ẹvẹ Ọsẹ oyoyou obọ odhiwu mai o re ru te! Fikiere Jesu ọ tẹ taharo nọ: “Mẹ ta kẹ owhai, yare, a rẹ te kẹ owhai; guọlọ wha rẹ te ruẹ; kporo, a reti rovie kẹ owhai, keme ọnọ ọ yare kpobi, o [re] wo; ọnọ ọ guọlọ ọ ruẹ; ọnọ o kporo a reti rovie kẹe.”

Kẹsena Jesu ọ tẹ t’ẹme kpahe esẹ ahwo-akpọ enọ e gba ha, nọ e vọ avọ emuemu, ta nọ: “Whai ọvẹ ọ rọ ọsẹ, nọ ọmọzae riẹ ọ rẹ te yare eri, kọ ọ rẹ kẹe oriọvọ rọ eri; hayo ọ tẹ yare iẹ eke, kọ ọ rẹ kẹe akpakpasimagha? Whai enọ i yoma wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te re?” Evaọ uzẹme, ẹvẹ uduotahawọ nọ Jesu ọ kẹ u woma te re ma ruabọhọ olẹ. Luk 10:38–11:13.

▪ Fikieme Mata ọ jẹ lahiẹ oma t’ere evaọ oma ruẹrẹhọ kẹ Jesu?

▪ Eme Meri o ru, kọ fikieme Jesu o je jiri ei viukpọ Mata?

▪ Eme o wọ Jesu re ọ wariẹ ithubro riẹ kpahe olẹ?

▪ Ẹvẹ Jesu o ro dhesẹ ẹgwọlọ nọ a rẹ rọ ruabọhọ olẹ?