Uzou Avọ 90

Ẹruore Ẹkparomatha Na

UWHREMU na Jesu ọ tẹ nyate ughe Bẹtani, iwhre nọ ọ rọ ole ikilomita esa ro no Jerusalẹm. U te unuedẹ jọ no anwo nọ Lazarọs o ro whu nọ a ro ki ei no. Inievo ivẹ riẹ Meri avọ Mata a gbẹ rọ uweri, yọ ahwo buobu a ziọ evaọ uwou na ti whrehe ai.

Nọ a gbẹ rọ uweri na, ohwo jọ ọ tẹ vuẹ Mata inọ Jesu ọ rọ edhere. Fikiere ọ tẹ ruọ otafe o te siawọ bru ei, ẹsejọhọ ababọ ẹtakẹ oniọvo riẹ. Nọ o te Jesu oma, Mata ọ tẹ wariẹ eme nọ e wọhọ nọ avọ oniọvo riẹ a ta unuẹse buobu no na evaọ edẹ ene nọ u kpo: “Whọ hẹ jọ etenẹ, oniọvo mẹ o he whu hu.”

Rekọ Mata o te dhesẹ ẹruore, ta nọ Jesu ọ sai gbe ru oware jọ kẹ oniọvo riẹ ghele. Ọ ta nọ: “Mẹ riẹ nọ, makọ enẹna, koware koware nọ whọ yare Ọghẹnẹ, Ọghẹnẹ ọ rẹ rehọ iẹe kẹ owhẹ.”

Jesu ọ tẹ yeyaa nọ: “Oniọvo ra ọ [rẹ] te kparoma.”

Mata o wo otoriẹ eme Jesu wọhọ nọ ọ be ta kpahe ẹkparomatha obaro, onọ Abraham gbe idibo ẹrọwọ Ọghẹnẹ efa a be hẹrẹ na. Fikiere ọ tẹ kuyo nọ: “Mẹ riẹ nọ ọ rẹ te kparoma eva ẹkparomatha ẹdẹ urere [na].”

Rekọ Jesu ọ tẹ kẹ ẹruore nọ o rẹ kẹ omosasọ okioke yena, ta nọ: “Mẹ họ ẹkparomatha gbe uzuazọ.” Ọ tẹ kareghẹhọ Mata nnọ Ọghẹnẹ ọ kẹ riẹ ogaga kpahe uwhu, anọ: “Ọ nọ ọ rọwo omẹ makọ o whu no, ọ rẹ te zọ; kohwo kohwo nọ ọ rọ nọ ọ rọwo omẹ, o re ti whuẹ hẹ.”

Orọnikọ Jesu ọ be ta kẹ Mata inọ ahwo ẹrọwọ evaọ oke oyena a re whu vievie he he. Ijo, rekọ otofa ẹme riẹ na họ ẹrọwọ nọ a re fihọ iẹe o sai su kpohọ uzuazọ ebẹdẹ bẹdẹ. Ahwo buobu a te reawere uzuazọ utioye na fikinọ a te kpare ai ze evaọ edẹ urere na. Rekọ amọfa nọ i wo ẹrọwọ a te zọ no urere eyero-akpọ ọnana evaọ otọakpọ, yọ rọ kẹ ahwo nana eme Jesu i re ti wo iruo ovavo kẹ ai. A gbe ti whu vievie he! Nọ ọ ta eme iwoma riẹ na no, Jesu ọ tẹ nọ Mata nọ, “Kọ whọ rọwo onana?”—NW.

Ọ tẹ kuyo nọ: “Ere, Olori; mẹ rọwo nọ, whẹ họ Kristi na, ọmọ Ọghẹnẹ, ọnọ ọ be ze akpọ na.”

Fikiere Mata ọ tẹ họrọ vrẹ re o se oniọvo riẹ, ọ tẹ lẹliẹ ta kẹe nọ: “Olori ọ ze ino, o bi se owhẹ.” Idudhe na Meri o te no uwou na. Okenọ amọfa a rue riẹ, a te lele iei, bi roro nọ o bi kpohọ oria uki na.

Nọ o te Jesu oma, Meri o te kie fihọ aro riẹ be viẹ. Ọ tẹ ta nọ: “Olori, whọ hẹ jọ etenẹ, oniọvo mẹ ọ hai whu hu.” U duobọ te Jesu gaga nọ ọ ruẹ nọ te Meri te ogbotu nọ e rọ kugbei a be viẹ. Ọ tẹ nọ nọ: “Bovẹ wha wọ riẹ fihọ?”

A te yo nọ: “Olori, nyaze whọ ruẹ.”

Jesu omariẹ ọ tẹ va ruọ oviẹ, o tẹ whai ze nọ ahwo Ju nọ a rọ etẹe a rọ ta nọ: “Ri epanọ o you rie te!”

Ahwo jọ a kareghẹhọ nọ Jesu, evaọ etoke Ehaa Uwou-Udhu na emerae jọ nọ e vrẹ, o siwi ọmoha jọ nọ a yẹ tuaro, a tẹ nọ nọ: “Kọ ohwo nana nọ o rovie aro ọnọ o tuaro no na, ọ gbẹ sai [ru] ohwo ọnana ọ seba ewhuo?” Jọn 5:21; 6:40; 9:1-7; 11:17-37.

▪ Okevẹ Jesu o ro te Bẹtani, kọ didi eyero o jọ obei?

▪ Eme Mata ọ rọ ẹro so nọ ọ rọ rọwo ẹkparomatha na?

▪ Ẹvẹ uwhu Lazarọs u kpomahọ Jesu te?