“Ẹkparomatha gbe Uzuazọ Na”

Nọ Jesu ọ nya no Pẹria no, o te ti te ughe Bẹtani, iwhre nọ o rehọ emaele ivẹ thabọ no Jerusalẹm nọ o rrọ ofẹ ovatha-ọre riẹ. Meri avọ Mata a bi weri Lazarọs, oniọvo rai nọ o whu emedẹ jọ nọ i kpemu. Ahwo buobu a nyaze re a sasa ae oma.

Kẹsena ohwo jọ ọ tẹ ta kẹ Mata nọ Jesu ọ be nyaze. Mata ọ tẹ nwane kpama ovovẹrẹ nyai zere iei. Mata ọ tẹ vuẹ Jesu oware nọ o rrọ ọyomariẹ avọ oniọvo riẹ iroro anwọ edẹ ene, inọ: “Olori, whọ hae jọ etenẹ, oniọvo mẹ ọ hai whu hu.” Ghele na, orọnikọ Mata ọ kare ẹruore he. Ọ ta nọ: “Mẹ riẹ nọ oware kpobi nọ whọ yare mi Ọghẹnẹ, ọ rẹ rehọ iẹe kẹ owhẹ.” (Jọn 11:21, 22) O roro nọ ẹsejọhọ Jesu ọ sai gbe fiobọhọ kẹ oniọvo riẹ.

Jesu ọ ta kẹe nọ: “Oniọvo ra ọ te kparoma ze.” Mata o je roro nọ Jesu ọ be ta kpahe okenọ a te kpare ahwo no uwhu ze evaọ obaro, ẹruore nọ Abraham avọ amọfa a wo. Kẹsena ọ tẹ ta epanọ oyena u mu rie ẹro te inọ: “Mẹ riẹ nọ ọ te kparoma ze evaọ ẹkparomatha ẹdẹ urere na.”—Jọn 11:23, 24.

Kọ Jesu ọ sai gine gbe ru oware jọ obọnana ro fiobọhọ kẹ ae wo omosasọ? Jesu ọ kareghẹhọ Mata inọ Ọghẹnẹ ọ kẹ riẹ ogaga nọ ọ sae rọ kpare ohwo no uwhu ze, inọ: “Ọnọ o fi ẹrọwọ họ omẹ, ọ tẹ maki whu dede, ọ te ziọ uzuazọ; yọ ohwo kpobi nọ ọ rrọ uzuazọ nọ o fi ẹrọwọ họ omẹ o ti whu vievie he.”—Jọn 11:25, 26.

Orọnikọ Jesu ọ be ta nọ ilele riẹ nọ e jọ uzuazọ oke yena a ti whu vievie he he. Makọ Jesu dede o ti whu, wọhọ epanọ ọ vuẹ ikọ riẹ. (Matiu 16:21; 17:22, 23) Ẹme nọ Jesu ọ be ta na họ ohwo nọ o fi ẹrọwọ họ iẹe o re wo uzuazọ ebẹdẹ bẹdẹ. A te kpare ahwo buobu ziọ uzuazọ yena. Rekọ efa nọ i wo ẹrọwọ nọ e gbẹ rrọ uzuazọ evaọ urere uyero-akpọ nana a ti whu hu. Rekọ epanọ o rrọ kpobi kẹhẹ, ohwo kpobi nọ o fi ẹrọwọ họ Jesu o re whu uwhu ebẹdẹ bẹdẹ hẹ.

Kọ Jesu nọ ọ ta obọnana nọ, “Mẹ họ ẹkparomatha gbe uzuazọ na,” ọ sai ti fiobọhọ kẹ Lazarọs nọ o whu te edẹ jọ no na? Jesu ọ nọ Mata nọ: “Kọ whọ rọwo onana?” Mata ọ tẹ kuyo nọ: “Ee, Olori, mẹ rọwo nọ whẹ họ Kristi na Ọmọ Ọghẹnẹ, ọnọ a ta nọ ọ be nyaze akpọ na.” Mata o wo ẹrọwọ inọ Jesu o ti ru oware jọ evaọ ẹdẹ nana, fikiere ọ tẹ nwane dhẹ ovovẹrẹ nyae lẹlẹ ta kẹ Meri oniọvo riẹ nọ: “Owuhrẹ na ọ nyaze no yọ o bi se owhẹ.” (Jọn 11:25-28) Kẹsena Meri ọ tẹ nya ruọ otafe, ahwo a te bi lele iei keme a roro nọ o bi kpobọ uki Lazarọs.

Rekọ Jesu họ ohwo nọ Meri ọ be nya bru. Nọ o te oria nọ Jesu ọ rrọ o te kigwẹ fihọ aro riẹ jẹ wariẹ ta ẹme ọvona nọ oniọvo riẹ ọ ta ẹsiẹ na, inọ: “Olori, whọ hae jọ etenẹ, oniọvo mẹ ọ hai whu hu.” Nọ Jesu ọ ruẹ Meri gbe ogbotu na nọ a be viẹ, o te dimẹ o tẹ kẹe uye gaga,irui-oviẹ i te noi aro ze. Onana u duobọte ahwo nọ a jọ etẹe udu gaga. Rekọ ahwo jọ a tẹ be nọ inọ: ‘Otẹrọnọ Jesu o rovie ibiaro ọzae nọ o tuaro na ọ gbẹ hae sai ru re ọzae nana ọ seba ewhu?’—Jọn 11:32, 37.