Uzou Avọ 76

Emuọriọ Kugbe Ohwo Farisi

NỌ JESU ọ kuyo kẹ otu ewọsuọ nọ e be vro ehri ogaga riẹ nọ o ro siwi ọzae nọ o dienu na no, ohwo Farisi jọ o te zizie iei kpohọ emuọriọ. Re a tẹ re emu, otu Farisi a rẹ kake wozẹ abọ rai te ighilabọ. A re ru onana re a tẹ te re emu gbe okenọ a re emu no makọ evaọ udevie emuore dede. Dede nọ uruemu na o raha uzi Ọghẹnẹ nọ a kere fihọ otọ họ, o nya vrẹ oware nọ Ọghẹnẹ ọ gwọlọ kẹ ẹfuọ.

Nọ Jesu o ru uruemu onana ha, u te gbe ohwo nọ o zizie i rie unu. Dede nọ ọ bọunu tae via ha, Jesu o muẹrohọ iẹe ọ tẹ ta nọ: “Whaọ whai otu e Farisi wha rẹ wozẹ uke egho gbe udo; rekọ eva rai ofruriọ gbe umuomu e vọ rae. Whai igheghẹ! Ọnọ ọ ma uke [ọye ọ ma eva re, ogbẹrọ ere]?”

Fikiere Jesu ọ tẹ rọ enẹ rovie eviẹhọ otu Farisi na via enọ e rẹ rehọ uruemu ona wozẹ abọ rai rekọ a rẹ wozẹ idu rai no emuemu hu. Ọ tẹ hrẹ rae nọ: “Rekọ wha ru ọghọ itieware nọ wha wo; ri, eware kpobi e fo kẹ owhai.” U fo re udu uyoyou o wọ ai kẹ okẹ rai, orọnikọ re a rehọ ẹrẹreokie eviẹhọ rai viẹ ahwo họ họ.

Jesu ọ tẹ taharo nọ: ‘Uye u te owhai, otu e Farisi! Keme wha be jẹ azọhọ abọvo abakpe egbọrọge, gbe olugbo gbe ebe-eriọ kpobi, rekọ wha te kiukeku emamọ oziẹ-obro avọ uyoyou Ọghẹnẹ; rekọ enana ifori nọ wha he ru, rekọ wha hẹ se edekọ ba eruo gbe he.’ Uzi Ọghẹnẹ kẹ Izrẹl o gwọlọ ẹhwa abọvo abakpe ekakọ idhu rai. Egbọrọge gbe olugbo yọ emebe esese nọ a re ro there emu. Otu Farisi na a rẹ nabe roma totọ hwosa ekakọ esese enana, rekọ Jesu o brukpe ai fikinọ a bi gbabọkẹ ẹgwọlọ nọ e mai wuzou erọ edhesẹ uyoyou, ẹwo, gbe omurokpotọ.

Gbe bi brukpe ai, Jesu ọ tẹ ta nọ: “Uye u te owhai otu e Farisi, keme wha rẹ guọlọ ekaba nọ i wuzou eva uwou-egagọ, gbe iyere eva eria eki. Uye u te owhai! Keme wha wọhọ iki nọ e via ha, ahwo nọ a be nya ehru rai a riẹ hẹ.” (NW ) Egbegbe rai ọ roma via ha. Egagọ otu Farisi na o re dhesẹ oma via evaọ okafe, rekọ a jọ obeva gbo no! Eviẹhọ ọvo e vọ riẹ.

Be gaviezọ kẹ obrukpe otiọye na, elọya jọ, omọvo enọ e riẹ Uzi Ọghẹnẹ lafi, o te gu inoma nọ: ‘Owuhrẹ, whọ be ta eme enana rọ l’omai eka.’

Jesu o te je brukpe ahwo nana nọ e riẹ Uzi na lafi na re, ta nọ: ‘Uye u te owhai re, eriẹ-izi! Keme wha rẹ rehọ ewha egbẹgbẹdẹ ethọthọhọ kẹ ahwo wha, yọ whai omarai wha rẹ rọ uziobọ ovo rai te ai hi. Uye u te owhai keme wha bọ iki eruẹaro, nọ esẹ rai i kpei.’

Ewha nọ Jesu ọ fodẹ na họ izi ẹmeunu, rekọ elọya na e rẹ kpare uzi na ọvuọvo re u dina vori ahwo na oma ha. Jesu o dhesẹ via inọ a tubẹ tamu kpe eruẹaro na dede, ọ tẹ vẹvẹ unu nọ: “Azẹ eruẹaro kpobi, nọ ihwẹ no otọhọ otọ akpọ ze, a [te] jọ obọ oge ọnana guọlọ ae, no umuo azẹ Ebẹle rite umuo azẹ Zakaraya, ọnọ a kpe udevie agbada avọ aruẹri. Ere, mẹ takẹ owhai, a rẹ [te] jọ obọ oge ọnana guọlọ iẹe.”

Akpọ ahwo nọ a ti wo esiwo o muhọ evaọ okenọ Adamu avọ Ivi a muọ emọ họ eyẹ; fikiere, Ebẹle ọ rria eva etoke “otọhọ otọ akpọ ze.” Lele ekpe ọhaha Zekaraya, egbaẹmo Siria a tẹ raha Juda. Rekọ Jesu ọ tẹ ruẹaro ọraha nọ o mai yoma ọrọ oge riẹ fiki emuemu ologbo riẹ. Ọraha ọnana ọ roma via ikpe 38 evaọ obaro, evaọ 70 C.E.

Be nyaharo evaọ obrukpe riẹ, Jesu ọ tẹ ta nọ: “Uye u te owhai eriẹ-izi! Keme wha tọlọ usiavẹ eriariẹ vrẹ; whai omarai wha be rueva ha, enọ e be gwọlọ ruẹe wha be whahe ae.” (NW ) O rọ owha-iruo ahwo nọ e riẹ Uzi na lafi na re a ru Ẹme Ọghẹnẹ vevẹ kẹ ahwo na, re a rovie otofa riẹ. Rekọ a ru ere he a tẹ tubẹ rehọ uvẹ nọ a re ro wo otoriẹ riẹ mi ai.

Eva e tẹ dha otu Farisi gbe enọ e riẹ izi na kpahe Jesu fikinọ o brukpe ai. Nọ o no uwou na no, a te mu ei họ ẹwọso gaga, a tẹ wariẹ iẹe họ jẹ be rehọ enọ fae ova. A be gwọlọ ru ei re ọ ta ẹme nọ a re ro mu ei. Luk 11:37-54; Iziewariẹ 14:22; Maeka 6:8; 2 Iruẹru-Ivie 24:20-25.

▪ Fikieme Jesu o ro brukpe otu Farisi gbe enọ e riẹ Uzi na lafi na?

▪ Didi owha-iruo elọya na a wo kẹ ahwo na?

▪ Okevẹ “otọhọ otọ akpọ” na u ro muhọ?