Uzou Avọ 78

Ruẹrẹ Oma Kpahe!

NỌ Ọ vẹvẹ ogbotu na unu kpahe eware amọfa e gwọlọ no, jẹ vẹvẹ ilele riẹ unu kpahe udu nọ a re fihọ eware iwo ga hrọ no, Jesu ọ tẹ tuduhọ nọ: “Wha dhẹ-ozọ họ, uthuru okakao, keme o were Ọsẹ rai nọ ọrẹ rehọ uvie na kẹ owhai.” Fikiere o te dhesẹ nọ umutho ahwo jọ gheghe ọvo (enọ a vuhumu uwhremu na wọhọ ahwo 144,000) ae e rẹ te jọ Uvie obọ odhiwu. Ahwo buobu enọ i ti wo uzuazọ ebẹdẹ bẹdẹ a te jọ otọ Uvie na evaọ otọakpọ.

Ẹvẹ “uvie na” o rọ okẹ igbunu te! Nọ o je dhesẹ oghẹrẹ nọ o rẹ jọ ilele na oma nọ a wo okẹ uvie na, Jesu ọ tẹ tuduhọ ai awọ nọ: “Wha zẹ ekuakua rai, wha kẹ ọghọ ohrọ.” Ẹhẹ, a rẹ rehọ ekwakwa efe rai ro ru amọfa woma evaọ abọ-ẹzi a vẹ rọ ere bọ ‘efe họ obọ odhiwu onọ u re re he.’

Jesu ọ tẹ te kẹ ilele riẹ ohrẹ inọ a ruẹrẹ oma kpahe kẹ ezihetha riẹ. Ọ ta nọ: “Ru re wha si imueku rai ga, gbe ikpẹ rai i [lo via]. Whai oma rai wha jọ wọhọ ahwo nọ a bi rẹro Olori rai nọ o ti zihe no eha orọwo tha, re nọ o je kporo a vẹ nwane rovie kẹ e. Idibo nọ Olori o ti dihọ eroro okenọ ọ nyaze, a wo oghale; uzẹme mẹ ta kẹ owhai, o re ti mu eku riẹ o ve ru ai keria re a re emu, ọ vẹ te gba odibo kẹ ae.”

Evaọ ọtadhesẹ ọnana, oma ruẹrẹ kpahe idibo na eva oke ezihetha olori rai na u dhesẹ oma via evaọ iwu ithethei rai nọ a si kpehru jẹ gba imueku rai jẹ be rẹro te iruo rai rite aso evaọ elo ikpẹ nọ ewhri ọ vọ eva. Jesu ọ ta nọ: ‘Otẹrọnọ olori na o kpozi evaọ ohẹrẹ-oke avọ ivẹ [no ole izii evaọ owọwọ rite udeviaso], o tẹ make rọ ohẹrẹ-oke avọ esa [no udeviaso rite ole esa evaọ ohiohiẹ], ọ tẹ rue rai nọ a ruẹrẹ oma họ, a wo oghale!’

Olori na ọ rehọ edhere igbunu hwa idibo na osa. O ru rai keria emẹjẹ o te mu ai odibo họ ẹgba kẹ. O ru rai, orọnikọ wọhọ irigbo ho, rekọ wọhọ egbẹnyusu omurokpotọ. Ẹvẹ osa na o rro te kẹ iruo nọ a ruabọhọ kẹ olori rai evaọ aso na kpobi nọ a be hẹrẹ ezihetha riẹ na! Jesu o te ku ei họ nọ: ‘Wha ruẹrẹ oma kpahe i re; keme okenọ wha roro ho Ọmọ ohwo ọ rẹ te tha.’

Pita ọ tẹ nọ nọ: “Olori, who bru ohare na kẹ omai hayo ahwo kpobi?”

Ukpenọ ọ kuyo na ovavo, Jesu ọ tẹ kẹ ọtadhesẹ ọfa. Ọ nọ nọ: “ ‘Kọ ono họ odibo oruọzewọ avọ areghẹ, nọ, olori riẹ o fihọ nọ o ri uwou riẹ, re oke ute ọ rehọ emu kẹ ae na?’ Odibo nọ olori riẹ ọ rẹ te tha o di e họ ere oruo, o wo oghale. Uzẹme, mẹ ta kẹ owhai, ọ rẹ te rehọ iẹ muẹ uzou eware riẹ kpobi.”

Ababọ avro “olori” na họ Jesu Kristi. “Odibo” na o dikihẹ kẹ “uthuru okakao” ilele na kpobi, yọ ‘ugboma idibo’ na u dhesẹ ẹko ọvo ọnana ọrọ ahwo 144,000 na enọ i wo Uvie obọ odhiwu na, rekọ ẹme ọnana u dhesẹ iruo rai wọhọ omomọvo. “Eware” nọ a rehọ odibo ẹrọwọ na mu re ọ sẹro rai na họ isiuru uvie olori na eva otọakpọ, enọ i kugbe ahwo otọakpọ Uvie na.

Be nyaharo evaọ ọtadhesẹ na, Jesu o te dhesẹ nọ orọnikọ ahwo odibo ọyena kpobi, hayo ọrigbo ọyena, a ti wo ẹrọwọ họ, ọ ta nọ: “Rekọ odibo ọyena ọ tẹ ta evaọ eva riẹ nọ, ‘Olori mẹ o ti lehie ẹtha; o je mu idibo-emezae gbe idibo-emetẹ họ ekpe, je muhọ ẹriọ, gbe ẹda, gbe udi-umuo, olori odibo ọyena ọ rẹ te tha ẹdẹ nọ o rẹro riẹ hẹ, . . . ọ vẹ kẹ e uye.”

Jesu o muẹrohọ inọ ẹtha riẹ o wha etoke ukpokpoma se ahwo Ju na no, keme otu jọ a jẹ iwuhrẹ riẹ rehọ efa a tẹ se ai. Bu vi ikpe esa nọ e vrẹ no, a rọ họe ame, rekọ enẹna ame-ọhọ riẹ fihọ uwhu o bi si kẹle te ekuhọ no, yọ wọhọ epanọ ọ ta: ‘Mẹ rọ awa bẹsenọ u re kuhọ no!’

Nọ ọ kpọ eme enana bru ilele riẹ no, Jesu ọ tẹ wariẹ t’ẹme kẹ ogbotu na. O te weri kẹ eva egaga nọ a be rọ siọ ọjẹrehọ imuẹro ohwo nọ ọ rọ gbe otofa riẹ. O muẹrohọ nọ: “Nọ wha ruẹ ẹgho nọ ọ vaze obọ ukiediwo ọre, wha vẹ nwane ta nọ, ‘Oso ọ be tha’; u ve ghine ru ere. Nọ wha ruẹ ofou nọ ono obọze akpọ ze, wha vẹ ta nọ, ‘Uvo o rẹ te rowa gaga’; o vẹ ghinẹ jọ ere. Whai eviẹwẹ, wha riẹ epanọ ovao akpọ gbe ehru e rọ; kẹvẹ wha gbẹ riẹ epanọ oke onana o rọ họ?” Luk 12:32-59.

▪ Bro ahwo a ru “uthuru okakao” na via, kọ eme a wo?

▪ Ẹvẹ Jesu o ro dhesẹ ẹgwọlọ nọ idibo riẹ a rẹ rọ ruẹrẹ oma kpahe?

▪ Evaọ ọtadhesẹ Jesu, ono họ “olori” na, “odibo” na, ‘ugboma idibo’ na, gbe “eware” na?