Jọ Orieyero Nọ A re Fievahọ na Ọ Ruẹrẹ Oma Kpahe

Jesu o ru rie vẹ kẹ ahwo nọ a jẹ gaviezọ kẹe na nọ “uthuru okakao” na ọvo ọ te ruọ Uvie odhiwu. (Luk 12:32) Rekọ re a wo uvẹ obọ odhiwu nana yọ oware nọ a re rri jeve jeve he. Jesu ọ tubẹ ta epanọ u wuzou te re ohwo o wo emamọ uruemu re ọ sae ruọ Uvie na.

Oyejabọ nọ Jesu ọ rọ kẹ ilele riẹ ohrẹ inọ a rẹ ruẹrẹ oma kpahe kẹ ezihetha riẹ. Ọ ta nọ: “Wha ku iwu rai họ jẹ ruẹrẹ oma kpahe, jọ ikpẹ rai e hai lo, wha jọ wọhọ erigbo nọ e be hẹrẹ olori rai nọ o kpohọ ehaa orọo, re nọ ọ tẹ nyaze je kporo ẹthẹ, a vẹ nwani rovie kẹe. Eva e were erigbo yena nọ Olori rai ọ nyaze di họ bi rou!”—Luk 12:35-37.

O rrọ lọlọhọ kẹ ilele na re a wo otoriẹ oghẹrẹ uruemu nọ Jesu ọ be ta kpahe na. Erigbo nọ ọ fodẹ na a ruẹrẹ oma kpahe jẹ be hẹrẹ olori rai. Jesu o ru ẹme na vẹ nọ: “Otẹrọnọ [olori na] ọ nyaze evaọ etoke iroi avọ ivẹ [ighọjọ izii rite ighọjọ ikpegbivẹ aso], hayo makọ ọrọ avọ esa [ighọjọ ikpegbivẹ aso rite ighọjọ esa ohiohiẹ] o je di ae họ nọ a ruẹrẹ oma kpahe, eva e rẹ were ai!”—Luk 12:38.

Orọnikọ onana yọ ohrẹ orọ epanọ odibo hayo oruiruo ọ rẹ rọ jọ ọgba iruo ho. Whọ rẹ ruẹ oyena vevẹ nọ who te rri oghẹrẹ nọ Jesu, Ọmọ ohwo, o ro fi oma riẹ họ ọtadhesẹ na. Ọ ta kẹ ilele riẹ nọ: “Whai omarai wha ruẹrẹ oma kpahe re keme evaọ auwa nọ wha roro ho oye Ọmọ ohwo ọ te rọ nyaze.” (Luk 12:40) Koyehọ Jesu ọ te nyaze evaọ obaro. Ọ gwọlọ nọ ilele riẹ, maero kọ “uthuru okakao” na a rẹ ruẹrẹ oma kpahe.

Pita ọ gwọlọ nọ o re wo otoriẹ ẹme Jesu na ziezi, fikiere ọ tẹ nọe nọ: “Olori, mai whọ be rehọ ọtadhesẹ nana ta ẹme kẹ manikọ te ahwo kpobi re?” Jesu ọ kuyọ onọ na ovavo ho, ukpoye ọ tẹ rọ ọtadhesẹ ọfa nọ ọ wọhọ ọrọ ọsosuọ na ta ẹme, inọ: “Ginọ ono họ orieyero nọ a re fievahọ na, ọnọ o wo areghẹ, ọnọ Olori riẹ o ro mu inọ ọ rẹrote idibo uwou riẹ, re ọ rehọ emu kẹ ae evaọ ẹruoke? Eva e were ọrigbo yena otẹrọnọ olori riẹ ọ nyaze di ei họ ere oruo! Uzẹme mẹ be ta kẹ owhai, ọ te rehọ iẹe mu ọnọ ọ rẹ rẹrote eyero riẹ kpobi.”—Luk 12:41-44.

Evaọ ọtadhesẹ ọsosuọ na, o rrọ vevẹ nọ Jesu nọ ọ rrọ Ọmọ ohwo na họ “olori” na. “Orieyero nọ a re fievahọ na” yọ ahwo nọ a rrọ abọjọ “uthuru okakao” nọ a te rọ Uvie na kẹ. (Luk 12:32) Ẹme nọ Jesu ọ be ta na họ ahwo jọ evaọ utu nana a te kẹ “idibo uwou riẹ” ‘emu evaọ ẹruoke.’ Fikiere Pita avọ ilele efa nọ Jesu o bi wuhrẹ na a vuhumu nọ oke o be tha evaọ obaro nọ Ọmọ ohwo ọ te rọ nyaze. Yọ evaọ oke yena, ọruẹrẹfihotọ ọ te jariẹ nọ a te rọ rehọ ẹme Ọghẹnẹ ko ilele Jesu, koyehọ “idibo uwou” Olori na.

Jesu ọ tẹ wariẹ rọ oghẹrẹ ofa dhesẹ oware nọ ilele riẹ a rẹ rọ ruẹrẹ oma kpahe je dhesẹ uruemu nọ u fo. Onana o roja keme a gbẹ yọroma ha, a sai gbabọkẹ eware jọ je tube mu inievo nọ e rrọ ukoko na họ ẹwọso dede. Jesu ọ ta nọ: “Rekọ otẹrọnọ ọrigbo yena ọ rẹ jọ udu riẹ ta nọ, ‘Olori mẹ o lehie ẹnyaze no,’ o je muọ idibo ezae gbe erọ eyae na họ ekpe, jẹ be re jẹ da, jẹ da vrẹ oma, olori ọrigbo yena ọ te nyaze evaọ ẹdẹ nọ o bi rẹro riẹ hẹ gbe auwa nọ ọ riẹ hẹ, ọ vẹ te kẹe uye nọ o mae ga je fi ei họ kugbe enọ i yoẹme he.”—Luk 12:45, 46.

Jesu ọ ta nọ ọ nyaze “ti tu erae họ otọakpọ na.” Yọ ere o gine ru keme eware nọ ọ ta kpahe yọ enọ e rẹ sae wha avro ologbo ze jẹ tubẹ raha iwuhrẹ erue no riẹriẹriẹ wọhọ epaọ erae nọ a rọ mahe oware. Onana o rẹ sai tube fi ohẹriẹ họ udevie ahwo nọ u fo nọ a re wo okugbe, “ọsẹ ọ te wọso ọmọzae riẹ, ọmọzae ọ te wọso ọsẹ riẹ, oni ọ te wọso ọmọtẹ riẹ, ọmọtẹ ọ te wọso oni riẹ, oniọrọo ọ te wọso aye ọmọ riẹ, aye ọ te wọso oniọrọo riẹ.”—Luk 12:49, 53.

Ilele riẹ eme nana e mai kiekpahe. Kẹsena Jesu ọ tẹ rẹriẹ ovao ku ogbotu na. Ibuobu rai a rọwo nọ Jesu họ Mesaya na ha, dede nọ a ruẹ eware buobu nọ e hai ru ai rọwo, fikiere Jesu ọ tẹ ta kẹ ae nọ: “Nọ wha tẹ ruẹ ehru nọ o bi evaọ obọ ukiediwo-ọre, wha rẹ nwane ta nọ, ‘Okposo ọ be te rrọ,’ yọ ere o rẹ via. Nọ wha tẹ ruẹ ofou nọ o bi fou no obọze ovatha-ọre ze, wha rẹ ta nọ, ‘Ẹrrorro ọ te jọ gaga,’ yọ ere o rẹ via. Whai eviẹwẹ, wha riẹ oghẹrẹ nọ wha rẹ rọ kiẹ otọ epanọ otọakpọ gbe ovao ehru e rrọ, kọ ẹvẹ wha gbẹ rọ riẹ epanọ wha rẹ rọ kiẹ otọ uzedhe oke nana ha?” (Luk 12:54-56) O rrọ vevẹ inọ ahwo nana a ruẹrẹ oma kpahe vievie he.