Uzou Avọ 79

Orẹwho nọ U Vru, Rekọ Aikpobi Hi

U KRI hi nọ Jesu o lele ahwo nọ a koko họ otafe uwou ohwo Farisi na t’ẹme no, ahwo jọ a tẹ ta “ẹme ahwo Galili kẹ e, enọ [ọba ahwo Rom na Pọntiọs] Pailet ọ rehọ azẹ rai gwa kugbe iwẹ rai.” Ẹsejọhọ ahwo Galili enana họ enọ a kpe okenọ idu ahwo Ju a se nọ Pailet ọ rẹ rehọ ugho no ẹkpa etẹmpol na bọ ẹtẹre nọ o rẹ wha ame ziọ Jerusalẹm. Ahwo nọ i bi gbiku eme enana kẹ Jesu na a roro nọ ahwo Galili enana a ruẹ-uye okpẹtu ọnana fiki iruo emuemu rai.

Rekọ, Jesu ọ tẹ kpọ ai vi, nọ ai nọ: “Wha roro nọ ahwo Galili enana erahaizi vi ahwo Galili kpobi, fiki epanọ a ruẹ uye eware enana? Mẹ ta kẹ owhai, Ijo,” ere Jesu ọ kuyo. Ọ tẹ rehọ uvẹ na vẹvẹ ahwo Ju unu nọ: “Wha gbe kuevarẹriẹ hẹ, whai kpobi a re ti vrẹ ere re.”

Be ta haro, Jesu ọ tẹ jẹ kareghẹhọ oware okpẹtu ofa nọ o jọ oyena via, ẹsejọhọ onọ u wo obọ kugbe ebabọ ẹtẹre na re. Ọ nọ nọ: “Hayo ahwo kpogberee, enọ uwou-ukpehru u kie ruru evaọ Siloam, u je kpe ai, wha roro nọ ae mae rọ iru-umuomu vi ahwo kpobi nọ a rọ Jerusalem?” Ijo, Jesu ọ ta nọ orọnikọ fiki eyoma ahwo nana a ro whu hu. Ukpoye, ‘eware ikpregede’ họ enọ e rẹ wha eware okpẹtu itieye na tha. Jesu ọ tẹ wariẹ rehọ uvẹ na vẹvẹ unu nọ: “Rekọ wha gbe kuevarẹriẹ hẹ, whai kpobi a re ti vrẹ ere re.”

Jesu ọ tẹ kẹ ọtadhesẹ jọ nọ u fo, ta nọ: “Ohwo jọ o wo ure ojo nọ ọ kọ họ ọgbọ ekakọ riẹ; ọ tẹ ze guọlọ ubi eva riẹ, ọ ruẹ ovo ho. Ọ tẹ ta kẹ ọruẹrẹ ọgbọ na nọ, ‘Ri, anwọ ikpe esa enana mẹ ze [be] guọlọ ubi evaọ ure ojo nana, mẹ ruẹ ọvo ho. Kie i no; fiki eme o jẹ rehọ otọ gheghe? O te yo kẹ e nọ, ‘Olori, si ẹe ba ukpe onana re, bẹsenọ mẹ rẹ te tọ e, mẹ whẹ ezuzu fihọ iẹ. O tẹ mọ ibi no umuo oyeze yọ u woma; rekọ ogbẹrọ ere he, who re kie i no.’ ”

Jesu ọ daoma vrẹ ikpe esa no re ọ kọ ẹrọwọ họ udevie orẹwho ahwo Ju na. Rekọ ilele udhusoi kakao jọ ọvo họ ibi nọ ẹroyẹ riẹ kpobi ọ mọ. Enẹna, evaọ etoke ukpe avọ ene odibọgba riẹ na, o bi fi ẹgba họ iruo riẹ viere, be rọ edhere ẹwoho tọ jẹ whẹ ezuzu fihọ ure ojo ahwo Ju na ẹkwoma usiuwoma ota avọ ọwhọ je bi wuhrẹ evaọ Judia gbe Pẹrea. Ghele na omodawọ riẹ kpobi ufofe! Orẹwho na o se nọ u re kurẹriẹ fikiere a tẹ rọ edhere ọraha. Okiọkotọ orẹwho na ọvo ọ kuyo.

U kri hi Jesu o te je wuhrẹ evaọ uwou-egagọ evaọ Ẹdijala. Ọ tẹ jọ etẹe ruẹ aye jọ ọnọ, anwọ ikpe 18, fiki idhivẹri nọ i bi kpokpo iei, o zulẹ no. Avọ ohrọ, Jesu ọ tẹ ta kẹe nọ: “Aye, a ra owhẹ nọ oko ra no.” Ọ tẹ rọ obọ kpahe iẹe, idudhe na o te dikihẹ kpọvi, o te muọ Ọghẹnẹ orro họ ẹkẹ.

Rekọ eva e tẹ dha okpohwo uwou-egagọ na. O gu inoma nọ: “Edẹ ezeza e rọ nọ ahwo a je ru iruo; wha nyaze eva edẹ eyena re a siwi owhai, wha nya tha ẹdẹ ẹdijala ha.” Oletu na o te vuhu ogaga Jesu nọ o bi ro siwi mu rekọ o brukpe ahwo na fikinọ a be nyaze kẹ omusiwo evaọ Ẹdijala!

Jesu ọ tẹ kuyo nọ: “Whai eviẹwẹ, kọ ohwo rai ọvuọvo ọ gbẹ re ra eruẹ riẹ hayo eketekete riẹ nọ ifi, o ve su ei e da ame ẹdẹ ẹdijala? Kọ u gbe fo re aye ọnana, ọmọtẹ Abraham nọ Setan ọ gba e, anwọ ikpe kpogberee na, a ra e no ẹgba ọnana ẹdẹ ẹdijala?”

Whaọ, nọ a yo onana, oma o tẹ vo ahwo nọ e be wọso Jesu na. Rekọ ogbotu na a tẹ ghọghọ fiki eware oruaro nọ a ruẹ nọ Jesu o bi ru. Evaọ uyo Jesu ọ tẹ wariẹ etadhesẹ aruọruẹ ivẹ kpahe Uvie Ọghẹnẹ, enọ ọ jọ okọ ta evaọ Abade Galili ole ukpe nọ o vrẹ no. Luk 13:1-21; Ọtausiuwoma Na 9:11; Matiu 13:31-33.

▪ Didi eware okpẹtu a jọ etenẹ fodẹ, kọ didi uwuhrẹ Jesu ọ rehọ no ai ze?

▪ Eme họ otofa ure ojo nọ o mọ họ na, gbe omodawọ nọ a ru re o mọ?

▪ Ẹvẹ okpohwo uwou-egagọ na o ro vuhu ogaga omusiwo Jesu mu, ghele ẹvẹ Jesu o ro dhesẹ eviẹhọ ohwo na via?