Uzou Avọ 105

Emuhọ Ẹdẹ Ọbẹbẹ

OKENỌ Jesu o no Jerusalẹm no evaọ owọwọ Ẹdọvo-Oka, ọ tẹ rọ orọ ukiekpotọ ovatha-ọre Ugbehru Olivi zihe kpohọ Bẹtani. Edẹ ivẹ odibọgba urere riẹ evaọ Jerusalẹm i kuhọ no. Ababọ avro Jesu ọ tẹ wariẹ wezẹ uwou Lazarọs ogbẹnyusu riẹ na. Anwo nọ o no Jeriko ze evaọ Edisoi-Oka, onana họ aso avene nọ ọ be jọ Bẹtani raha na.

Whaọ, irioke Edivẹ-Oka, Nisan 11, tei te ilele riẹ a tẹ wariẹ ruọ edhere. Onana o tẹ rọ ẹdẹ ọbẹbẹ ọrọ odibọgba Jesu, onọ iruo riẹ e mai bu. Onana họ ẹdẹ urere nọ ọ be roma via evaọ etẹmpol na. Yọ onana họ ẹdẹ urere odibọgba ẹgbede riẹ re a te ti gu ei ẹdhọ je kpei.

Jesu avọ ilele riẹ a nya edhere ọvo na fa Ugbehru Olivi vrẹ kpohọ Jerusalẹm. Evaọ edhere ọyena no Bẹtani ze, Pita o te muẹrohọ urre nọ Jesu ọ leka ohiohiẹ odẹnukpo na. O te bo nọ: “Owuhrẹ, ri! Ure ojo nọ who du iyei [na] u lo no.”

Rekọ fikieme Jesu o je kpe urre na? O dhesẹ oware nọ o soriẹ nọ ọ ta nọ: “Uzẹme mẹ ta kẹ owhai, wha te wo ẹrọwọ wha gbẹ vro ho oware nọ a ru urre ojo na o ye ovo wha rẹ sai ti ruẹ hẹ, rekọ makọ wha tẹ ta kẹ ugbehru onana [Ugbehru Olivi nọ a dikihẹ na] nọ, ‘A kpare owhẹ i fihọ abade,’ a re ru ei no. Koware koware nọ wha rehọ ẹrọwọ eva olẹ yare, wha re ti woi.”

Fikiere Jesu ọ be rehọ urre ojo nọ ọ leka whu na ro wuhrẹ ilele riẹ kpahe ẹgwọlọ ẹrọwọ nọ a re fihọ Ọghẹnẹ. Wọhọ epanọ ọ ta anọ: “Koware koware nọ wha yare eva olẹ wha rọwo nọ u te owhai obọ no wha re ti wo i.” Ẹvẹ o roja kẹ ai te re a wuhrẹ onana, maero fiki edawọ ilogbo nọ e te tha kẹle na! Ghele na, oware ofa jọ o rọ udevie urre ojo nọ u whu na avọ aghare ẹrọwọ.

Orẹwho Izrẹl, wọhọ urre ojo onana, u wo oma eviẹhọ. Dede nọ orẹwho na o rọ usu ọvọ kugbe Ọghẹnẹ yọ a re dhesẹ oma via nnọ a bi koko ijaje riẹ, a kare ẹrọwọ, kare ibi iwoma. Fiki ababọ ẹrọwọ, a tube mu Ọmọ obọ Ọghẹnẹ họ ẹse no! Fikiere, ẹkwoma ekpe urre ojo na, Jesu o bi dhesẹ oware nọ ukuhọ orẹwho ababọ ẹrọwọ ọnana, nọ ọ kare ibi na, o rẹ te jọ.

U kri hi, Jesu avọ ilele riẹ a tẹ rueva Jerusalẹm, yọ wọhọ uruemu rai, a te kpohọ etẹmpol na, oria nọ Jesu o jo muhọ ewuhrẹ. Ilori izerẹ gbe ekpako ahwo na, ababọ avro avọ iroro oware nọ Jesu o ru odẹnukpo kpahe ahwo nọ i je nwene igho na, a te sei abọ: “Udu eme who bi ro ru eware nana? Kọ ono ọ kẹ owhẹ udu onana?”—NW.

Evaọ uyo Jesu ọ tẹ ta nọ: “Mẹ rẹ te nọ owhai ẹme ọvo jọ re, wha tẹ tae kẹ omẹ mẹ rẹ ta udu nọ me bi ro ru enana kẹ owhai re. Ame-ọhọ Jọn bovẹ u no ze, obọ odhiwu [manikọ] obọ ahwo?”

Izerẹ gbe ekpako na a tẹ be nọ omoma rai kpahe uyo nọ a rẹ kẹ. “Ma tẹ ta nọ, ‘Odhiwu u no ze’, ọ rẹte ta kẹ omai nọ, ‘Otẹrọ ere keme wha gbẹ rọyẹe he?’ Rekọ ma tẹ ta nọ, ‘Obọ ahwo’, yọ ma dhẹ ozọ i tu obuobu na keme ai kpobi a bi se Jọn [ọruẹaro].”

Isu na a riẹ uyo nọ a rẹ kẹ hẹ. Fikiere a te yo kẹ Jesu nọ: “Ma riẹ hẹ.”

Jesu omariẹ ọ tẹ ta nọ: “Mẹ te ta udu nọ me ro ru eware nana kẹ owhai gbe he.” Matiu 21:19-27; Mak 11:19-33; Luk 20:1-8.

▪ Ẹvẹ Edivẹ-Oka, Nisan 11, u ro wuzou gaga?

▪ Didi uwuhrẹ Jesu ọ kẹ nọ ọ la urre ojo na eka whu?

▪ Ẹvẹ Jesu ọ rọ kuyo kẹ ahwo nọ e nọ riẹ kpahe udu nọ o bi ro ru eware?