Uzou Avọ 81

Omodawọ Ofa re A Kpe Jesu

NỌ O rọ oke uriri na, Jesu ọ jẹ nya evaọ oria nọ a re se ogebara Solomọn. O rọ abotọ etẹmpol na. Ahwo Ju a tẹ jọ etenẹ wariẹe họ a te muhọ ẹta nọ: “Kẹvẹ whọ rẹ se omai ba evaọ ogbori krite? Jọ whẹ họ Kristi na, ta kẹ o mai vevẹ.”

Jesu ọ tẹ kuyo nọ: “Mẹ ta kẹ owhai, wha rọwo ho.” Jesu ọ re ta kẹ ai gbiae inọ ọye họ Kristi na ha, wọhọ epanọ ọ ta kẹ aye Sameria na evaọ akotọ oza na. Rekọ ọ fodẹ oghẹrẹ ohwo nọ ọ rọ kẹ ai no, nọ ọ ta kẹ ai inọ obehru o nọ ze gbe nọ ọ kake rehọ Abraham rria.

Ghele na, Jesu ọ gwọlọ re ahwo na a ku ei họ k’omarai nnọ ọye họ Kristi na ẹkwoma iruẹru riẹ nọ a rẹ rọ wawo oware nọ Ebaibol ọ ruẹaro inọ Kristi o ti ru. Oyejabọ ọ jẹ ta kẹ ilele riẹ vẹre inọ a ta kẹ ohwo ọvo ho inọ ọye họ Kristi na. Yọ oyejabọ ọ jẹ ta obọnana kẹ ahwo Ju ugbarugba enana nọ: “Iruo nọ mẹ be rọ odẹ Ọsẹ mẹ ruẹ, enana ise isẹri kẹ omẹ; rekọ wha rọwo ho.”

Fikieme a gbẹ rọwo ho? Fiki ababọ imuẹro nọ a wo inọ Jesu họ Kristi na? Ijo, rekọ fiki ẹjiroro nọ Jesu ọ kẹ nọ ọ ta kẹ ai nọ: “Wha rọ igodẹ mẹ hẹ. Igodẹ mẹ i re yo uru mẹ, mẹ riẹ rai, i re lele omẹ; mẹ kẹ rai uzuazọ ebẹdẹ bẹdẹ, a rẹ sai whuẹ hẹ, ohwo ọvo ọ rẹ sae tehe ai no omẹ obọ họ. Ọsẹ mẹ nọ ọ rehọ e rai kẹ omẹ, ọ ro vi ai kpobi. Ohwo ọvo ọ sai tehe ai no obọ Ọsẹ na ha.”

Jesu o te dhesẹ usu okpekpe nọ o wo kugbe Ọsẹ riẹ, ta nọ: “Mẹ avọ Ọsẹ na ọvo.” Nọ Jesu ọ rọ otọakpọ yọ Ọsẹ riẹ ọ rọ obọ odhiwu na, o rọ vevẹ inọ orọnikọ ọ be ta nọ tei t’Ọsẹ riẹ yọ omọvo hayo ugboma ovo ho. Ukpoye, o bi dhesẹ inọ a rọ ọvo evaọ ẹjiroro, inọ a wo okugbe.

Avọ evedha fiki eme Jesu, ahwo Ju na a tẹ tọlọ itho re a kpei, nwane wọhọ epanọ a kaki ru okiẹdẹ na, evaọ etoke Ehaa Uwou-Udhu na. Avọ aruọwha nọ ọ rọ rẹriẹ ova ku ahwo nọ a ti kpei, Jesu ọ tẹ ta nọ: “Emamọ iruo buobu me dhesẹ no obọ Ọsẹ na kẹ owhai; kọ iruo evẹ wha jẹ [be] rọ itho fi omẹ?”

A tẹ kuyo nọ: “Ma [be] rehọ itho fi owhẹ fiki iruo iwoma ha rekọ fiki eme-aghọ; jegbọ, epanọ whẹ ọrọ ohwo, who te ru oma ra [ọghẹnẹ].” Nọ Jesu ọ te bọunu ta nọ ọye ọghẹnẹ hẹ na, fikieme ahwo Ju na a rọ ta onana?

Ẹsejọhọ fikinọ Jesu ọ be ta nọ o wo ogaga nọ a rọwo inọ o rrọ kẹ Ọghẹnẹ ọvo. Wọhọ oriruo, ọ nwane ta kpahe “igodẹ” na no inọ, “Mẹ kẹ rai uzuazọ ebẹdẹ bẹdẹ,” oware nọ ohwo-akpọ ọvo ọ sai ru hu. Ghele na, ahwo Ju na a rri uzẹme na vo inọ Jesu ọ ta nọ o wo udu riẹ no obọ Ọsẹ riẹ ze.

Inọ Jesu ọ ta nọ ọ kawo vi Ọghẹnẹ, o te dhesẹ iẹe evaọ onọ nọ ọ wariẹ nọ: “A kere họ eva uzi rai [eva Olezi 82:6] inọ, ‘Mẹ ta nọ [whai] eghẹnẹ’? Re o te se enọ ẹme Ọghẹnẹ o bru ze eghẹnẹ . . . wha rẹ ta kpahe iẹ ọnọ Ọsẹ oro mu o je vie ze eva akpọ na, nnọ ‘Whọ ta ẹme-aghọ’, fiki epanọ mẹ ta nọ, ‘Mẹ Ọmọ Ọghẹnẹ’?”

Nọ Ikereakere na i se iguẹdhọ ohwo-akpọ nọ i kiẹrẹe he “eghẹnẹ,” didi afuẹwẹ ahwo Ju enana a rẹ jọ oma Jesu ruẹ ọ tẹ ta nọ, “Mẹ Ọmọ Ọghẹnẹ”? Jesu o te fibae nọ: “Otẹrọnọ me gbe bi ru iruo Ọsẹ mẹ hẹ wha rọwo omẹ hẹ; rekọ me te ru ai, makọ wha rọwo omẹ hẹ, wha rọwo iruo na, re wha riẹ, nọ Ọsẹ na ọrọ eva mẹ, mẹ tẹ jẹ rọ eva Ọsẹ na.”

Nọ Jesu ọ ta onana no, ahwo Ju na a tẹ gwọlọ mu ei. Rekọ ọ tẹ dhẹ, wọhọ epanọ o ru okiẹdẹ eva Ehaa Uwou-Udhu na. O te no Jerusalẹm ọ tẹ fa Ethẹ Jọdan vrẹ kpohọ oria nọ Jọn ọ kake jọ họ ahwo ame enwenọ ikpe ene nọ e vrẹ. O wọhọ nọ oria onana u thabọ no unueri obọze-ọre Abade Galili hi, wọhọ onya edẹ ivẹ no Jerusalẹm.

Ahwo buobu a tẹ nyabru Jesu ziọ etenẹ a te muhọ ẹta nọ: “Jọn o ru oka ovo ho: rekọ eme kpobi nọ Jọn ọ ta kpahe ohwo ọnana uzẹme.” Fikiere ahwo buobu a tẹ jọ etenẹ fi ẹrọwọ họ Jesu. Jọn 10:22-42; 4:26; 8:23, 58; Matiu 16:20.

▪ Didi edhere Jesu ọ gwọlọ nọ ahwo a ro vuhu ei mu wọhọ Kristi na?

▪ Ẹvẹ Jesu avọ Ọsẹ riẹ a rọ rọ ọvo?

▪ Ababọ avro, fikieme ahwo Ju na a jẹ ta nọ Jesu o bi ru oma riẹ fihọ ọghẹnẹ?

▪ Ẹvẹ eme nọ Jesu ọ ta no Ilezi ze i ro dhesẹ inọ o bi ru oma riẹ ẹrẹrẹ kugbe Ọghẹnẹ hẹ?