Uzou Avọ 83

Ohwo Farisi jọ Ọ Ghọ Riẹ

JESU ọ gbẹ rọ uwou okpohwo Farisi nọ o je siwi ọzae nọ o wo ẹyao ọsa na. Nọ o muẹrohọ ibe erara riẹ nọ e be salọ eria ikpehru evaọ emẹjẹ emuore na, o te wuhrẹ uwuhrẹ omurokpotọ jọ.

Jesu ọ ta nọ: ‘Okenọ ohwo o te zizie owhẹ eha orọo, whọ keria oria nọ u wuzou hu, otiẹsejọ o zizie ohwo jọ nọ o wo adhẹẹ vi owhẹ; ọnọ o zizie owhai na ọ vẹ te nyatha te ta kẹ owhẹ nọ, “Kẹ ohwo ọnana oria na,” kẹsena who ve ti tovrẹ avọ omovuọ kpohọ oria okakao.’

Fikiere Jesu ọ tẹ k’ohrẹ nọ: “Nọ a [te] zizie owhẹ, nya e keria oria okakao, re okenọ ọnọ o zizie owhẹ ọ jẹ nyaze ọ vẹ te ta kẹ owhẹ nọ, ‘Ogbẹnyusu, nya e keria oria ukpehru’; kẹsena who [ve] ti wo adhẹẹ iraro enọ avọ owhẹ agbẹ keria be re-emu [na].” Evaọ ekuhọ, Jesu ọ tẹ ta nọ: ‘Keme kohwo kohwo nọ o re ti ruẹ oma riẹ oruoro a re ti hrẹ i kpotọ, rekọ ohwo nọ ọ rehọ oma riẹ kpotọ a re ti ru ei rua.’

Ofariẹ, Jesu ọ tẹ t’ẹme kẹ ohwo Farisi nọ o zizie i rie na o te dhesẹ epanọ o re ro se ehaa emuore nọ o wo aghare evaọ aro Ọghẹnẹ. “Nọ, who there emu bi se ahwo eha, who se [egbẹnyusu] ra ha, hayo imoni ra [ha], hayo ahwo uyẹ ra ha, hayo ọdafe ogbe ra ha, otiẹsejọ a ve je ti zizie owhẹ re, ere a rẹ rọ hwa osa kẹ owhẹ. Rekọ okenọ who ti ru eha, zizie iyogbere, enọ i wo eka, enọ eko, gbe ituaro, who re ti wo oghale, keme a wo nọ a rẹ sae rọ hwa e kẹ owhẹ hẹ.”

Emuore otiọye na rọ kẹ iyogbere o rẹ wha oghọghọ se ọnọ ọ rehọ emuore na kẹ na keme, wọhọ epanọ Jesu ọ ta kẹ ọnọ o zizie i rie na, “A rẹ te hwa osa kẹ owhẹ ẹdẹ ẹkparomatha i kiẹrẹe.” Edhesẹ Jesu ọrọ emuore oghọghọ onana o tẹ kareghẹhọ ohwo jọ nọ a gbe zizie i kpahe oghẹrẹ emuore ọfa. Ohwo na ọ ta nọ: “Oghale u te ọ nọ ọ rẹ te re-emu eva uvie Ọghẹnẹ!” Ghele na, ahwo kpobi a rri ẹruore oghọghọ oyena ghaghare he, wọhọ epanọ Jesu ọ nyaharo dhesẹ evaọ ọtadhesẹ jọ na.

“Ohwo jọ o se eha ilogbo jọ, o te zizie ibuobu; . . . o te vi odibo riẹ nya i se enọ a zizie na nọ, ‘Wha nyaze; keme eware kpobi egba no.’ Ai kpobi a tẹ ta ovo, a te mu unoma họ eguo. Ọ rọ ọsosuọ ọ tẹ ta kẹ e nọ, ‘Mẹ dẹ udhu, mẹ rẹ nya hrọ re me ri yei; mẹ lẹ owhẹ, re whọ kẹ omẹ uvẹ.’ Ọfa jọ ọ tẹ ta nọ, ‘Mẹ dẹ eko-iruẹ-ivivẹ isoi, mẹ rẹ nya [i riwi] ai; mẹ lẹ owhẹ re whọ kẹ omẹ uvẹ.’ Ọfa ọ tẹ jẹ ta nọ, ‘Mẹ rehọ aye, fiki ere mẹ rẹ sae nya tha vievie he.’ ”

Ẹvẹ inoma na e fariẹ te! A re rri udhu hayo iruẹ ziezi taure a tẹ dẹ ai, fikiere u du fo nọ a rọ ugidi rue rai hi nọ a tẹ dẹ ai no. Epọvo na, orọo ohwo o rẹ whaha iẹe nọ ọ jẹ se uzizie ulogbo utioye na ha. Fikiere nọ o yo inoma enana no, eva e tẹ dha olori na ọ tẹ ta kẹ ọrigbo riẹ nọ:

“ ‘Nya ruọ otafe vẹrẹ, kpo obọ [iyẹrẹ] gbe idhere okpẹwho na, re whọ rehọ ze etenẹ iyogbere gbe enọ i wo eka gbe ituaro gbe enọ eko.’ Odibo na ọ tẹ ta nọ, ‘Baba, a ru onọ whọ ta no, rekọ oria u gbe kiọkọ.’ Olori na ọ tẹ ta kẹ odibo riẹ na nọ, ‘Nya kpo obọ idhere gbe eda, re wha gba ahwo họ ze re uwou mẹ o vọ. . . . Enọ a zizie na ọvuọvo ọ rẹ sae te dawo emu eha mẹ na ha.’ ”

Didi uyero a rehọ ọtadhesẹ na bi dhesẹ na? Whaọ, “olori na” nọ o there emu na o dikihẹ kẹ Jihova Ọghẹnẹ; “odibo” nọ ọ be kẹ uzizie na, Jesu Kristi; yọ “eha ilogbo” na, uvẹ nọ a rẹ rọ jọ Uvie obọ idhiwu.

Ahwo ọsosuọ nọ a kẹ uzizie na re a wo uvẹ Uvie na họ isu egagọ Ju erọ edẹ Jesu. Ghele na, a tẹ se uzizie na. Fikiere, maero muhọ eva Pẹntikọst 33 C.E., a tẹ wha uzizie avivẹ haro se imiwhrori nọ a gbabọ kẹ erọ orẹwho Ju. Rekọ ahwo nọ e kuyo a bu te epanọ a rẹ rọ vọ eria 144,000 evaọ Uvie Ọghẹnẹ obọ odhiwu hu. Fikiere evaọ 36 C.E., ikpe esa gbe ubro uwhremu na, uzizie avọ esa gbe orọ urere a tẹ kẹre iẹe se ahwo erẹwho efa nọ e yao ho, yọ ekokohọ ahwo itieye na o gbẹ rọ rite ẹdẹ mai na. Luk 14:1-24.

▪ Didi uwuhrẹ kpahe omarokpotọ Jesu o wuhrẹ?

▪ Ẹvẹ ohwo o re ro se ehaa emuore nọ o wo aghare evaọ aro Ọghẹnẹ, kọ fikieme o jẹ wha evawere sei?

▪ Fikieme inoma ahwo nọ a zizie na i gbe fioka ha?

▪ Eme ọtadhesẹ Jesu ọrọ “eha ilogbo” na u dhesẹ?