Uzou Avọ 107

Ọtadhesẹ Ehaa Orọo Na

ẸKWOMA etadhesẹ ivẹ, Jesu ọ fere ikere-ebe gbe ilori izerẹ na via no, a tẹ gwọlọ nọ a re kpei. Rekọ Jesu o ri kuhọ kugbe ai hi. Ọ tẹ fodẹ ọtadhesẹ ọfa kẹ ai, ta nọ:

“Uvie odhiwu o wọhọ ovie nọ o se eha orọwo kẹ ọmọzae riẹ, O te vi idibo riẹ nya ise e nọ a zizie eha orọwo na; rekọ oro rai ẹtha ha.”

Jihova Ọghẹnẹ họ Ovie nọ ọ ruẹrẹ ehaa orọo na họ kẹ Ọmọ riẹ, Jesu Kristi. Ukuhọ riẹ, ọmọtibobo ilele 144,000 nọ a wholo na i ti kuomagbe Jesu evaọ obọ odhiwu. Ahwo nọ Ovie na o bi su họ ahwo Izrẹl, enọ, okenọ a rehọ ai ziọ otọ ọvọ Uzi na evaọ 1513 B.C.E., a wo uvẹ nọ a rẹ rọ jọ “uvie izerẹ.” Fikiere, oke oyena a ro zizie ai ziọ ehaa orọo na.

Rekọ, taure use uzizie ọsosuọ na o tẹ te nyavrẹ kọ ubrobọ ezi ọ uvewhru ọ 29 C.E., okenọ Jesu avọ ilele riẹ (idibo ovie na) a ro mu iruo usiuwoma ota Uvie na họ. Rekọ emotọ Izrẹl enọ uzizie idibo enana u t’obọ no 29 C.E. rite 33 C.E. o ro rai nọ a rẹ nyaze he. Fikiere Ọghẹnẹ ọ tẹ rọ uvẹ ọfa kẹ orẹwho ahwo nọ a zizie na, wọhọ epanọ Jesu ọ ta:

“O [te] je vi idibo efa, a nọ, ‘Ta kẹ enọ a zizie na nọ, Ri, mẹ ruẹrẹ emu mẹ kpahe ino, iruẹ gbe erae iwhri mẹ a kpe rai no, eware kpobi e gba no; wha nyaze eha orọwo na.’ ” Use avivẹ gbe orọ urere enọ a zizie na u muhọ eva Pẹntikọst 33 C.E., okenọ a ku ẹzi ọfuafo kuọ ilele Jesu. Use onana o jọ rite 36 C.E.

Rekọ otu buobu emọ Izrẹl a gbolo ovao kẹ use na. Jesu ọ ta nọ: “Rekọ a te ri yei vo, a tẹ nya vrẹ, ọ jọ o kpo obọ udhu riẹ, ọ dekọ o te kpohọ obọ iruo riẹ, e nọ ikiọkọ i te kru idibo riẹ, a te ru ai oma vo, a te kpe ai.” Jesu ọ tẹ gbẹ ta haro nọ: “Ofu o te mu ovie na, o te vi o tu ẹmo riẹ nya i kpe ijihẹ eyena, a tẹ mahe ẹwho rai.” Onana o roma via evaọ 70 C.E., okenọ ahwo Rom a rọ mahe Jerusalẹm muotọ, a te kpe ijihẹ enana no.

Jesu ọ tẹ fodẹ oware nọ o jọ oke onana via: “Kẹsena [ovie na] ọ tẹ ta kẹ idibo riẹ nọ, ‘Eha orọwo na egba-abọ no, rekọ e nọ a zizie na a kie te he. Fikiere wha kpohọ idhere ilogbo na, re wha zizie enọ wha ruẹ kpobi ze eha orọwo na’.” Kọ enẹ idibo na a ru, yọ “orọwo na o tẹ vọ avọ ahwo nọ a zizie.”

Iruo ekokohọ erara na no idhere otafe okpẹwho enọ a zizie na ze u muhọ evaọ 36 C.E. Osu oletu ẹmo ahwo Rom na Kọniliọs gbe uviuwou riẹ họ ahwo ọsosuọ enọ e rọ ahwo Ju nọ e yawo ho nọ a kokohọ. Ekokohọ ahwo erẹwho efa enana nọ e rọ ahwo Ju hu na, aikpobi nọ a bi ro nwene enọ e kake se use na, o gbẹ rọ rite ikpe-udhusoi avọ 20 na.

Evaọ etoke ikpe-udhusoi avọ 20 nana uwou ehaa orọo na o rọ vọ. Jesu ọ tẹ fodẹ oware nọ o via, ta nọ: “Nọ ovie na ọ nyaze ti ri enọ a zizie na, ọ tẹ ruẹ ohwo jọ nọ o fi ewu orọwo họ họ; ọ tẹ ta kẹ e nọ, ‘Ogbẹnyusu, kẹvẹ whọ jẹ ruọ etenẹ ababọ ewu orọwo?’ Ọ ruẹ ẹme ta ha. Ovie na ọ tẹ ta kẹ eghale-emu na nọ, ‘Wha gbae abọ gbe awọ, wha fi ei họ ebi obọ otafe; etẹe [ọ] jẹ te viẹ jẹ re-akọ.’ ”

Ọzae na nọ o wo ewu ehaa orọo ho na o dhesẹ Ileleikristi igbunu Kristẹndọm. Ọghẹnẹ o ri vuhu enana mu hu wọhọ enọ i wo uvi ovuhumuo wọhọ emọ Izrẹl abọ-ẹzi. Ọghẹnẹ o ri kuọ ẹzi ọfuafo ku ai hi wọhọ ereuku Uvie. Fikiere a te gbolo ai fihọ otafe kpohọ ebi oria nọ a te jọ ruẹ-uye ọraha.

Jesu o ku ọtadhesẹ riẹ họ ta nọ: “Keme a se ibuobu rekọ ekakawo a ha rehọ.” Ẹhẹ, ahwo buobu a jọ udevie orẹwho Izrẹl na salọ re a jọ otu ọmọtibobo Kristi, rekọ emotọ Izrẹl nọ a salọ e rọ kakao gheghe. Ibuobu erara 144,000 nọ i wo osaohwa obọ odhiwu na a rọ ahwo nọ e rọ emọ Izrẹl he. Matiu 22:1-14; Ọnyano 19:1-6; Eviavia 14:1-3.

▪ Amono a kaki zizie kpohọ ehaa orọo na, kọ okevẹ a ro vi use na se ai?

▪ Okevẹ a kaki ro se ahwo nọ a zizie na, kọ amono họ irigbo nọ a ro ru uzizie na?

▪ Okevẹ a ro vi uzizie avivẹ na, kọ amono a kuomagbe ai uwhremu na?

▪ Amono a rehọ ohwo nọ o wo ewu ehaa orọo ho na dhesẹ?

▪ Amono họ ibuobu nọ a se, gbe ekakao nọ a salọ?