Uzou Avọ 84

Owha-Iruo Ọkwa-Olele

NỌ O no uwou okpohwo Farisi na no, nọ o wọhọ nọ ọ rọ omọvo Sanhẹdrin na, Jesu ọ tẹ rọ ovao rri Jerusalẹm. Ogbotu obuobu a te bi lele iei. Rekọ eme họ ẹjiroro rai? Eme o ghinẹ gwọlọ re a jọ uvi olele riẹ?

Nọ a rọ edhere be nya na, Jesu o te kuomarẹriẹ bru ogbotu na ọ tẹ lẹliẹ ozọ mu ai nọ ọ ta nọ: “Ohwo nọ o bru omẹ ze nọ o gbe mukpahe ọsẹ obọ riẹ gbe oni gbe aye gbe emọ gbe imoni emezae gbe imoni emetẹ, je gbe uzuazọ obọriẹ hẹ, ọ rẹ sae jọ olele mẹ hẹ.”

Eme họ otofa eme Jesu? Orọnikọ Jesu ọ be jọ etenẹ ta nnọ ilele riẹ a re ghine mukpahe imoni rai hi. Ukpoye, a re mukpahe ai evaọ edhere ọ uyoyou nọ a re wo kẹe vi ai. A ta kpahe Jekọp ọsẹ anwae Jesu inọ o “mukpahe” Lia o te you Reshẹl, onọ u dhesẹ inọ Lia a you kawo vi oniọvo riẹ Reshẹl.

Je muẹrohọ nọ Jesu ọ ta inọ olele riẹ o re mukpahe “uzuazọ obọriẹ.” Ofariẹ oware nọ Jesu ọ be ta na họ uvi olele o re yo Rie vi epanọ o tube you uzuazọ obọ riẹ dede. Fikiere Jesu o bi dhesẹ nọ re a jọ olele riẹ yọ owha-iruo ulogbo. Orọ oware nọ ohwo o re du uzou họ ababọ ororokpahe he.

Ọbẹwẹ gbe ukpokpoma i kuomagbe olele Jesu nọ a rẹ jọ, wọhọ epanọ ọ nyaharo dhesẹ na: “Kohwo kohwo nọ ọ wha [ure-oja] riẹ rọ kpahe omẹ hẹ, ọ rẹ sae jọ olele mẹ hẹ.” Fikiere, uvi olele ọ rẹ ruẹrẹ oma kpahe re ọ ruẹ uye nọ Jesu o thihakọ riẹ na, yọ o tẹ gwọlọ dede, re o whu evaọ abọ ewegrẹ Ọghẹnẹ, onọ Jesu o ti ru kẹle na.

Fikiere, re a jọ olele Kristi yọ ẹme nọ ogbotu nọ i bi lele iei na a re roro kpahe ziezi. Jesu ọ tẹ rehọ ẹkwoma ọtadhesẹ jọ fiẹgba họ ẹme ọnana. Ọ ta nọ: “Keme whai ọvẹ, ọ rẹ guọlọ nọ ọ rẹ [bọ] uwou u kpehru, [nọ] ọ gbẹ keria tao re o kele igho riẹ sọ o wo igho nọ i re te i bọ re? Ogbẹrọ erehe, nọ ọ tọ riẹ họ no, ọ gbẹ be sae [bọe] re he, enọ e rue riẹ kpobi a ve mu ei ẹkoko họ ese nọ, ‘Ohwo nana o muhọ ẹbọ, rekọ ọ be sae bọ i re he.’ ”

Fikiere Jesu o bi dhesẹ kẹ ogbotu nọ i bi lele iei na nọ taure a tẹ te jọ olele riẹ, a rẹ jọ udu rai tae mu ziezi inọ a rẹ sai ru oware nọ o gwọlọ gba, wọhọ epanọ u re mu ohwo nọ ọ gwọlọ bọ uwou ẹro sọ o wo ugho nọ ọ rẹ rọ bọ uwou na re taure o te ti muhọ na. Nọ ọ jẹ kẹ ọtadhesẹ ọfa, Jesu ọ tẹ taharo nọ:

“Hayo kọ didi ovie ọ rẹ wọ ẹmo nya i fi ovie jọ nọ ọ gbẹ kake keria re ọ mate, sọ ọ sae rehọ ahwo idu-ikpe lele ọwegrẹ riẹ họra ha, ọnọ o bi bru ei tha avọ ahwo idu-udhe? [Hayo], nọ ọdekọ ọgbẹ rọ ugbo thabọ, o [ve] vi ahwo riẹ nya e guọlọ udhedhẹ.”

Jesu ọ tẹ fotọ etadhesẹ riẹ na, ta nọ: “Fikiere, kohwo kohwo nọ ọ siọ eware nọ o wo kpobi ba ha, ọ rẹ sae jọ olele mẹ hẹ.” Onana họ oware nọ ogbotu nọ i bi lele iei na, ẹhẹ, gbe ahwo nọ a wuhrẹ kpahe Kristi kpobi, a rẹ rehọ unevaze ru. U re no ai eva ze re a fi eware nọ a wo kpobi họ otọ—ekwakwa rai kpobi, kugbe uzuazọ rai dede—otẹrọnọ a gwọlọ jọ ilele riẹ. Kọ u no owhẹ eva ze nọ who re ru onana?

Jesu ọ tẹ gbẹ ta haro nọ: ‘Evaọ uzẹme, uwhei o rọ ziezi.’ Evaọ Ovuẹ obọ Ugbehru riẹ na, ọ ta nọ ilele riẹ họ ‘uwhei akpọ na,’ nọ u dhesẹ nnọ a wo okpomahọ esiwo kẹ ahwo, nwane wọhọ epanọ a rẹ rehọ uwhei rawo oware na. “Rekọ [uwhei] u te ku amere riẹ fiẹ, eme ọ gbẹ kẹe amere ọfa? U wo obufihọ kẹ otọ hayo ezuzu hu.” Jesu o te ku ei họ nọ: “Ahwo a re ku ei fiẹ. Ọnọ o wo ezọ nọ o re ro yo, o yo.”

Fikiere Jesu o te dhesẹ nnọ makọ ahwo nọ a zihe ruọ ilele riẹ dina kri no dede a re sienẹ hemu evaọ ọtamuo rai re a nyaharo ho. A te ru erei, a gbe ti fioka ha, akpọ na o ve ti se ai ẹkoko a gbe je fo evaọ aro Ọghẹnẹ hẹ, evaọ uzẹme, a vẹ te jọ ekela kẹ Ọghẹnẹ. Fikiere, wọhọ uwhei nọ u wo ẹgba ha, nọ o raha no, a ve ti gbolo ai fihọ otafe, ẹhẹ, raha ai no. Luk 14:25-35; Emuhọ 29:30-33; Matiu 5:13.

▪ Eme u dhesẹ re a “mukpahe” imoni gbe omobọ ohwo?

▪ Didi etadhesẹ ivẹ Jesu ọ kẹ, kọ eme i dhesẹ?

▪ Eme họ otofa eme ọ ekuhọ Jesu kpahe uwhei?