Uzou Avọ 86

Iku Ọmọ nọ O Vru

NỌ Ọ fodẹ etadhesẹ kẹ otu Farisi na no kpahe ogodẹ nọ o vru gbe idọlọ-efuafo nọ i vru, Jesu ọ tẹ kẹ ọtadhesẹ ọfa jọ. Onana u kie kpahe ọsẹ oyoyou gbe oghẹrẹ nọ o ro yeri kugbe emezae ivẹ riẹ, ivẹ na avọ iruthọ ilogbo rai.

Orọ ọsosuọ họ, ọmọzae ọmaha na, ọnọ ọ rọ ugogo ohwo ọtadhesẹ na. Ọ rehọ ukuoriọ riẹ, onọ ọsẹ riẹ ọ rọ kẹe ababọ okioraha. O te no uwou o te kie ruọ uzuazọ ọfariẹ-ogbe. Rekọ gaviezọ nọ Jesu o gbiku riẹ na, re whọ ruẹ sọ whọ sae riẹ ahwo nọ a rehọ ahwo na dhesẹ.

Jesu o muhọ nọ: “Ohwo jọ o wo emezae ivẹ; ọ rọ ọsese rai ọ tẹ ta kẹ ọsẹ riẹ nọ, ‘Baba, kẹ omẹ ẹkẹ eyero ra nọ o re te omẹ.’ [Ọsẹ na] ọ tẹ ghale eware riẹ kẹ ae.” Eme ọrọ ọmaha na ọ rehọ eware nọ a kẹ riẹ ru?

Jesu ọ tẹ taharo nọ: “Edẹ i ri bu hu na, ọ rọ ọmọzae ọsese na ọ tẹ kua ai kpobi koko, ọ tẹ wọ kpo erẹ riẹ eva orẹwho uthethabọ; etẹe ọ jẹ raha eware riẹ gbọfariẹ.” Evaọ uzẹme, ọ raha igho riẹ je lele igberẹ rria. Ukuhọ riẹ eware i te yoma, wọhọ epanọ Jesu ọ gbẹ ta haro:

“Nọ ọ re ai kpobi no, ohọwo ulogbo jọ u te zi mu eva orẹwho na; uvuhu u te mu ei họ ekpe. Ọ tẹ rọ oma riẹ kuagbe ohwo orẹwho ọyena jọ, o te vi ei re ọ kuọ isi ẹwho eva udhu riẹ. Ọ tẹ guọlọ nọ ọ rẹ rehọ ehọrọ nọ isi na e rẹ riọ kuọ eva riẹ; ohwo ọvo ọ kẹ riẹ hẹ.”

Ẹvẹ o rọ omovuọ te re ohwo o su isi, nọ erao enana e rọ gbegbe evaọ otọ Uzi na! Rekọ oware nọ o mae da ọmọzae na họ ohọo nọ u je kpei nọ o tubẹ lẹliẹe siuru emuore isi na. Fiki ọbẹwẹ ọgaga riẹ, Jesu ọ tẹ ta nọ, o te “bru omariẹ kpiroro.”

Bi gbiku riẹ haro na, Jesu ọ tẹ ta nọ: “Ọ tẹ ta [kẹ omobọ riẹ] nọ, ‘Bro izizie-iruo ọsẹ mẹ o wo, nọ a wo emuore thọ esiwa, ohọwo o vẹ jọ etenẹ bi kpe omẹ! Mẹ rẹ te kparoma [me ve] kpo obọ ọsẹ mẹ, mẹ vẹ te ta kẹ e nọ, “Baba, mẹ rahaizi odhiwu, je te iraro ra; me gbe te epanọ a re se omẹ ọmọ ra ha; ru omẹ rọ ozizie-iruo ra jọ.” ’ Ọ tẹ kparoma bru ọsẹ riẹ ze.”

Oware jọ nọ a re roro ona: Otẹrọnọ ọsẹ riẹ ọ whọ ku ei ọ jẹ rehọ evedha do ku ei okenọ o je no uwou, ẹsejọhọ ọmọzae na ọ hae sae gba iroro riẹ mu t’ere he kpahe oware nọ o re ru. Ẹsejọhọ ọ hae jiroro nọ o re zihe re ọ daoma gwọlọ iruo evaọ oria ọfa evaọ orẹwho riẹ re ọ whaha edo ọsẹ riẹ. Rekọ, o roro ere he. Obọ uwou họ oria nọ ọ gwọlọ kpohọ!

U re vevẹ, ọsẹ na evaọ ọtadhesẹ Jesu na o dikihẹ kẹ Ọsẹ oyoyou, ohrọ obọ odhiwu mai, Jihova Ọghẹnẹ. Yọ ẹsejọhọ who muẹrohọ no inọ ọmọzae ogbọfariẹ, ọnọ o vru na, o dhesẹ erahaizi nọ a riẹ ziezi. Otu Farisi na, enọ Jesu ọ be t’ẹme kẹ na, a whọku Jesu no vẹre fikinọ o bi lele ahwo enana re emu. Rekọ ono ọmọ ọkpako na o dikihẹ kẹ?

Okenọ A Ruẹ Ọmọ nọ O Vru Na

Okenọ ọmọ ogbọfariẹ na, ọnọ o vru evaọ ọtadhesẹ Jesu na o zihe ziọ uwou ọsẹ riẹ, didi odederehọ a kẹ riẹ? Gaviezọ nọ Jesu o dhesẹ iẹe:

“Nọ ọ gbẹ rọ ugbo uthethabọ, ọsẹ riẹ ọ tẹ rue riẹ, ohrọ o tẹ re iẹe, ọ [tẹ] dhẹ e gbale iẹ, ọ jẹ viọlọ iẹe.” Ẹvẹ ọsẹ ọnana o wo ohrọ, je woma te, nọ o nwani dhesẹ Ọsẹ obọ odhiwu mai, Jihova!

Ẹsejọhọ ọsẹ na o yo kpahe uzuazọ ọfariẹ-ogbe ọmọ riẹ no. Ghele na o dede i rie rehọ ababọ enọ nọ ọ nọ riẹ. Jesu omariẹ o wo ẹzi odederehọ otiọye na, ọ rẹ j’owọ nyabru erahaizi gbe imiazọhọ, enọ a rehọ ọmọ ogbọfariẹ na dhesẹ evaọ ọtadhesẹ na.

Uzẹme, ababọ avro ọsẹ orimuo evaọ ọtadhesẹ Jesu na ọ riẹ kpahe ekurẹriẹ ọmọ riẹ nọ ọ jọ ovao riẹ ruẹ ọkora gbe uweri nọ o bi zihe ze na. Rekọ owọ uyoyou nọ ọsẹ na ọ jẹ ro dede iei rehọ na u te ru ei lọhọ kẹ ọmọ na viere re ọ fa izieraha riẹ, wọhọ epanọ Jesu ọ ta na: “Ọmọ na ọ tẹ ta kẹ e nọ, ‘Ọsẹ, mẹ rahaizi mukpahe odhiwu gbe owhẹ. Me gbe te epanọ a re ro se omẹ ọmọ ra ha. Ru omẹ wọhọ ozizie-iruo ra jọ.’ ”—NW.

Ghele na, bẹsenọ ọ rẹ t’ẹme na n’unu re no, ọsẹ na o te muhọ, ta kẹ irigbo riẹ nọ: “Ovẹrẹ wha rehọ emamọ ewu nọ ọ raro ze, wha fi ei họ iẹ oma, wha fi ẹmẹro họ iẹ obọ, gbe eviẹ awọ riẹ; wha rehọ ọmọ eruẹ nọ owo iwhri ze, wha kpe i, wha ru ma re, ma ghọghọ. Keme ọmọ mẹ na o whu no; ọ tẹ jẹ zọ no, o vru no, a rue riẹ no.” Koyehọ a “mu eva họ ẹwerọ.”

Whaọ, “ọmọ ọkpako [ọsẹ na] ọ jọ obọ udhu.” Rri sọ whọ sai vuhu ohwo nọ o dikihẹ kẹ ẹkwoma ezọgaviẹ kẹ iku nọ o kiọkọ na. Jesu ọ ta kpahe ọmọ ọkpako na nọ: “Epanọ o je ro kpozi na, nọ ọ kẹle uwou no, o te yo edo ile gbe ehaigbe. O te se odibo jọ, ọ tẹ nọ e epanọ eware enana erọ. Ọ tẹ ta kẹ e nọ, ‘Omoni ra o kpozi [no]; ọsẹ ra o te kpe ọmọ eruẹ nọ o wo iwhri, epanọ ọ [rue riẹ] vrẹrẹrẹ omakọkọ.’ Rekọ o te je muofu, ọ be rọwo rueva ha. Ọsẹ riẹ o te no uwou ze te lẹ e, rekọ o te yo kẹ ọsẹ riẹ nọ, ‘Ri, ikpe ibuobu enana kpobi me ru iruo kẹ owhẹ, mẹ te raha [ujaje] ra ọvuọvo ho; dede whọ te kẹ omẹ ọmọ ẹwe ra mẹ avọ ezọ mẹ ma [rọ] ghọghọ họ. Rekọ nọ ọmọ ra ọnana o kpozi, ọnọ avọ igberedha a raha eware ra, who [te] kpe ọmọ eruẹ nọ o wo iwhri kẹ e!’ ”

Ono, wọhọ ọmọ ọkpako na, ọ be dheva kpahe ohrọ gbe ororokẹ nọ a bi dhesẹ kẹ erahaizi na? O gbẹ rọ nọ otu ikere-ebe gbe Farisi na? Nọ o rọ nọ ọwhọkuo rai mukpahe Jesu fikinọ o bi dede erahaizi rehọ o wha ọtadhesẹ ọnana ze na, ababọ avro ae a rehọ ọmọ ọkpako na dhesẹ.

Jesu o ku iku riẹ họ avọ olẹ nọ ọsẹ na ọ lẹ ọmọ ọkpako riẹ: “Ẹghele, te owhẹ ma gbẹ rọ ẹse kpobi, e nọ erọ emẹ kpobi era. Rekọ u fo re eva ewere omai, ma ghọghọ, keme omoni ra ọnana o whu no, ọ tẹ jẹ te zọ no; o vru no, a tẹ jẹ rue riẹ no.”

Jesu ọ gbẹ ta oware nọ ọmọ ọkpako na o ru uwhremu na ha. Uzẹme, evaọ obaro, nọ Jesu o whu jẹ kparoma no, “otu izerẹ buobu a te yo ẹme kẹ orọwọ na,” ẹsejọhọ kugbe otu “ọmọ ọkpako” na jọ enọ Jesu ọ rọ etenẹ be t’ẹme kẹ na.

Rekọ amono evaọ oke ọgbọna a dikihẹ kẹ emọ ivẹ na? A rọ ahwo nọ e riẹ kpahe ẹjiroro Jihova ziezi no te epanọ a rẹ sae rọ ruọ usu kugbei. Ọmọ ọkpako na o dikihẹ kẹ otu jọ evaọ “uthuru okakao” na hayo ‘ukoko emọ otuyẹ nọ a kere họ obe obọ odhiwu.’ Enana i te wo uruemu nọ o wọhọ ọrọ ọmọ ọkpako na. A wo isiuru nọ a re ro dede otu otọakpọ rehọ họ, “igodẹ efa” na, enọ a roro nọ a bi mi ai aro no na.

Evaọ abọdekọ riẹ, ọmọ ogbọfariẹ na o dikihẹ kẹ ahwo Ọghẹnẹ nọ e nyavrẹ re a reawere isiuru akpọ na. Rekọ uwhremu na enana a te kurẹriẹ zihe ze a tẹ te jọ idibo egaga Ọghẹnẹ. Uzẹme, ẹvẹ Ọsẹ na o wo uyoyou je wo ohrọ te rọkẹ ahwo nọ a vuhu ẹgwọlọ erọvrẹ rai mu a te je zihe bru ei ze! Luk 15:11-32; Iruo-Izerẹ 11:7, 8; Iruẹru 6:7; Luk 12:32; Ahwo Hibru 12:23; Jọn 10:16.

▪ Amono Jesu ọ ta ọtadhesẹ hayo ikuigbe riẹ na kẹ, kọ fikieme?

▪ Ono họ ugogo ohwo iku na, kọ eme o via kẹe?

▪ Amono evaọ oke Jesu ọsẹ gbe ọmọzae ọmaha na a dikihẹ kẹ?

▪ Ẹvẹ Jesu ọ rọ raro kele oriruo ọsẹ ororokẹ ọrọ ọtadhesẹ riẹ na?

▪ Eme họ eriwo ọmọ ọkpako na kpahe edederehọ oniọvo riẹ, kọ ẹvẹ otu Farisi na a bi ro ru wọhọ ọmọ ọkpako na?

▪ Didi otofa ọtadhesẹ Jesu o wo evaọ edẹ mai na?