Uzou Avọ 87
Rọ Uvi Areghẹ Ruẹrẹhọ Kẹ Obaro
JESU ọ nwane gbiku ọmọ ogbọfariẹ kẹ ogbotu nọ u kugbe ilele riẹ no, imiazọhọ iwhayo gbe erahaizi efa nọ a riẹ ziezi, otu ikere-ebe gbe Farisi na. Enẹna, nọ ọ rọ ovao dhe ilele riẹ, ọ tẹ fodẹ ọtadhesẹ ọfa jọ kpahe ọdafe nọ o yo iyẹrẹ iyoma kpahe orieyero riẹ.
Wọhọ epanọ Jesu ọ ta, ọdafe na o se orieyero riẹ ọ tẹ ta kẹe nọ o ti siei no iruo. U te gbe orieyero na unu nọ: “Ẹvẹ me re ruẹ, keme olori mẹ o bi ti si omẹ no orieyero? Mẹ ga oma no me re ro kporo ho, oma ẹyarọ o rẹ vuẹ omẹ. Me roro epanọ [me] re ruẹ no, re nọ a si omẹ no orieyero, a rẹ rehọ omẹ họ iwou rai.”
Eme họ ẹjiroro orieyero na? O se ahwo nọ e riosa olori riẹ. Ọ tẹ nọ nọ. “Bro osa olori mẹ whọ re?”
Ọrọ ọsosuọ ọ tẹ kuyo nọ, ‘Ilita ewhri 2,200.’
Ọ tẹ ta kẹe nọ, ‘Rehọ ebe agrimeti ra re who kere 1,100 ovovẹrẹ.’
Ọ tẹ nọ ọfa nọ: ‘Kọ whẹ, bro osa whọ re?’
Ọ tẹ ta nọ, ‘Ilita eka 22,000.’
‘Rehọ ebe agrimeti ra re who kere 18,000.’
Orieyero na o wo udu nọ o re ro bru osa nọ a re olori riẹ kpotọ, keme ekiọthuọ olori riẹ e gbẹ riẹe obọ. Ọ be rehọ igho nọ o bi bru kpotọ na mu egbẹnyusu kugbe ahwo nọ e rẹ sai fiobọhọ kẹe okenọ a te si ei no iruo.
Nọ olori na o yo oware nọ o via, o tẹ were iẹe. Evaọ uzẹme, o te ‘jiri orieyero na dede nọ o kiẹrẹe he, keme ọ rehọ uvi areghẹ ru.’ Evaọ uzẹme, Jesu o fibae nọ: ‘Emọ akpọ ọnana a wo areghẹ evaọ oge rai vi emọ elo.’
Whaọ, nọ ọ jẹ fotọ riẹ kẹ ilele riẹ, Jesu ọ tẹ tudu họ ai awọ nọ: ‘Wha rehọ efe nọ i kiẹrẹe he ru ezọ kẹ oma rai; re, nọ u je ti re a vẹ rehọ owhai họ iwou ebẹdẹ bẹdẹ.’
Orọnikọ Jesu o bi jiri orieyero na fiki ababọ ẹrẹreokie riẹ hẹ rekọ fiki uvi areghẹ riẹ, kpahe obaro. Ẹsibuobu “emọ akpọ ọnana” a rẹ rọ areghẹ rehọ igho hayo ọkwa rai mu egbẹnyusu kugbe ahwo nọ a re zihe ewoma kẹ ai. Fikiere u te je fo re idibo Ọghẹnẹ, “emọ evevẹ,” a rehọ ekwakwa efe rai, ‘efe rai nọ i kiẹrẹe he,’ ro ruiruo evaọ edhere areghẹ rọ wha erere se oma rai re.
Rekọ wọhọ epanọ Jesu ọ ta, a rẹ rehọ efe nana mu egbẹnyusu kugbe enọ e rẹ rehọ ai “họ iwou ebẹdẹ bẹdẹ.” Rọ kẹ otu uthuru okakao na, eria enana e rọ obọ odhiwu; rọ kẹ “igodẹ efa” na, e rọ otọakpọ Aparadase. Nọ o rọ nọ Jihova Ọghẹnẹ gbe Ọmọ riẹ ọvo họ enọ e rẹ sae rehọ omai kpohọ eria enana, ma rẹ daoma mu usu kugbe ai ẹkwoma eroruiruo ‘efe mai nọ i kiẹrẹe he’ evaọ ẹtha-uke isiuru Uvie na. Kẹsena, okenọ ekwakwa efe nana i te kie hayo raha, wọhọ epanọ i ti ghine ru na, obaro ebẹdẹ bẹdẹ mai u ve wo imuẹro.
Jesu ọ tẹ gbẹ nyaharo ta inọ ahwo nọ a wo ẹrọwọ evaọ ẹruorote eware iwo enana, hayo esese enana, a ti je wo ẹrọwọ re evaọ ẹruorote eware nọ i wuzou. Ọ gbẹ taharo nọ: “Fikiere who gbe wo orọwọ evaọ efe e nọ ikiẹrẹe he, ono ọ rẹ rehọ emamọ efe [koyehọ, isiuru abọ-ẹzi, hayo orọ Uvie] họ obọ ra? Re who gbe wo orọwọ evaọ [eware ohwo] ọdekọ họ [isiuru Uvie nọ Ọghẹnẹ o mu họ idibo riẹ abọ], ono ọ rẹ te rọ e rọ obọ [ra] rọ kẹ owhẹ [osohwa uzuazọ evaọ eria ẹria ebẹdẹ bẹdẹ]?”
Ma sae jọ emamọ idibo Ọghẹnẹ hẹ re ma jọ okiọvo na jọ irigbo efe nọ i kiẹrẹe he, ekwakwa iwo, wọhọ epanọ Jesu o ku rie họ na: “Odibo ọvo ọ sai ru iruo kẹ ilori ivẹ hẹ; kiyọ o re mukpahe ọjọ, o you ọjọ; hayo o re kru ọjọ rehọ, o ve ri ọdekọ kakawo. Wha sae ru iruo kẹ Ọghẹnẹ gbe efe he.” Luk 15:1, 2; 16:1-13; Jọn 10:16.
▪ Ẹvẹ orieyero evaọ ọtadhesẹ Jesu o ro mu usu kugbe ahwo nọ a sai fiobọhọ kẹe evaọ obaro?
▪ Eme họ ‘efe nọ i kiẹrẹe he,’ kọ ẹvẹ ma rẹ rọ rehọ ai mu ogbẹnyusu?
▪ Ono ọ rẹ sae rehọ omai ruọ ‘eria ẹria ebẹdẹ bẹdẹ,’ kọ didi eria eye?