Uzou Avọ 89

Erẹ Ohrọ Kpohọ Judia

EKA jọ nọ i kpemu, evaọ etoke Ehaa Eromudhe na evaọ Jerusalẹm, ahwo Ju a tẹ gwọlọ nọ a re kpe Jesu. Fikiere ọ tẹ nya kpohọ ofẹ ẹkpẹlobọ-ọre, ẹsejọhọ evaọ oria nọ u thabọ no Abade Galili hi.

Kẹle na, ọ wariẹ rọ ovao rri obọze-ọre kpohọ ofẹ Jerusalẹm, be ta usiuwoma evaọ edhere iwhre Pẹrea, ẹkwotọ nọ o rọ ofẹ ovatha-ọre Ethẹ Jọdan. Nọ o gbiku ọdafe na gbe Lazarọs no, o te gbe wuhrẹ ilele riẹ eware buobu nọ ọ kaki wuhrẹ no vẹre okenọ a jọ Galili.

Wọhọ oriruo, ọ ta nọ o rẹ mai woma kẹ ohwo re “a gba utho ulogbo họ iẹ ohọe, re a gbolo ie [fihọ abade]” ukpenọ o re ru “emefofa” Ọghẹnẹ enana jọ zoruẹ. Ọ tẹ jẹ fodẹ ẹgwọlọ kẹ erọvrẹ, ta nọ: “[Omoni ra] o te ru owhẹ thọ isiahrẹ evaọ ẹdẹ ọvo ọ jẹ rẹriẹ bru [owhẹ ze] isiahrẹ nọ, ‘Me kurẹriẹ’, whọ rọ vrẹ e.”

Okenọ ilele na a yare iẹe nọ, “Tua ẹrọwọ mai,” Jesu ọ tẹ kuyo nọ: “Wha [te] wo orọwọ wọhọ ubi ahe wha rẹ sai ta kẹ akpakpa ọnana nọ, ‘Wolo no otọ, whọ kọ oma ra họ eva abade’, o re yo ẹme rai.” Fikiere makọ ẹrọwọ ọsese ọ rẹ sai ru ikpeware.

Ofa, Jesu o te gbiku aruakpọ jọ nọ u dhesẹ emamọ uruemu nọ odibo Ọghẹnẹ erumeru na o re wo. Jesu o muẹrohọ nọ: ‘Whai ọvẹ, o wo odibo nọ o re kporo udhu, hayo o re thuru igodẹ, nọ o je no obọ udhu ze, ọ vẹ ta kẹ e nọ, “Nyaze enẹna, re whọ keria whọ re emu”? Ikpoye ọ gbẹ ta kẹ e nọ, “Ruẹrẹ emu nọ mẹ rẹ ria kẹ omẹ, mu ohọ ra ga who ru iruo kẹ omẹ, bẹsenọ mẹ rẹ re da no; kẹsena whọ tẹ re da”? Kọ o re yere odibo na fiki epanọ o ru oware nọ ọ ta kẹ e? Whaọ ere whai re, nọ wha te ru eware kpobi nọ a ta kẹ owhai no, wha vẹ ta nọ, “Mai idibo nọ ifiokaha. Oware nọ u fo nọ ma re ru, oye ma ru na.” ’ Fikiere, idibo Ọghẹnẹ a re roro vievie he nnọ a bi ru Ọghẹnẹ ewoma jọ fikinọ a be gọe. Ukpoye, ẹsikpobi a rẹ kareghẹhọ ọghọ nọ a wo nọ a be rọ gọe wọhọ ahwo evaifihọ uviuwou riẹ.

Ẹsejọhọ nọ Jesu ọ kẹ ọtadhesẹ ọnana no ọwhovuẹ jọ ọ tẹ nyaze. Meri avọ Mata a vi rie ze, inievo Lazarọs, ọnọ ọ be rria Bẹtani ọ Judia. Ọwhovuẹ na ọ ta nọ: ‘Olori, ri, ọnọ who you na ọ be mọ.’

Jesu ọ tẹ kuyo nọ: “Ẹyao ọnana ọrọ ọ rọ uwhu hu, rekọ fiki oruaro Ọghẹnẹ, re ọmọ Ọghẹnẹ ọ ja riẹ wo oruaro.” Nọ ọ daji oria nọ ọ rọ te edẹ ivẹ no, Jesu ọ tẹ ta kẹ ilele riẹ nọ: “Ma je kpo obọ Judia.” Rekọ, a tẹ kareghẹhọ iẹe nọ: “Rabae, ahwo Ju a jẹ guọlọ rehọ itho fi owhẹ ivobọna, [who] ve je kpo obei?”

Evaọ uyo Jesu ọ tẹ nọ nọ: “Ogbẹrọnọ auwa kpegbivẹ e rọ eva uvo? Ohwo ọ tẹ be nya uvo, o re zoruẹ hẹ, epanọ [ọ] be ruẹ elo akpọ ọnana. Rekọ ohwo ọ tẹ be nya evaọ aso, o re zoruẹ, epanọ ọ be ruẹ ude he.”

Ẹsejọhọ otofa ẹme Jesu na họ ‘auwa uvo’ na, hayo oke nọ Ọghẹnẹ o fihọ kẹ odibọgba otọakpọ Jesu, u ri re he yọ bẹsenọ u re re no, ohwo ọvo ọ sae nwae oma ha. Ọ rẹ rehọ oke “uvo” nọ u kiọkọ kẹe na ruiruo ziezi, keme “aso” ọ be tha nọ ewegrẹ riẹ a ti ro kpei.

Jesu o te fibae nọ: ‘Lazarọs ọzọ mai o kie ruọ owezẹ no, rekọ mẹ rẹ nya re mẹ rọyẹe no owezẹ ze.’

Ẹsejọhọ bi roro nọ Lazarọs o bi serihọ evaọ owezẹ gheghe jegbe nọ onana yọ oka uwoma inọ oma riẹ o te ga, ilele na a tẹ kuyo nọ: “Olori, o te kie ruọ owezẹ, oma riẹ o rẹ te ga.”

Jesu ọ tẹ ta kẹ ai gbiae nọ: “Lazarọs o whu no, eva e were omẹ fiki rai nọ mẹ rọ jọ etẹe he, re wha ruẹse rọwo; rekọ ma nya bru ei.”

Nọ o vuhumu nọ a sai kpe Jesu evaọ Judia, ghele avọ isiuru re ọ thae uke, Tọmas ọ tẹ tudu họ ibe ilele riẹ awọ nọ: “Ma nya re ma whu kugbe i re.” Fikiere evaọ awa izuazọ rai, ilele na a te lele Jesu rueva Judia kpohọ erẹ ohrọ onana. Luk 13:22; 17:1-10; Jọn 10:22, 31, 40-42; 11:1-16.

▪ Diẹse Jesu ọ jọ jẹ ta usiuwoma kẹle?

▪ Didi iwuhrẹ Jesu ọ wariẹ, kọ didi eyero aruakpọ ọ fodẹ ro dhesẹ oware ovẹ?

▪ Didi usi u te Jesu obọ, kọ eme họ otofa “uvo” gbe “aso” nọ ọ ta kpahe na?

▪ Eme họ otofa eme ọ Tọmas nọ ọ ta inọ, ‘Joma nya re ma lele iei whu’?