Uzou Avọ 91

Okenọ A Kpare Lazarọs Ze

JESU, avọ ahwo nọ a bi lele iei, a tẹ nyate uki ekareghẹhọ Lazarọs. Evaọ uzẹme, o rọ eghogho avọ utho nọ a ghelie fihọ unu riẹ. Jesu ọ tẹ ta nọ: “Wha ghelie utho na no.”

Mata o te si ikẹ, keme o ti wo otoriẹ oware nọ Jesu ọ gwọlọ ru hu. Ọ tẹ ta nọ: “Olori, oke u tite enẹ na, o re [muhọ] egbo no, keme anwọ edẹ ene o ro whu na.”

Rekọ Jesu ọ tẹ nọ nọ: “Kọ [mẹ] gbẹ ta kẹ owhẹ nọ, whọ tẹ rọwo whọ rẹ te ruẹ oruaro Ọghẹnẹ?”

A te ghelie utho na no. Jesu ọ tẹ kpare aro kpehru ọ tẹ lẹ nọ: “Ọsẹ, me yere owhẹ epanọ who ro yo ẹme mẹ. Mẹ riẹ nọ, who re yo ẹme mẹ ẹsekpobi; rekọ fiki epa otu obuobu nọ odikihẹ wariẹ mẹ jẹ tae na; re a ruẹse rọwo nọ who vi omẹ.” Jesu ọ jọ ẹgbede lẹ re ahwo na a riẹ nọ ogaga nọ ọ jọ obọ Ọghẹnẹ wo o ro ru oware nọ o bi ti ru na. Ọ tẹ rehọ urru oruarua bo nọ: “Lazarọs, nya via.”

Lazarọs ọ tẹ nya via. A gbẹ rehọ ehọ ukio variẹ abọ gbe awọ riẹ, yọ a rọ emehọ ruru ovao riẹ. Jesu ọ tẹ ta nọ: “Wha ra e no, re o kpo.”

Nọ a ruẹ oware igbunu na, ahwo Ju buobu nọ e nyaze te sasa Meri gbe Mata oma a te fi ẹrọwọ họ Jesu. Rekọ amọfa a tẹ nya e ta kẹ otu Farisi kpahe oware nọ o via na. Te ai te ilori izerẹ na a tẹ nwani se ẹguae okọto okpehru ahwo Ju, Sanhẹdrin na.

Ahwo nọ a jọ Sanhẹdrin na họ ozerẹ okpehru ọkpokpọ na, Kayafas, gbe otu Farisi gbe Sadusi, ilori izerẹ, gbe izerẹ ikpehru anwae. Enana a te je bruenu nọ: “Eme ma re ruo na? Keme ohwo ọnana o bi ruẹ eware-igbenu gaga. Ma tẹ se iẹe ba ere, ahwo kpobi a rẹte rọwo iẹe, ahwo Rom a vẹ te nyaze te raha oria aghọ mai gbe orẹwho mai.”

Dede nọ isu egagọ na a rọwo inọ Jesu o “bi ruẹ eware-igbenu gaga,” oware nọ o rọ ae oja kpobi họ ọkwa gbe udu-esuo obọ rai. Ẹkpare Lazarọs na yọ ẹtehabọ ologbo rọ kẹ ahwo Sadusi na, keme a rọwo ẹkparomatha ha.

Kayafas, ọnọ o wọhọ ohwo Sadusi na, ọ tẹ ta nọ: “Wha riẹ oware ovo ho, wha gbẹ riẹ nọ u fo rọ kẹ owhai re omọvo o whu rọ kẹ orẹwho na re orẹwho ososo a zọ?”

Ọghẹnẹ o ru Kayafas ta ẹme ọnana, keme Jọn ukọ na o kere uwhremu na nọ: ‘Orọnikọ iroro eva obọ riẹ Kayafas ọ rọ ta ha.’ Ẹme nọ Kayafas ọ be ta na họ a re kpe Jesu re Ọ siọ ọkwa udu-esuo gbe ogaga rai ba efihọ awa. Ghele na, wọhọ epanọ Jọn ọ ta, ‘Kayafas ọ ruẹaro inọ Jesu o re ti whu orọnikọ rọ kẹ orẹwho na ọvo ho, rekọ re a ruẹsi koko emọ Ọghẹnẹ họ.’ Yọ, o ghinẹ rọ ẹjiroro Ọghẹnẹ re Ọmọ riẹ o whu wọhọ ẹtanigbo kẹ ahwo kpobi.

Kayafas ọ tẹ sae lẹliẹ Sanhẹdrin na họ re a gbẹguae nọ a re ro kpe Jesu. Rekọ ẹsejọhọ nọ Jesu ọ riẹ kpahe eguae enana mi Nikodemọs, omọvo Sanhẹdrin na nọ ọ rọ ogbẹnyusu riẹ, ọ tẹ kparoma no etẹe. Jọn 11:38-54.

▪ Fikieme Jesu ọ jẹ jọ ẹgbede lẹ taure ọ tẹ kpare Lazarọs?

▪ Ẹvẹ o jọ ahwo nọ a ruẹ ẹkparomatha ọnana oma?

▪ Eme u dhesẹ evega ahwo Sanhẹdrin na?

▪ Eme họ ẹjiroro Kayafas, rekọ eme Ọghẹnẹ ọ rehọ e riẹ ruẹaro?