Uzou Avọ 119

A Rehọ E Riẹ Bru Anas,

je no Etẹe Bru Kayafas

A SU Jesu, ọnọ a gba wọhọ ogbulegbu na, bru Anas, ozerẹ okpehru vẹre nọ o wo ẹgba gaga. Anas ọ jọ ozerẹ okpehru okenọ Jesu nọ ọ jọ ọmọ ikpe 12 ọ lẹliẹ akpọ gbe iwuhrẹ ikpehru na unu eva etẹmpol na. Emọ Anas buobu a jọ izerẹ ikpehru, yọ obọnana ọgọ riẹ Kayafas ọ rọ ọkwa na.

Ẹsejọhọ a kaki su Jesu kpohọ uwou Anas fikinọ ozerẹ okpehru ọyena o kri no evaọ uzuazọ egagọ ahwo Ju. Ẹwẹriẹ kpohọ uwou Anas na o tẹ kẹ Kayafas Ozerẹ Okpehru na oke nọ o re ro koko Sanhẹdrin na họ, okọto okpehru ahwo 71 ọrọ Ju na, re a jẹ gwọlọ isẹri erue.

Anas olori ozerẹ na ọ tẹ nọ Jesu onọ kpahe ilele riẹ gbe iwuhrẹ riẹ. Rekọ, Jesu ọ tẹ ta evaọ uyo nọ: “Mẹ ta vevẹ kẹ akpọ no; kẹse kẹse me je wuhrẹ eva uwou-egagọ gbe eva uwou egagọ-ode gbe eria nọ ahwo Ju a re koko họ kpobi; mẹ lẹlẹ ru oware ovo ho. Fikieme whọ jẹ nọ omẹ? Whọ nọ enọ i yo eme mẹ epanọ mẹ ta kẹ ae, keme enana e riẹ epanọ mẹ ta.”

Nọ ọ ta enẹ no, omọvo iletu nọ o dikihẹ kẹle Jesu ọ tẹ tehe iẹe ovao, anọ: “Ere who re yo kẹ olori izerẹ?”

Jesu ọ tẹ kuyo nọ: “Mẹ tẹ ta ẹme oyoma, who se isẹi uyoma na; rekọ o tẹ rọ nọ mẹ ta uwoma, eme whọ jẹ tehe omẹ?” Nọ a ta onana no, Anas o te vi Jesu avọ ifi nọ a rọ gbae bru Kayafas.

Oke nana, ilori izerẹ gbe ekpako na gbe ikere-ebe na, ẹhẹ, Sanhẹdrin na soso, a muhọ ekokohọ no. O wọhọ nọ uwou Kayafas a kokohọ. Re a guẹdhọ otiọye na evaọ aso Ọnyavrẹ o rọwo kugbe uzi ahwo Ju vievie he. Rekọ onana o whaha isu egagọ na ha no ẹjiroro omuemu rai.

Eka jọ nọ e vrẹ, nọ Jesu ọ kpare Lazarọs no uwhu ze, Sanhẹdrin na a jọ omoma rai gbae mu no nnọ o re whu hrọ. Yọ edẹ ivẹ evo nọ e vrẹ, eva Edesa-Oka, isu egagọ na a tẹ gbẹguae kugbe re a rọ ẹghẹ mu Jesu re a kpei. Dai roro iei, a brukpei no taure a te ti mu ẹdhọ riẹ họ eguo!

A mu oma họ ẹdawo no re a ruẹ isẹri nọ i ti se isẹri erue re a ruẹ oware nọ a re ro kru Jesu. Rekọ, a be ruẹ isẹri nọ e be ta unu ovo ho. Uwhremu na, imava e tẹ nya lahwe a tẹ ta nọ: “Ma yo nọ ọ jẹ ta nọ, ‘Mẹ rẹ raha uwou egagọ-ode onana nọ a rehọ abọ ru na, edẹ esa mẹ rẹ bọ ọfa nọ a rẹ rehọ abọ bọ họ.’ ”

Kayafas ọ tẹ nọ nọ: “Who wo uyo ovo nọ who re yo? Isẹi eme ahwo nana a se kpe owhẹ na?” Rekọ Jesu ọ j’ẹme he. Makọ evaọ isẹi erue enana, avọ omovuọ kẹ Sanhẹdrin na, isẹri na a be sae ta unu ovo ho. Fikiere ozerẹ okpehru na ọ tẹ dawo edhere ọfa.

Kayafas ọ riẹ epanọ u re duobọ họ ahwo Ju oma te re ohwo jọ ọ ta nọ Ọmọ Ọghẹnẹ ọ rọ. Isiava jọ nọ e vrẹ no, a brukpe Jesu nnọ o bi zue eme họ gbe nnọ o fo uwhu, nọ a roro thọthọ inọ o bi ru oma riẹ ẹrẹrẹ kugbe Ọghẹnẹ. Kayafas avọ ẹghẹ ọ tẹ ta nọ: “Mẹ rehọ Ọghẹnẹ uzuazọ na, bọwo owhẹ ehao, re whọ ta kẹ omai jọ owhẹ họ Kristi, Ọmọ Ọghẹnẹ na.”

Makọ oware nọ ahwo Ju a roro kẹhẹ, Jesu ghinọ Ọmọ Ọghẹnẹ. Yọ re o fibo a sae rehọ iẹe wọhọ nọ ọ vro nnọ Kristi ọ rọ. Fikiere Jesu avọ aruọwha o te yo nọ: “Mẹ họ ọye; wha rẹ te ruẹ Ọmọ ohwo nọ ọ rẹ te keria obọze Ogaga, nọ ọ rẹ te tha avọ igho ehru.”

Nọ ọ ta onana, Kayafas, avọ ọwhọ, ọ tẹ bẹre iwu dhoma o te bo nọ: “Ọ ta ẹme-aghọ. Fikieme ma jẹ gbẹ be guọlọ isẹri efa? Whaọ wha yo eme-aghọ riẹ na. Kọ ẹvẹ wha roro?”

Sanhẹdrin na a te bo nọ: “Ọ reabe uwhu.” A tẹ be rehọ iẹe jijehwẹ, a tẹ lae eka. A tẹ tehe iẹe ovao je nwoeya ku ei. Amọfa a te ruru ovao riẹ kpobi a tẹ rọ abọ fae be ta avọ ẹkoko nọ: “Whẹ Kristi na, ruẹaro kẹ omai! Ono ọ tehe owhẹ na?” Uruemu olahiẹ, othọthọ onana kpobi o roma via evaọ etoke ẹdhoguo aso na. Matiu 26:57-68; 26:3, 4; Mak 14:53-65; Luk 22:54, 63-65; Jọn 18:13-24; 11:45-53; 10:31-39; 5:16-18.

▪ Bovẹ a kaki su Jesu kpohọ, kọ eme ọ jọ obei via kẹe?

▪ Diẹse a wariẹ rọ Jesu kpohọ, kọ fikieme?

▪ Ẹvẹ Kayafas ọ sai ro ru re Sanhẹdrin na a bo nnọ Jesu o fo kẹ uwhu?

▪ Didi uruemu olahiẹ, othọthọ o via evaọ etoke ẹdhoguo na?