Uzou Avọ 92
A Siwi Emoti Ikpe Evaọ Oke Erẹ Urere Jesu Kpohọ Jerusalẹm
JESU ọ raha omodawọ Sanhẹdrin na nọ a gwọlọ kpei ẹkwoma eno Jerusalẹm o te kpohọ okpẹwho Ifremu, ẹsejọhọ wọhọ ikilomita 24 ọvo ro no ẹkpẹlobọ-ovatha-ọre Jerusalẹm. Obei ọ jọ kugbe ilele riẹ, siomano ewegrẹ riẹ.
Rekọ, oke ehaa Ọnyavrẹ ọrọ 33 C.E. o be kẹle, yọ u kri hi Jesu ọ tẹ jẹ ruọ edhere. Ọ tẹ nya orọ Sameria kpohọ Galili. Onana họ iweze urere riẹ kpohọ oria onana taure o te ti whu. Okenọ ọ jọ Galili, ẹsejọhọ tei te ilele riẹ a te kuomagbe amọfa enọ e rọ edhere bi kpohọ Jerusalẹm fiki ehaa Ọnyavrẹ na. A nya orọ ẹkwotọ Pẹrea, ovatha-ọre Ethẹ Jọdan.
Evaọ emuhọ erẹ na, okenọ Jesu ọ jẹ rueva iwhre jọ evaọ Sameria hayo Galili, ezae ikpe nọ i wo oti a tẹ nyaku ei. Ẹyao oyoma ọnana ọ rẹ re oma ohwo no—iziabọ riẹ, iziawọ riẹ, ezọ riẹ, unwe riẹ, gbe igbenu riẹ. Re a thọ amọfa no evo ẹyao ọnana, Uzi Ọghẹnẹ o ta kpahe ọmoti nọ: ‘O re ruru igbenu ehru riẹ o ve bo nọ, “Ọnọ ọ fo ho, ọnọ ọ fo ho!” Ọ rẹ jọ gbegbe rite okenọ ẹyao na o re kpo; ọ rẹ rria siomano amọfa.’
Emoti ikpe na a koko Uzi awhaha na kẹ emoti fikiere a tẹ rọ ugbothabọ no Jesu. Ghele na, a te je bo via gaga nọ: “Jesu, Olori, ohrọ mai o re owhẹ.”
Nọ ọ jọ ugbothabọ rue rai, Jesu ọ tẹ ta nọ: “Wha nya e rehọ oma ghrẹ izerẹ.” Jesu ọ ta onana keme Uzi Ọghẹnẹ o kẹ izerẹ na udu re a whowho ọmoti inọ ọ fo no otẹrọnọ ẹyao riẹ o kpo no. Kọ enẹ a rẹ rọ kẹ ahwo otiọye na uvẹ re a wariẹ lele ahwo omakpokpọ rria.
Emoti ikpe na a fievahọ ogaga iruo igbunu Jesu. Fikiere a tẹ dhẹ vẹrẹ vẹrẹ re a nya e ruẹ izerẹ na, dede nọ ẹyao rai o ri kpo ho. Okenọ a rọ edhere, ẹrọwọ nọ a wo fihọ Jesu o te ruiruo. A te muhọ ẹruẹ nnọ ẹyao rai o muhọ ekpo no!
Izii evaọ usu emoti nọ a ru fo no na a tẹ ruabọhọ onya rai, rekọ ọmoti ọdekọ na, ohwo Sameria, o te zihe ze be gwọlọ Jesu. Fikieme? Keme oware nọ o via kẹe na o were riẹ gaga. Ọ tẹ be rehọ urru oruarua jiri Ọghẹnẹ, yọ okenọ ọ ruẹ Jesu, o te kie fihọ aro riẹ, bi yere iei.
Evaọ uyo Jesu ọ tẹ ta nọ: ‘Ikpe na a ru fo? Kọ diẹse izii nọ i kiọkọ na e rọ? Kọ u te no ọrara ọnana no ọvuọvo ọ sai zihe ze te kẹ Ọghẹnẹ oro?’
Ọ tẹ ta kẹ ọzae Sameria na nọ: ‘Kparoma, whọ nya vrẹ, ẹrọwọ ra o si owhẹ no.’
Nọ ma te se kpahe Jesu nọ o siwi emoti ikpe na, ma rẹ kareghẹhọ oware nọ ma rẹ jọ onọ riẹ na wuhrẹ: ‘Kọ diẹse izii nọ i kiọkọ na e rọ?’ Ababọ uyere nọ izii na a dhesẹ yọ oruthọ ologbo. Kọ ma ti dhesẹ uyere kẹ eware nọ ma bi wo mi Ọghẹnẹ, wọhọ ohwo Sameria na, kugbe imuẹro eyaa uzuazọ ebẹdẹ bẹdẹ evaọ akpọ ọkpokpọ okiẹrẹe Ọghẹnẹ? Jọn 11:54, 55; Luk 17:11-19; Iruo-Izerẹ 13:16, 17, 45, 46; Eviavia 21:3, 4.
▪ Ẹvẹ Jesu ọ rọ raha omodawọ nọ a be rọ gwọlọ iẹe kpe?
▪ Oria ofa vẹ Jesu o ro kpohọ erẹ, kọ bovẹ ọ rọ ovao rri?
▪ Fikieme emoti na a je dikihẹ ugbothabọ, kọ fikieme Jesu ọ jẹ ta kẹ ai nọ a nya bru izerẹ na?
▪ Eme ma re wuhrẹ no oware onana nọ o via na ze?