Emoti Ikpe Jesu O Siwi Rekọ Ọvo O Yere i Rie

Jesu ọ kuvẹ re ẹgwae uwhu nọ ogbẹgwae Sanhẹdrin ọ gba kpahe iẹe na o rugba ha, fikiere o te kpohọ ẹwho Ifremu nọ ọ rrọ ẹkpẹlobọ ovatha-ọre Jerusalẹm. Obei ọyomariẹ avọ ilele riẹ a jọ, oria nọ ewegrẹ riẹ a rẹ jọ ruẹ e riẹ hẹ. (Jọn 11:54) Rekọ oke ehaa Ọnyavrẹ 33 C.E. o bi si kẹle, fikiere ọ be te wariẹ wọ onya. Ọ rọ ovao rri ofẹ ẹkpẹlobọ ovatha-ọre, ọ tẹ nya Sameria vrẹ bi kpobọ Galili, yọ onana họ orọ urere nọ o ti te eria nana taure o te ti whu.

Nọ Jesu o mu erẹ nana họ obọ nọ o je no iwhre ruọ iwhre, ọ ruẹ ezae ikpe jọ nọ i wo ẹyao oti. Ẹyao nana ọ rẹ rọ ẹmẹrera bru abọ sa-sa oma na no, wọhọ iziabọ, iziawọ hayo ezọ ohwo. (Ikelakele 12:10-12) Uzi nọ Ọghẹnẹ ọ rọ kẹ emọ Izrẹl o ta nọ ọmoti o re bo nọ, “ọnọ ọ fo ho, ọnọ ọ fo ho,” nọ ohwo ọ tẹ be nyabru rie ze, yọ ọ rẹ rria kugbe ahwo ho.—Iruo-Izerẹ 13:45, 46.

Fikiere, emoti ikpe na a jọ ugbothabọ, a kẹle Jesu hu. A te bo sei nọ: “Jesu, Owuhrẹ, jọ ohrọ mai o re owhẹ!” Nọ Jesu ọ ruẹ emoti na, ọ tẹ ta kẹ ae nọ: “Wha nyai dhesẹ oma rai kẹ izerẹ na.” (Luk 17:13, 14) Jesu ọ rọ enẹ dhesẹ nọ o wo adhẹẹ kẹ Uzi Ọghẹnẹ, onọ o ta nọ izerẹ họ enọ e rẹ ta sọ ahwo nọ a jẹ mọ oti vẹre a fo no hayo a re fo ho. Kẹsena a vẹ sae rria kugbe ahwo.—Iruo-Izerẹ 13:9-17.

Emoti ikpe na a riẹ nọ Jesu o wo ogaga nọ ọ sai ro siwi ae. Fikiere a tẹ ruọ edhere be nyabru izerẹ na dede nọ ẹyao rai o ri kpo oke oyena ha. Nọ a rrọ edhere na, ẹrọwọ nọ a fihọ Jesu ọ tẹ wha erere se ai. A tẹ ruẹ nọ ẹyao rai o bi kpo.

Nọ ẹyao rai o kpo no, ezae izii evaọ usu rai a tẹ ruabọhọ obonọ a be nya. Rekọ ọvo jọ o ru ere he. Ọzae nana nọ ọ rrọ ohwo Sameria nọ ẹyao oti riẹ o kpo no na, o te kuomarẹriẹ nyae gwọlọ Jesu. Fikieme? Oware nọ Jesu o ru kẹe na o da riẹ ẹro fia. Ọzae nana ọ tẹ be “rọ urru oruarua jiri Ọghẹnẹ,” keme ọ riẹ nọ ogaga Ọghẹnẹ a ro siwi ei na. (Luk 17:15) Nọ ọ ruẹ Jesu, o te kigwẹ fihọ aro riẹ bi yere iei.

Jesu ọ tẹ ta kẹ ahwo nọ a rrọ etẹe nọ: “Ikpe na a ru fo, o gbẹ rrọ ere? Kọ izii nọ i kiọkọ e rrọ? Kọ omọfa o gbe zihe ze te kẹ Ọghẹnẹ oruaro u te no ọzae nana nọ ọ rrọ ohwo orẹwho ofa na no?” Kẹsena Jesu ọ tẹ ta kẹ ọzae Sameria na nọ: “Kpama re who kpo; ẹrọwọ ra o siwi owhẹ no.”—Luk 17:17-19.

Emoti ikpe nọ Jesu o siwi na u dhesẹ nọ Jihova Ọghẹnẹ ọ rrọ kugbei. Whaọ obọnana, Jesu o siwi ọmoti nana no yọ u mu omai ẹro nọ o ti wo uzuazọ ebẹdẹ bẹdẹ. Ọghẹnẹ ọ gbẹ be rọ Jesu siwi ahwo nọ a be mọ evaọ edhere igbunu nẹnẹ hẹ. Rekọ, ma te fi ẹrọwọ họ Jesu, ma ti wo uzuazọ ebẹdẹ bẹdẹ re. Kọ ma be hai dhesẹ edẹro wọhọ epanọ ọzae Sameria na o ru na?