Uzou Avọ 94

Ẹgwọlọ Olẹ gbe Omarokpotọ

VẸRE, evaọ okenọ ọ jọ Judia, Jesu ọ tẹ kẹ ọtadhesẹ kpahe oghẹrẹ nọ u w’uzou te re a ruabọhọ olẹ. Enẹna, evaọ erẹ urere riẹ kpohọ Jerusalẹm, ọ tẹ wariẹ fiẹgbahọ ẹgwọlọ nọ ma rẹ rọ ruabọhọ olẹ. Ẹsejọhọ Jesu ọ gbẹ rọ Sameria hayo Galili okenọ ọ kẹ ilele riẹ ọtadhesẹ ọfa ọnana:

“Obruoziẹ jọ ọ jọ ẹwho jọ, ọ [rẹ] dhẹ Ọghẹnẹ hẹ, o [re] roro ohwo ho; ayeuku jọ ọ jọ eva ẹwho na, o te bi bru ei tha kẹse kẹse, nnọ, ‘Bruoziẹ mẹ me no obọ ọbe mẹ.’ Ọ kake jẹ rọwo ho; rekọ uwhremu na ọ tẹ jọ eva riẹ ta nọ, ‘Makọ mẹ dhozọ Ọghẹnẹ hẹ, me roro ohwo ho, rekọ fiki epanọ ayeuku ọnana ọ be kẹ omẹ uye, me re ti bruoziẹ riẹ no i obọ, re ọ se omẹ oma ba ẹ rọ fiki ẹtha riẹ kẹse kẹse.’ ”

Jesu ọ tẹ fotọ iku riẹ na, ta nọ: “Wha yo ẹme nọ obruoziẹ nọ okiẹrẹe he ọ ta na. Kọ Ọghẹnẹ o gbe bruoziẹ esanọ riẹ, e nọ i bi bo kẹ e te uvo te aso, kọ o re ti vu ai wa krẹkri?”

Orọnikọ Jesu ọ be ta nnọ Jihova Ọghẹnẹ ọ wọhọ obruoziẹ oyoma ọyena ha. Ukpoye, otẹrọnọ obruoziẹ oyoma ọ rẹ kuyo kẹ olẹ ukikiti, avro ọ riẹ hẹ nnọ Ọghẹnẹ, ọnọ o kiẹrẹe totọ je woma, ọ rẹ kuyo otẹrọnọ ahwo riẹ a siọ olẹ ba ha. Fikiere Jesu ọ tẹ gbẹ ta haro nọ: “Mẹ ta kẹ owhai, [Ọghẹnẹ] o re ti bruoziẹ rai vẹrẹ.”

Kẹse kẹse a rẹ rehọ ẹdhoguo-okiẹrẹe gbọ imiruori gbe iyogbere ogbọ, a ve rri edafe gbe enọ e ga aro. Rekọ orọnikọ Ọghẹnẹ ọ te ruẹ nọ a rehọ uye kẹ iyoma na ọvo ho rekọ u ti je mu ei ẹro nnọ a guẹdhọ idibo riẹ ziezi ẹkwoma uzuazọ ebẹdẹ bẹdẹ nọ ọ te rọ kẹ ai. Rekọ bro ahwo a ghinẹ rọwo nnọ Ọghẹnẹ o ti bruoziẹ ahwo riẹ vẹrẹ vẹrẹ?

Nọ ọ jẹ mae t’ẹme kpahe ẹrọwọ nọ o re lele ẹgba olẹ, Jesu ọ tẹ nọ nọ: “Rekọ nọ Ọmọ ohwo ọ te tha, kọ ọ rẹ te ruẹ ẹrọwọ eva akpọ na?” Dede nọ ọ kuyo onọ na ha, otọ riẹ u dhesẹ nnọ ẹrọwọ otiọye na u ti bu hu okenọ Kristi ọ te tha evaọ ogaga Uvie.

Evaọ usu ahwo nọ e be gaviezọ kẹ Jesu họ ejọ nọ i fievahọ ẹrọwọ rai. A fievahọ omobọ rai nnọ a kiẹrẹe, a te bi rri amọfa vo. O sae tubẹ jọ nọ ilele Jesu jọ dede a rọ usu ahwo nana. Fikiere ọ tẹ kpọ ọtadhesẹ ọnana bru ahwo itieye na:

“Imava i kpo obọ uwou egagọ-ode re a lẹ; ọ jọ ohwo otu Farisi, ọdekọ omiazọhọ. Ohwo otu Farisi na o te dikihẹ, ọ tẹ lẹ enẹ kẹ oma riẹ, nọ, ‘Ọghẹnẹ, me yere owhẹ epanọ mẹ wọhọ ahwo [edekọ] họ, ifruriọ, e nọ ikiẹrẹe he, ibruẹnwae, hayo tubọ wọhọ omiazọhọ ọnana. Mẹ rẹ siọ emuọriọ ba isiava ẹkpoka ọvo, mẹ be jẹ ẹkẹ eware nọ me bi wo kpobi’.”

A riẹ otu Farisi na kẹ odhesẹvia ẹrẹreokie ẹgbede rai re o were amọfa. Uzedhe edẹ emuọriọ-seba ọgbahọ obọrai họ Ẹdọvo-Oka gbe Edene-Oka kpobi, yọ a rẹ roma totọ hwa abọvo abakpe ẹmẹbe udhu rai. Emerae jọ nọ e vrẹ, a dhesẹ ọjẹfiẹ imiruori na via evaọ etoke Ehaa Uwou-Udhu na nọ a ta nọ: “Otu ọnana nọ e riẹ uzi ha na [koyehọ, epanọ otu Farisi na a fa uzi na fihọ], a bọwo rai ehao.”

Be ta ọtadhesẹ riẹ haro, Jesu ọ tẹ t’ẹme kpahe ahwo itieye nọ a ‘bọwo ehao’ na: “Rekọ omiazọhọ na, o dikihẹ ugbo thabọ, ọ sai bi ru re ọ kpare aro riẹ kpo ehru hu, rekọ ọ tẹ tehe igbama riẹ, anọ ‘Ọghẹnẹ, ohrọ mẹ [ọrahaizi] na, o re owhẹ.’ ” Fikinọ omiazọhọ na ọ rehọ omarokpotọ vuhu izieraha riẹ mu, Jesu ọ tẹ ta nọ: “Mẹ ta kẹ owhai nọ, ohwo ọnana ọnya kpo obọ uwou riẹ, o kiẹrẹe vi ohwo ọdekọ; keme kohwo kohwo nọ o re ti ruẹ oma ororo a re ti hrẹ i kpo otọ, rekọ ohwo nọ ọ rọ oma kpo otọ a re ti ru ei rua.”

Jesu ọ tẹ wariẹ fiẹgbahọ ẹgwọlọ omarokpotọ. Fikinọ a yọrọ e rai evaọ okegbe nọ otu Farisi nọ a jọ ẹro obọ rai kiẹrẹe na a bi jo kpomahọ amọfa gbe oria nọ ọkwa gbe omoro o jẹ rọ ikpeware, o rọ oware igbunu hu nnọ uruemu onana u kpomahọ ilele Jesu no dede. Ghele na, didi emamọ uwuhrẹ omarokpotọ Jesu o wuhrẹ! Luk 18:1-14; Jọn 7:49.

▪ Fikieme obruoziẹ nọ o kiẹrẹe he na ọ jẹ rehọ ẹgwọlọ aye-uku na kẹe, kọ eme ọtadhesẹ Jesu na o wuhrẹ omai?

▪ Didi ẹrọwọ Jesu ọ te gwọlọ okenọ ọ tẹ ze?

▪ Amono Jesu ọ kpọ ọtadhesẹ riẹ bru kpahe ohwo Farisi gbe omiazọhọ na?

▪ Didi uruemu ọ otu Farisi na ma rẹ whaha?