Jihova O Ti “Bruoziẹ”
“Kọ Ọghẹnẹ o gbe bruoziẹ esanọ riẹ e nọ i bi bo kẹ e te uvo te aso?”—LUK 18:7.
1. Amono a rrọ uduotahawọ kẹ owhẹ, kọ fikieme?
WARIẸ akpọ soso họ, Isẹri Jihova a be reawere usu kugbe ibe Ileleikristi rai nọ e be gọ Jihova avọ ẹrọwọ anwọ ikpe buobu ze na. Kọ whọ riẹ inievo eghaghae nana jọ? Ẹsejọhọ iroro ra e te nwani kpohọ oniọvo-ọmọtẹ Oleleikristi jọ nọ ọ rrọ ukoko rai nọ ọ kpako no, ọnọ ọ họ-ame anwọ ikpe buobu no nọ iwuhrẹ obọ Ọgwa Uvie e rẹ kaki vo ho. Iroro ra e jẹ sai kpohọ oniọvo-ọmọzae Oleleikristi jọ nọ ọ kpako no, ọnọ o re lele ukoko na kpohọ usiuwoma ota koka koka anwọ ikpe buobu ze. Ginọ uzẹme, o jọ iroro ibuobu inievo nana jọ nọ i wo ẹrọwọ na inọ enẹna yọ ẹmo Amagẹdọn o fi vrẹ no. Ghele na, fikinọ akpọ omuomu nana ọ re vrẹ hẹ, u bi whrehe evaifihọ nọ a wo kpahe eyaa Jihova ha gbe ọtamuo rai nọ a re ro “kiakọ te urere.” (Matiu 24:13) Ẹrọwọ ọgaga nọ idibo omurokpotọ Jihova yena a wo o rrọ uduotahawọ kẹ ukoko na soso.—Olezi 147:11.
2. Oghẹrẹ uruemu vẹ o be da omai?
2 Dede na, ma rẹ sae ruẹ nọ uruemu inievo efa u wo ohẹriẹ. Isẹri jọ a ru iruo odibọgba na ikpe buobu no, rekọ nọ oke o be nyaharo na a te whrehe no evaọ ẹrọwọ nọ a fihọ Jihova jẹ siọ oma ba ekugbe ukoko Ileleikristi na. O be da omai inọ ibe inievo Ileleikristi mai jọ vẹre a kiuke ku Jihova no, yọ o rrọ isiuru mai re ma gbẹ hai fi obọ họ kẹ “ogodẹ nọ o vru” re ọ ruẹsi zihe ziọ uthuru na. (Olezi 119:176; Ahwo Rom 15:1) Omake rrọ ere na, enọ jọ e rẹ ziọ omai iroro nọ ma te roro kpahe oware nọ ahwo jọ a be rọ yọrọ ẹrọwọ rai whawha, nọ ẹrọwọ otujọ o je bi whrehe nọ a bi ro kiuke ku ukoko na. Eme o bi fi obọ họ kẹ Isẹri buobu yọrọ ẹrọwọ nọ a fihọ eyaa Jihova nọ ẹrọwọ otujọ o bi ro whrehe? Eme mai omomọvo ọ rẹ sai ru re ma ruẹ nọ ma yọrọ imuẹro egaga nọ ma wo inọ “ẹdẹ ologbo ỌNOWO na” ọ be tha? (Zefanaya 1:14) Joma ta ẹme kpahe etadhesẹ ivẹ jọ nọ e rrọ Usiuwoma Luk.
Unuovẹvẹ kẹ Ahwo nọ A Rrọ Uzuazọ Evaọ Okenọ “Ọmọ Ohwo Ọ te tha”
3. Amono a rẹ mai wo erere no ọtadhesẹ aye-uku gbe obruoziẹ na ze, kọ fikieme?
3 Ma rẹ jọ Luk uzou avọ 18 ruẹ ọtadhesẹ ọrọ Jesu nọ o kiekpahe aye-uku avọ obruoziẹ jọ. O wọhọ ọtadhesẹ ohwo nọ ọrara ọ kpahe nọ ọ ruabọhọ jẹ yare na, onọ ma ta ẹme te evaọ uzoẹme nọ o vrẹ na. (Luk 11:5-13) Dede na, eme nọ e wariẹ oria Ikereakere na họ, onọ a jọ kẹ ọtadhesẹ ọrọ aye-uku gbe obruoziẹ na i dhesẹ nọ ọtadhesẹ nana o kiekpahe ahwo nọ a rrọ uzuazọ evaọ okenọ ‘ọmọ ohwo ọ rọ ze’ ogaga Uvie, etoke nọ o muhọ evaọ 1914.—Luk 18:8.a
4. Eme Jesu ọ ta ẹme kpahe taure ọ tẹ te kẹ ọtadhesẹ nọ ọ rrọ Luk uzou avọ 18 na?
4 Taure ọ tẹ te kẹ ọtadhesẹ na, Jesu ọ ta nọ a te jọ oria kpobi ruẹ oka nọ u ti dhesẹ nọ ọ ze no wọhọ Ovie, “wọhọ epanọ agbrara ọ rẹ va eva abọ ehru jọ o ve lo mu abọ ọdekọ otọ ehru na.” (Luk 17:24; 21:10, 29-33) Ghele na, ahwo buobu nọ a be rria evaọ “oke urere” na a te daezọ oka uvevẹ yena ha. (Daniẹl 12:4) Fikieme? Fiki ẹjiroro ọvona nọ o lẹliẹ ahwo edẹ Noa gbe Lọt jẹ unuovẹvẹ Jihova fiẹ na. Eva oke yena, ahwo ‘a jẹ re, a jẹ da, a jẹ dẹ, a jẹ zẹ, a jẹ kọ, a jẹ bọ iwou bẹsenọ ẹdẹ ọraha rai o ro te.’ (Luk 17:26-29) A ku uzuazọ rai fiẹ fikinọ a du oma le no họ iruẹru ikẹdẹ kẹdẹ rai te epanọ a rọ gaviezọ kẹ oreva Ọghẹnẹ hẹ. (Matiu 24:39) Epọvo na ahwo oke mai na a bi duoma le no họ iruẹru ikẹdẹ kẹdẹ, te epanọ a be rọ daezọ eka nọ i dhesẹ nọ ekuhọ eyero omuomu ọnana ọ kẹle no ho.—Luk 17:30.
5. (a) Amono Jesu ọ kẹ unuovẹvẹ, kọ fikieme? (b) Eme o ru nọ otujọ a ro ku ẹrọwọ rai fiẹ?
5 O rrọ vevẹ, o jọ ọdawẹ Jesu inọ ẹsejọhọ akpọ Setan ọ sai reghe iroro ilele riẹ, tube te epanọ a sai ro ‘zihe kpohọ eware nọ a nya seba.’ (Luk 17:22, 31) Yọ evaọ uzẹme, oware utiona o gine via kẹ Ileleikristi jọ no. Anwọ ikpe buobu ze na, a rẹro ẹdẹ nọ Jihova ọ te rọ raha akpọ omuomu ọnana bẹ no. Rekinọ a ruẹ nnọ ẹmo Amagẹdọn o fi evaọ oke nọ a rẹro riẹ hẹ, oma o tẹ lọhọ ai. Kẹsena ọwhọ nọ a je ro rẹro nọ ẹdẹ ẹdhoguo Jihova ọ kẹle no o te kiekpo. A te rolo obọ kẹ iruo odibọgba na jẹ rehọ ẹmẹrera duoma le no họ eware uzuazọ ikẹdẹ kẹdẹ te epanọ a gbe ro wo oke ziezi kẹ iruẹru abọ-ẹzi hi. (Luk 8:11, 13, 14) Nọ oke o be nya haro na, a te ‘zihe kpohọ eware nọ a nya seba’—u yoma kẹhẹ!
Oware nọ O jẹ Gwọlọ nọ Ma “Hẹlẹ Kẹse Kẹse”
6-8. (a) Gbiku aye-uku avọ obruoziẹ na. (b) Ẹvẹ Jesu ọ fotọ ọtadhesẹ na?
6 Eme ma rẹ sai ru nọ udufihọ nọ ma wo kpahe eyaa Jihova o jẹ seba ewhrehe? (Ahwo Hibru 3:14) Jesu ọ kuyo onọ yena nọ ọ nwane vẹvẹ ilele riẹ unu no inọ a du zihe kpohọ akpọ omuomu Setan he.
7 Luk ọ niyẹrẹ nọ, Jesu “o te bru ohare kẹ ae re a hẹlẹ kẹse kẹse [re] oma ose ae ba ẹrọ.” Jesu ọ ta nọ: “Obruoziẹ jọ ọ jọ ẹwho jọ, ọ dhẹ Ọghẹnẹ hẹ, o roro ohwo ho; ayeuku jọ ọ jọ eva ẹwho na, o te bi bru ei tha kẹse kẹse, nnọ, ‘Bruoziẹ mẹ me no obọ ọbe mẹ.’ Ọ kake jẹ rọwo ho; rekọ uwhremu na ọ tẹ jọ eva riẹ ta nọ, ‘Makọ mẹ dhozọ Ọghẹnẹ hẹ, me roro ohwo ho, rekọ fiki epanọ ayeuku ọnana ọ be kẹ omẹ uye, me re ti bruoziẹ riẹ no i obọ, re ọ se omẹ oma ba ẹ rọ fiki ẹta riẹ kẹse kẹse.’ ”
8 Nọ o gbiku na no, Jesu ọ tẹ fa otọ riẹ inọ: “Wha yo ẹme nọ obruoziẹ nọ okiẹrẹe he ọ ta na. Kọ Ọghẹnẹ o gbe bruoziẹ esanọ riẹ e nọ i bi bo kẹ e te uvo te aso, kọ o re ti vu ai wa krẹkri? Mẹ ta kẹ owhai, o re ti bruoziẹ rai vẹrẹ. Rekọ nọ Ọmọ ohwo ọ te tha, kọ ọ rẹ te ruẹ ẹrọwọ eva akpọ na?”—Luk 18:1-8.
“Bruoziẹ Mẹ Me No Obọ Ọbe Mẹ”
9. Uzoẹme vẹ u dhesẹ oma via evaọ ọtadhesẹ aye-uku gbe obruoziẹ na?
9 Ugogo uzoẹme ọtadhesẹ nana u dhesẹ oma via vevẹ. Te Jesu te enọ ọ tẹme te evaọ ọtadhesẹ na a dhunu te oware nọ o mae wuzou evaọ ikuigbe na. Aye-uku na ọ yare nọ: “Bruoziẹ mẹ me no obọ ọbe mẹ.” Obruoziẹ na ọ ta nọ: “Me re ti bruoziẹ riẹ no i obọ.” Jesu ọ tẹ ta nọ: “Kọ Ọghẹnẹ o gbe [ti] bruoziẹ esanọ riẹ?” Kẹsena Jesu ọ tẹ ta kpahe Jihova nọ: “O re ti bruoziẹ rai vẹrẹ.” (Luk 18:3, 5, 7, 8) Ugogo oke vẹ Ọghẹnẹ o ti ro “bruoziẹ esanọ riẹ?”
10. (a) Oke vẹ a rọ kioja ahwo Ọghẹnẹ erọ ikpe-udhusoi ọsosuọ? (b) Oke gbe oghẹrẹ vẹ a te rọ kioja idibo Ọghẹnẹ erọ oke mai na?
10 Evaọ ikpe-udhusoi ọsosuọ, “edẹ orukele” i te evaọ 70 C.E., okenọ a raha Jerusalẹm avọ etẹmpol riẹ. (Luk 21:22) A te kioja ahwo Ọghẹnẹ erọ oke mai na evaọ “ẹdẹ ologbo ỌNOWO na.” (Zefanaya 1:14; Matiu 24:21) Eva oke yena, Jihova ọ te “hwa osa kẹ enọ e be kẹ [idibo riẹ] uye” ẹkwoma Jesu Kristi nọ ọ te rọ “rehọ uye . . . kẹ enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.”—2 Ahwo Tẹsalonika 1:6-8; Ahwo Rom 12:19.
11. Ẹvẹ ẹdhoguo hayo oja-okiẹ o te rọ tha “vẹrẹ”?
11 Dede na, oghẹrẹ otoriẹ vẹ u fo nọ ma re wo kpahe uduotahawọ Jesu na inọ Jihova o ti bruoziẹ hayo kioja idibo riẹ “vẹrẹ”? Ẹme Ọghẹnẹ ọ ta inọ, dede nọ “[Jihova] o re thihakọ krẹkri,” ọ te kioja ahwo riẹ nọ oke na u te te. (Luk 18:7, 8; 2 Pita 3:9, 10) Evaọ oke Noa nọ Ẹvo ologbo na o ro ku, o raha oke re ahwo omuomu na a te whu hu. Epọvo na o jọ evaọ oke Lọt, nọ oso-erae ọ rrọ no odhiwu ze, irumuomu na a whu. Jesu ọ ta nọ: “Ere o rẹ te jọ ẹdẹ nọ a rẹ te rehọ Ọmọ ohwo via re.” (Luk 17:27-30) Epọvo na re, “idudhe na ọraha” o ti ro te ahwo omuomu. (1 Ahwo Tẹsalonika 5:2, 3) Evaọ uzẹme, ma rẹ sai fi eva kpobi họ inọ Jihova ọ te kuvẹ kẹ akpọ Setan re ọ rehọ ẹdẹ ọvo vrẹ epanọ uvi-oziẹ o gwọlọ họ.
“O re ti Bruoziẹ”
12, 13. (a) Eme ọtadhesẹ Jesu kpahe aye-uku avọ obruoziẹ na o wuhrẹ omai? (b) Fikieme o sai ro mu omai ẹro nọ Jihova o ti yo elẹ mai jẹ kioja kẹ omai?
12 Ọtadhesẹ Jesu ọrọ aye-uku avọ obruoziẹ na u fi elo họ ugogo oware ofa jọ re. Nọ ọ jẹ fotọ ọtadhesẹ na, Jesu ọ ta nọ: “Wha yo ẹme nọ obruoziẹ nọ okiẹrẹe he ọ ta na. Kọ Ọghẹnẹ o gbe bruoziẹ esanọ riẹ?” Eva uzẹme, orọnikọ Jesu ọ jẹ rehọ obruoziẹ na dhesẹ Jihova wọhọ ẹsenọ o re ru idibo riẹ epọvo na ha. Ukpoye, Jesu o je wuhrẹ ilele riẹ kpahe ohẹriẹ nọ o rrọ obruoziẹ na avọ Ọghẹnẹ. Idhere jọ vẹ a ro wo ohẹriẹ?
13 Obruoziẹ ọrọ ọtadhesẹ Jesu na “okiẹrẹe he,” rekọ “Ọghẹnẹ họ obruoziẹ okiẹrẹe.” (Olezi 7:11) Obruoziẹ na o wo uvumọ isiuru kpahe aye-uku na ha, rekọ Jihova o wo isiuru kpahe omai omomọvo. (2 Iruẹru-Ivie 6:29, 30) O ruọ obruoziẹ na re o fi obọ họ kẹ aye-uku na ha, rekọ o rrọ isiuru Jihova re o fi obọ họ—ẹhẹ, o bi tube mu ọwhọ—nọ ọ rẹ rọ dhogbo bru ahwo nọ a be gọe. (Aizaya 30:18, 19) Eme ma wuhrẹ no onana ze? Otẹrọnọ obruoziẹ nọ o kiẹrẹe he ọ gaviezọ kẹ aye-uku na jẹ kioja kẹe, ẹvẹ Jihova o re ti yo elẹ idibo riẹ, jẹ kioja kẹ ai te!—Itẹ 15:29.
14. Eme u gbe fo re ma si obọ no ẹrọwọ nọ ma wo kpahe ẹdẹ ẹdhoguo Ọghẹnẹ nọ ọ be tha na ha?
14 Fikiere, uzioraha ulogbo o rrọ kẹ ahwo nọ a si obọ no ẹrọwọ nọ a wo kpahe ẹdẹ ẹdhoguo Ọghẹnẹ nọ ọ be tha na. Fikieme jabọ? Fikinọ ẹrọwọ nọ a wo inọ “ẹdẹ ologbo ỌNOWO” ọ kẹle no ọ gbẹ ga ha, a tẹ be rehọ uruemu rai vro sọ a sai gbe fi eva họ Jihova inọ o ti ru eyaa riẹ gba. Rekọ ohwo ọvuọvo ọ rẹ sae vro ẹgbakiete Ọghẹnẹ hẹ. (Job 9:12) Onọ nọ u fo họ, Kọ mai omomọvo te sae yọrọ ẹgbakiete mai? Nwanọ oyena họ oware nọ Jesu o fi ẹgba họ evaọ ekuhọ ọtadhesẹ aye-uku avọ obruoziẹ na.
‘Kọ Ọ te Ginẹ Ruẹ Ẹrọwọ Otiọna eva Akpọ Na?’
15. (a) Onọ vẹ Jesu ọ nọ, kọ fikieme? (b) Onọ vẹ u fo nọ ma rẹ nọ oma mai?
15 Jesu ọ nọ onọ isiuru jọ: “Nọ Ọmọ ohwo ọ te tha, kọ ọ te ginẹ ruẹ ẹrọwọ otiọna eva akpọ na?” (Luk 18:8, NW ) Ẹme na “ẹrọwọ otiọna” u dhesẹ nọ thakpinọ ohwo o wo ẹrọwọ Jesu ọ jẹ ta ẹme kpahe na ha, rekọ ugogo oghẹrẹ ẹrọwọ jọ—otiọ ẹrọwọ aye-uku na. Jesu ọ kuyo onọ riẹ na ha. Ọ nọ onọ na re ilele riẹ a ruẹsi roro kpahe epanọ ẹrọwọ rai ọ ga te. Kọ o sae jọnọ ẹrọwọ rai o bi whrehe no ẹmẹrera, te epanọ a rẹ rọ jọ ọza ọrọ ezihe kpohọ eware nọ a nya seba no? Manikọ a wo otiọ ẹrọwọ aye-uku na? Epọvo na u fo nọ ma rẹ nọ oma mai nẹnẹ re inọ, ‘Oghẹrẹ ẹrọwọ vẹ “Ọmọ ohwo” ọ be ruẹ evaọ udu mẹ?’
16. Oghẹrẹ ẹrọwọ vẹ aye-uku na o wo?
16 Re ma ruẹse jọ ahwo nọ a te reawere uvi-oziẹ hayo nọ Jihova ọ te kioja kẹ, u fo nọ ma rẹ raro kele oriruo aye-uku na. Oghẹrẹ ẹrọwọ vẹ o wo? O dhesẹ ẹrọwọ riẹ ẹkwoma ‘obruoziẹ na nọ ọ jẹ nya bru kẹse kẹse, nnọ, “Bruoziẹ mẹ re me no obọ ọbe mẹ.” ’ Aye-uku na ọ ruabọhọ ayare riẹ re ọ sai wo uvi-oziẹ evaọ obọ obruoziẹ nọ o kiẹrẹe he. Epọvo na, idibo Ọghẹnẹ a rẹ sai fi eva họ nọ a ti wo uvi-oziẹ no obọ Jihova ze—o tẹ maki lehie vi epanọ a rẹro riẹ. Ofariẹ, nọ a tẹ be lẹ se Jihova kẹse kẹse—tube “bo kẹ e te uvo te aso,” u re dhesẹ nọ a fi eva họ eyaa Riẹ. (Luk 18:7) Eva uzẹme, nọ Oleleikristi o te serihọ nọ ọ gbẹ be lẹ kẹ uvi-ẹdhoguo ho, u re dhesẹ nọ o gbe wo evaifihọ họ inọ Jihova ọ te kioja idibo riẹ.
17. Ẹjiroro vẹ ma wo nọ ma rẹ rọ ruabọhọ olẹ jẹ yọrọ ẹrọwọ nọ ma wo kpahe ẹdẹ ẹdhoguo Jihova inọ ọ te seba ẹtha ha?
17 Oghẹrẹ uyero nọ aye-uku na ọ jọ u dhesẹ nọ ma wo ẹjiroro efa nọ ma rẹ rọ ruabọhọ olẹ ẹsikpobi. Muẹrohọ ohẹriẹ sasa nọ o rrọ oghẹrẹ uyero nọ ọ jọ gbe uyero mai. Aye-uku na ọ jẹ nya bru obruoziẹ na kẹse kẹse dede nọ uvumọ ohwo ọ jẹ ta udu họ iẹe awọ nọ o ru ere he, rekọ Ikereakere na e be ta udu họ omai awọ inọ ma hae “lẹ kẹse kẹse.” (Ahwo Rom 12:12) Imuẹro e jọ kẹ aye-uku na ha inọ a te kpahe fihọ ayare riẹ, rekọ Jihova ọ kẹ omai imuẹro nọ ọ te kioja kẹ omai. Jihova ọ rehọ ẹkwoma ọruaro riẹ ta nọ: “O tẹ rọ nọ u bi lehie, hẹrẹ iẹe; ọ rẹ seba ẹtha ha, ọ te raha oke he.” (Habakuk 2:3; Olezi 97:10) Aye-uku na o wo ohwo ọvuọvo nọ o re fi obọ họ kẹe lẹ re ayare riẹ o wo ẹgba ha. Rekọ ma wo Jesu, ofiobọhọ ologbo “nọ rọ obọze Ọghẹnẹ, nọ be ghinẹ hẹ lẹ kẹ omai.” (Ahwo Rom 8:34; Ahwo Hibru 7:25) Otẹrọnọ aye-uku nọ ọ jọ uyero obẹbẹ yena ọ jẹ nya bru obruoziẹ na kẹse kẹse avọ irẹro inọ a te kioja hayo bru uvi-oziẹ kẹe, kọ u gbe fo nọ ẹrọwọ mai ọ rẹ jọ gaga kpahe imuẹro inọ ẹdẹ ẹdhoguo Jihova ọ te seba ẹtha ha!
18. Ẹvẹ olẹ o rẹ rọ bọ ẹrọwọ mai ga je fi obọ họ kẹ omai wo uvi oziẹ-obro?
18 Ọtadhesẹ aye-uku na o wuhrẹ omai nọ olẹ gbe ẹrọwọ e jẹhọ ohwohwo, gbe inọ ma tẹ be lẹ kẹse kẹse o rẹ sai fi obọ họ kẹ omai mugba kẹ eware nọ e rẹ sai whrehe ẹrọwọ mai. Ginọ uzẹme, onana u dhesẹ nọ elẹ okafe gheghe i re ru nọ ma jẹ seba ewhrehe no ẹrọwọ mai hi. (Matiu 6:7, 8) Nọ ma tẹ be hae lẹ fiki ovuhumuo nọ ma wo inọ ma rẹ sai ru oware ovuovo ababọ obufihọ Ọghẹnẹ hẹ, olẹ o te hai si omai kẹle Ọghẹnẹ kpekpekpe jẹ bọ ẹrọwọ mai ga. Ẹrọwọ ọ roja gaga kẹ esiwo, agbẹta nọ Jesu ọ rọ ruẹ nọ u wuzou re ọ ta udu họ ilele riẹ awọ nnọ a “hẹlẹ kẹse kẹse [re] oma ose ae ba ẹrọ” na! (Luk 18:1; 2 Ahwo Tẹsalonika 3:13) Ginọ uzẹme, orọnikọ elẹ mai i ti ru nọ “ẹdẹ ologbo ỌNOWO na” o ti ro te he—te ma lẹ kpahiẹ hayo ma lẹ kpahe iẹe he, ọ te seba ẹtha ha. Rekọ to ma re ti wo aruoriwo Ọghẹnẹ jẹ jọ uzuazọ eva okenọ ẹmo Ọghẹnẹ o te fi vrẹ no hayo ma rẹ te zọ họ, o roma hwa ẹrọwọ mai, uzuazọ ẹrẹreokie nọ ma yeri, gbe elẹ mai.
19. Ẹvẹ ma re ro dhesẹ imuẹro inọ Ọghẹnẹ o ti “bruoziẹ esanọ riẹ”?
19 Wọhọ epanọ ma rẹ sae kareghẹhọ, Jesu ọ nọ inọ: “Nọ Ọmọ ohwo ọ te tha, kọ ọ te ginẹ ruẹ ẹrọwọ otiọna eva akpọ na?” Eme họ uyo onọ Jesu yena? Eva e were omai kẹhẹ inọ ima buobu erọ idibo Jihova nọ i wo ẹrọwọ wariẹ akpọ na họ nẹnẹ a be rehọ elẹ, odiri, gbe epanọ a dikihẹ ga te dhesẹ nọ a wo ẹrọwọ otiọnana! Fikiere, a rẹ sai yo Ee kẹ onọ Jesu na. Ẹhẹ, dede nọ akpọ Setan o bi kienyẹ omai evaọ idhere sasa enẹna, u mu omai ẹro gaga inọ Ọghẹnẹ o ti “bruoziẹ esanọ riẹ.”
[Oruvẹ-obotọ]
a Re whọ ruẹse riẹ otofa ọtadhesẹ nana ziezi, se Luk 17:22-33. Muẹrohọ epanọ a ta ẹme kpahe “Ọmọ ohwo” eva Luk 17:22, 24, 30 na gbe epanọ u ro wobọ kpahe onọ nọ a nọ evaọ Luk 18:8 na.
Kọ Whọ Kareghẹhọ?
• Eme Ileleikristi jọ a ro whrehe no ẹrọwọ rai?
• Fikieme ma sai ro wo ẹrọwọ ọgaga fihọ ẹtha ẹdẹ ẹdhoguo Jihova?
• Didi ẹjiroro ma wo nọ ma rẹ rọ ruabọhọ olẹ?
• Ẹvẹ olẹ nọ ma rẹ ruabọhọ u re ro fi obọ họ kẹ omai yọrọ ẹrọwọ mai?
[Uwoho nọ o rrọ ẹwẹ-obe avọ 18]
Eme o dhesẹ oma via evaọ ọtadhesẹ ọrọ aye-uku avọ obruoziẹ na?
[Iwoho nọ e rrọ ẹwẹ-obe avọ 21]
Ima ahwo buobu nẹnẹ a wo imuẹro inọ Ọghẹnẹ o ti “bruoziẹ esanọ riẹ”