Uzou Avọ 97

Iruiruo Evaọ Ọgbọ-Evaene

JESU ọ nwane ta no nọ: “Ibuobu nọ e rọ aro e rẹ te jọ emu, enọ e rọ emu e rẹ te jọ aro.” Re o dhesẹ onana o te gbiku jọ. O muhọ nọ: “Uvie odhiwu o wọhọ ohwo nọ o wo ighẹ, nọ ọ nyawa ohiohiẹ frifri re o zizie iruiruo kpo obọ ọgbọ ekakọ riẹ.”

Jesu ọ tẹ gbẹ taharo nọ: “Nọ [ọnọ o wo ighẹ na] avọ iruiruo na a rọwo no nọ usele okpẹdẹ, o te vi ai kpo obọ ọgbọ ekakọ riẹ. Ọtẹ jẹ nyawa ole auwa avọ esa, ọ tẹ ruẹ efa nọ i dikihẹ oria eki moyẹlẹ; ọ tẹ ta kẹ ae nọ, ‘Wha kpo obọ ọgbọ ekakọ na re, oware nọ ukiehọ, mẹ rẹ kẹ owhai.’ A tẹ nyavrẹ. Ọ tẹ jẹ nyawa ole auwa avọ ezeza gbe izii, [o te je ru] epa ọvo na. Ole auwa kpogbọvo ọ tẹ nyawa, ọ tẹ ruẹ efa nọ, i dikihẹ; ọ tẹ ta kẹ ae nọ, ‘Fikieme wha je dikihẹ etenẹ ẹdẹ ọna ọsoso [moyẹlẹ]?’ A tẹ ta kẹ e nọ, ‘Epanọ ohwo ọvo o zizie omai hi.’ Ọ tẹ ta kẹ ae nọ, ‘Wha nya kpo obọ ọgbọ ekakọ na re.’ ”

Ọnọ o wo ighẹ hayo ọgbọ-evaene na họ Jihova Ọghẹnẹ, yọ ọgbọ-evaene na họ orẹwho Izrẹl. Iruiruo evaọ ọgbọ-evaene na họ ahwo nọ a rọ ziọ ọvọ Uzi na; maero a rọ ahwo Ju nọ e jẹ rria edẹ ikọ na. Enọ i ti ruiruo okpẹdẹ vọvọ ọvo a lele ru agrimeti. Osa na họ usele kẹ iruo okpẹdẹ. Nọ “auwa avọ esa” na o rọ ighọjọ 9 ohiohiẹ na, enọ a se evaọ auwa avọ 3, 6, 9, gbe 11 na a ruiruo ọvuọvo euwa 9, 6, 3, gbe 1.

Iruiruo euwa 12 hayo ọrọ okpẹdẹ soso na họ isu ahwo Ju enọ e rọ iruo egagọ oke na kpobi. A wọhọ ilele Jesu hu, enọ i je ruiruo ikuori hayo iruo efa evaọ edẹ izuazọ rai kpobi vẹre. Rekọ ubrobọ uvewhru ọ 29 C.E. ọvo “ọnọ o wo ighẹ” na o ro vi Jesu Kristi ze re o koko ilele riẹ enana họ. Fikiere a te zihe ruọ erọ ‘uwhremu,’ hayo iruiruo auwa 11 evaọ ọgbọ-evaene na.

Uwhremu na, ekuhọ ẹdẹ iruo ẹwoho na o tẹ ze evaọ uwhu Jesu, oke u te te re a hwosa kẹ iruiruo na. A te lele uzi ọthobọ nọ a rẹ rọ kake hwosa kẹ ọnọ o whremu na, wọhọ epanọ ọ ta nọ: “Nọ owọwọ u te, olori ọgbọ ekakọ na ọ tẹ ta kẹ orieware riẹ nọ, ‘Se iruiruo na, whọ hwa osa rai kẹ ae, mu ai họ no uwhremu rite emuhọ.’ Nọ a nyaze, e nọ a zizie auwa kpogbọvo na, a te wo du ohwo usele. Nọ e rọ ọsosuọ e nyaze, a te roro nọ a ti wo vi ere; ai a te je wo du ohwo usele re. Nọ a wo i no a tẹ go kẹ ọ nọ o wo ighẹ na nọ, ‘Enọ iwhruemu na auwa ọvo a ru, who te ru ai ẹrẹrẹe te omai, enọ e mai ru iruo avọ ẹroro.’ Rekọ o te yo kẹ omọvo rai jọ nọ, ‘Ọzọ, me ru owhẹ thọ họ, whọ rọwo kẹ omẹ usele? Tọlọ o ra na, wha nyawa; o rọ omẹ eva nọ mẹ rẹ kẹ ọ nọ owhreumu na epanọ mẹ kẹ owhẹ re. U gbe fo nọ mẹ jọ oware obọ mẹ ru o rọ eva mẹ? [Hayo] manikọ wha be gua fiki ọghọ nọ me ru?’ ” Evaọ ekuhọ, Jesu ọ tẹ wariẹ ẹme ọsosuọ riẹ na, ta nọ: “Ere iwhruemu e rẹ te karo, ekaro i re ti whruemu.”

Ewo usele na o roma via, orọnikọ evaọ uwhu Jesu hu, rekọ eva Pẹntikọst 33 C.E., okenọ Kristi, “orieware” na, o ku ẹzi ọfuafo ku ilele riẹ. Ilele Jesu enana a wọhọ “iwhruemu,” hayo iruiruo ughọjọ 11 na. Orọnikọ usele na họ okẹ ẹzi ọfuafo na ha. Usele na yọ oware nọ ilele na a re ro ruiruo evaọ obọ otọakpọ obonẹ. O rọ oware nọ a rẹ rọ rria uzuazọ, uzuazọ ebẹdẹ bẹdẹ rai. O rọ ọghọ nọ a rẹ rọ jọ ọmọ Izrẹl abọ-ẹzi, ọnọ a wholo re ọ ta usiuwoma kpahe Uvie Ọghẹnẹ.

U kri hi ahwo nọ a zizie na a te muẹrohọ nọ a hwa ilele Jesu osa no, yọ a be rehọ usele ẹwoho rai na ruiruo. Rekọ a gwọlọ vi ẹzi ọfuafo gbe ọghọ Uvie nọ u lele i rie. Ẹgo gbe avro rai i dhesẹ oma via evaọ ukpokpoma nọ a rọ kẹ ilele Kristi, iruiruo “uwhremu” ọgbọ-evaene na.

Kọ orugba ikpe-udhusoi ọsosuọ na ọvo họ orugba ọtadhesẹ Jesu na? Ijo, isu-ichọche Kristẹndọm evaọ ikpe-udhusoi avọ 20 ọnana họ enọ e “karo” kẹ iruo evaọ ọgbọ-evaene ẹwoho Ọghẹnẹ fiki ọkwa gbe ewha-iruo rai. A rri etausiuwoma omarọkẹ nọ e rọ usu kugbe Watch Tower Bible and Tract Society na wọhọ erọ “uwhremu” nọ i ti wo emamọ ọkwa jọ evaọ iruo Ọghẹnẹ. Rekọ ahwo nana nọ isu-egagọ na a jẹfiẹ na họ enọ a kẹ usele na—ọghọ nọ a rẹ rọ ta usiuwoma wọhọ enyukọ Uvie odhiwu Ọghẹnẹ nọ a kẹ ẹzi. Matiu 19:30–20:16.

▪ Eme a rọ ọgbọ-evaene na dhesẹ? Ono a rehọ ọnọ o wo ọgbọ-evaene na dhesẹ gbe iruiruo ughọjọ 12 gbe ughọjọ 1 na?

▪ Okevẹ iruo okpẹdẹ ẹwoho na i kuhọ, kọ okevẹ a rọ hwosa?

▪ Eme a rehọ ẹhwa usele na dhesẹ?