Uzou Avọ 106

Ẹferevia Ẹkwoma Etadhesẹ Ọgbọ-Evaene

JESU ọ rọ eva etẹmpol na. U ri kri hi nọ o reghe isu egagọ na enọ e jẹ nọ re a riẹ udu ohwo nọ o bi ro ru eware. Nọ aro ọ gbẹ rọ ae reghereghe na, Jesu ọ tẹ nọ nọ: “Rekọ ẹvẹ wha roro?” Ọ tẹ rehọ ẹkwoma ọtadhesẹ dhesẹ oghẹrẹ ahwo nọ a ghinẹ rọ kẹ ai.

“Ọzae jọ o wo emọ ivẹ,” ere Jesu o gbe. “Nọ ọ nya bru ọrọ ọsosuọ na, ọ tẹ ta nọ, ‘Ọmọ, nya who ruiruo nẹnẹ evaọ ọgbọ-evaene na.’ Evaọ uyo ọnana ọ tẹ ta nọ, ‘Uwoma, olori,’ rekọ ọ nya ha. Nọ ọ nya bru ọrọ avivẹ na, ọ tẹ ta ẹme ọvo na kẹe. Evaọ uyo ọnana ọ tẹ ta nọ, ‘Mẹ be nya ha.’ Uwhremu na ẹme na o tẹ dae ọ tẹ nya.” Jesu ọ tẹ nọ nọ: “Ivẹ na ọvẹ o ru oreva ọsẹ riẹ?”—NW.

Erọ ewọsuọ riẹ a tẹ kuyo nọ: “Ọrọ avivẹ na.”—NW.

Fikiere Jesu ọ tẹ ta nọ: “Uzẹme mẹ ta kẹ owhai, imiazọhọ gbe igberedha a rẹ te kake rọ owhai ruọ uvie Ọghẹnẹ.” Imiazọhọ gbe igberẹ na a kake se vẹre nọ a rẹ gọ Ọghẹnẹ hẹ. Rekọ wọhọ ọmọ avivẹ na, a te kurẹriẹ a tẹ gọe. Evaọ abọdekọ riẹ, isu egagọ na, wọhọ ọmọ ọsosuọ na, a ta nnọ a be gọ Ọghẹnẹ, ghele, wọhọ epanọ Jesu o muẹrohọ: “Jọn [Ọhọahwo-Ame na] ọrọ edhere okiẹrẹe, bru owhai ze, wha rọwo riẹ hẹ, rekọ imiazọhọ gbe igberedha e rọwo riẹ; rekọ owhai nọ wha rue riẹ wha ku eva rẹriẹ uwhremu na gbe he re wha rọyẹe.”

Jesu o te dhesẹ inọ ekie isu egagọ na orọnikọ a bi gbabọkẹ ẹgọ Ọghẹnẹ ọvo ho. Ijo, a rọ eva yoyoma, a rọ muomu. Jesu ọ tẹ ta nọ: “Ọnọ o wo ighẹ jọ ọ jọ. Ọ tẹ kọ ọgbọ ekakọ, o te di ogba wariẹ e, ọ tẹ tọ umi udi eva riẹ ọ tẹ bọ uwou ukpehru jọ, ọ jẹrehọ iẹ kẹ ewhẹrẹ o te kpo orẹwho ofa. Nọ ezi ibi ọkẹle no, o te vi idibo riẹ bru ewhẹrẹ na re a rehọ ibi riẹ; ewhẹrẹ na e tẹ rehọ idibo riẹ, a fa ọjọ, a kpe ọjọ, a tẹ rehọ itho fi ọdekọ kpe. O te je vi idibo efa vi erọ ọsosuọ; a te je ru ai epa ọvo na.”

“Idibo” na họ eruẹaro nọ “ọnọ o wo ighẹ” na, Jihova Ọghẹnẹ, o vi bru “ewhẹrẹ” “ọgbọ ekakọ” riẹ. Ewhẹrẹ enana họ isu orẹwho Izrẹl, orẹwho nọ Ebaibol na ọ fodẹ wọhọ “ọgbọ ekakọ” Ọghẹnẹ.

Nọ “ewhẹrẹ” na a lahiẹ je kpe “idibo” na, Jesu ọ tẹ ta nọ: “Uwhremu na [ọnọ o wo ọgbọ-evaene na] o te vi ọmọzae riẹ bru ai, nnọ, ‘A te kẹ ọmọ mẹ orro.’ Rekọ nọ ewhẹrẹ na e ruẹ ọmọ na, ayaye a tẹ ta nọ, ‘Ọnwara na ọ na, nyaze, ma kpei re ma rehọ uku riẹ.’ A tẹ rehọ iẹ a je fiei họ [otafe] ọgbọ ekakọ na, a je kpei.”

Whaọ, nọ ọ rẹriẹ ovao ku isu egagọ na, Jesu ọ tẹ nọ nọ: “Nọ olori ọgbọ ekakọ na ọ tẹ [nyaze], ẹvẹ o re ru ewhẹrẹ na?”

Isu egagọ na a te yo nọ: “Ọ te rọ umuomu kpe ahwo omuomu na, ọ rẹte rehọ ọgbọ ekakọ na kẹ ewhẹrẹ efa enọ e rẹ te kẹe ibi eva ezi rai.”

A tẹ rehọ ere rọ ogbori bruoziẹ kpe oma rai, keme ae oma rai a rọ udevie emọ Izrẹl nọ e rọ “ewhẹrẹ” ọ “ọgbọ ekakọ” orẹwho Izrẹl nọ Jihova o woi. Ubi nọ Jihova o rẹro nọ ewhẹrẹ enana a rẹ mọ họ ẹrọwọ nọ a re fihọ Ọmọ riẹ, Mesaya na. Fikinọ a mọ ibi enana ha, Jesu ọ tẹ vẹvẹ unu nọ: “Kọ wha ri se eva ikere [eva Olezi 118:22, 23] nọ: ‘Utho nọ ebọ-uwou e se oyena a ro ruẹ o rọ uzou ubienẹ; o bọ Ọnowo na onana u nọ ze, u te mu urirẹ evaọ aro mai’? Fikiere mẹ ta kẹ owhai nọ, a re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ. [Ọ nọ okie fihọ ehru utho onana ọ rẹ pẹhẹ ehehẹhẹ: rekọ ohwo nọ u re ti kie fihọ, o rẹte vahiẹ.]”

Ikere-ebe gbe ilori izerẹ na a te ti vuhumu nnọ Jesu ọ be t’ẹme na kpahe ai, a tẹ gwọlọ nọ a re kpei, uvi “ọnwara” na. Fikiere a ti mi ai uvẹ nọ a rẹ rọ jọ isu evaọ Uvie Ọghẹnẹ no wọhọ orẹwho, a vẹ te ma orẹwho okpokpọ orọ ‘ewhẹrẹ egbọ ekakọ,’ ọnọ ọ te mọ emamọ ibi.

Fikinọ ozọ ogbotu na u bi mu isu egagọ na, enọ e rehọ Jesu wọhọ ọruẹaro, a daoma nọ a re kpei evaọ onana ha. Matiu 21:28-46; Mak 12:1-12; Luk 20:9-19; Aizaya 5:1-7.

▪ Amono emọ ivẹ erọ ọtadhesẹ ọsosuọ Jesu na i dikihẹ kẹ?

▪ Evaọ ọtadhesẹ avivẹ na, ono a rehọ “ọnọ o wo ighẹ” na, “ọgbọ ekakọ” na, “ewhẹrẹ na,” “idibo” na, gbe “ọnwara na” dhesẹ?

▪ Eme ọ te via kẹ ‘ewhẹrẹ ọgbọ ekakọ’ na, kọ ono o ti nwene ai?