Uzou Avọ 99

Jesu O Wuhrẹ eva Jeriko

U KRI hi Jesu avọ ogbotu nọ e rọ kugbei a te te Jeriko, onọ o rọ okpẹwho nọ o rọ ole onya okpẹdẹ no Jerusalẹm. O wọhọ nọ Jeriko yọ okpẹwho agbava, okpẹwho anwae ahwo Ju nọ o rehọ ole ikilomita ọvo gbe ubro ro thabọ no okpẹwho Rom ọkpokpọ na. Nọ ogbotu na a no okpẹwho anwae na bi kpohọ ọkpokpọ na, eyareware ituaro ivẹ jọ a te yo edo na. Odẹ omọvo rai jọ Batimiọs.

Nọ a yo nọ Jesu họ ọnọ ọ be nyavrẹ na, Batimiọs avọ ogbẹnyusu riẹ a te muhọ ebo nọ: “Ọmọ Devidi, ohrọ mai o re owhẹ.” Nọ ogbotu na a whọku ai nọ a fibo, a te bo ga viere: “Olori, Ọmọ Devidi, ohrọ mai o re owhẹ.”

Nọ o yo ekpokpo na, Jesu o te dikihẹ. Ọ tẹ ta kẹ enọ e rọ kugbei inọ a se enọ i bi bubo na ze. Enana a tẹ nyabru eyareware ituaro na a tẹ ta kẹ omọvo rai jọ nọ: “Ghọghọ; kparoma, o bi se owhẹ.” Avọ oghọghọ ulogbo, ọzae otuaro na o te gbolo ehọ no oma riẹ, o te duola kparoma, ọ tẹ nya bru Jesu.

Jesu ọ tẹ nọ nọ: “Eme wha guọlọ nọ me ru kẹ owhai?”

Ezae ituaro ivẹ na a tẹ lẹ nọ: “Olori, [ru] re a rovie aro mai.”

Avọ ohrọ, Jesu ọ tẹ kaobọ te aro rai. Wọhọ epanọ ekere Mak u fi rie họ, Jesu ọ ta kẹ omọvo rai jọ nọ: “Nyavrẹ; ẹrọwọ ra o si owhẹ no.” Idudhe na aro eyareware ituaro na i te rovie, yọ ababọ avro aimava a te muọ Ọghẹnẹ họ ejiro. Nọ ahwo na kpobi a ruẹ oware nọ o via, a te je jiri Ọghẹnẹ. Ababọ okioraha, Batimiọs avọ ogbẹnyusu riẹ a te mu Jesu họ elele.

Nọ Jesu ọ be nya Jeriko vrẹ, ogbotu na o te bu thesiwa. Ohwo kpobi ọ gwọlọ ruẹ ohwo nọ o siwi ezae ituaro na. Ahwo na a bi tunye n’ofẹ t’ofẹ bru Jesu ze, fikiere ahwo jọ a be sae gbẹro ku ei dede he. Usu enana họ Zakiọs, olori imiazọhọ evaọ Jeriko gbe ekẹloma riẹ. Ọ kpẹre hrọ re ọ sae ruẹ oware nọ o be via.

Fikiere Zakiọs ọ tẹ dhẹ kparo ọ tẹ gadiẹ ure ojo-mọlbẹri evaọ edhere nọ Jesu ọ te nya vrẹ. Evaọ oria ukpehru onana, ọ tẹ jẹ ruẹ eware kpobi vevẹ. Nọ ogbotu na a be kẹle na, Jesu o te se kpohọ ure na nọ: “Zakiọs, ru vẹrẹ who nwrotọ; keme mẹ rẹ te ria uwou ra nẹnẹ.” Zakiọs o te nwrotọ avọ oghọghọ ọ tẹ họrọ kpohọ obọ uwou re ọ ruẹrẹ eware kpahe kẹ obọdẹ ọrara riẹ.

Rekọ, nọ ahwo na a ruẹ oware nọ o be via, a te muhọ ẹgo. A roro i rie nọ o rẹ thọthọ re Jesu ọ kpahe ohwo otiọye na. Whaọ, Zakiọs o fe fiki igho ofruriọ evaọ iruo osa-uzou umio riẹ.

Ahwo buobu a rọ usu riẹ, yọ okenọ Jesu ọ rueva uwou Zakiọs, a te gu inoma nọ: “Ọ be te nya ekpaha ohwo nọ ọ rọ ọrahaizi.” Rekọ Jesu ọ jọ oma Zakiọs ruẹ irẹro ekurẹriẹ. Yọ a ru Jesu oma vo ho, keme Zakiọs o dikihẹ o te whowho nọ: “Ri, Olori, abọ ọvo eware mẹ, mẹ rẹ rọ kẹ iyogbere; re me [te] mi ohwo jọ thọ, me re zihe kẹ e akua ane.”

Zakiọs o dhesẹ inọ ekurẹriẹ riẹ emamọ ẹkwoma abọ ekwakwa riẹ nọ ọ rọ kẹ iyogbere gbe abọ ọdekọ nọ ọ rẹ rọ hwosa enọ o gboro igho mi. Ẹsejọhọ ọ sae jọ obe ọ azọhọ riẹ kele unuigho nọ o kru ahwo nana. Fikiere ọ tẹ yaa inọ ọ te hwosa kẹ ai akuane, rọwo kugbe uzi Ọghẹnẹ nọ o ta nọ: ‘Otẹrọnọ ohwo o tho ogodẹ, ọ rẹ rehọ igodẹ ene hwosa riẹ.’

Oghẹrẹ nọ Zakiọs ọ ta nọ ọ te ghale ekwakwa riẹ o were Jesu, keme Ọ ta nọ: “Nẹnẹ na esiwo ọ ze uwou onana, keme ọ rọ ọmọ Abraham re. Keme Ọmọ ohwo ọ ze te guọlọ [re] o siwi ọnọ ovru na.”

Kẹle na, Jesu ọ fodẹ eyero ‘ọnọ o vru’ evaọ iku ọmọ ogbọfariẹ riẹ. Whaọ ma jọ etenẹ wo oriruo ọnọ o vru nọ a ruẹ no. Dede nọ isu egagọ na gbe ahwo nọ a lele i rai a be go je gu inoma kpahe ovao nọ Jesu ọ rọ kẹ ahwo wọhọ Zakiọs, Jesu ọ gbẹ be gwọlọ emọ Abraham enana nọ i vru re o je zihe ai ze. Matiu 20:29-34; Mak 10:46-52; Luk 18:35–19:10; Ọnyano 22:1.

▪ Diẹse o wọhọ nọ Jesu ọ jẹ ruẹ eyareware ituaro na, kọ eme o ru kẹ ai?

▪ Ono họ Zakiọs, kọ fikieme ọ jẹ gadiẹ ure?

▪ Ẹvẹ Zakiọs o ro dhesẹ ekurẹriẹ riẹ?

▪ Eme ma sai wuhrẹ no oghẹrẹ nọ Jesu o ro yeri kugbe Zakiọs ze?