Uzou Avọ 113

Omarokpotọ eva Ọnyavrẹ Urere Na

PITA avọ Jọn, evaọ otọ uthubro Jesu, a te Jerusalẹm no re a ruẹrẹ eware họ kẹ Ọnyavrẹ na. Jesu, ẹsejọhọ avọ ikọ ikpe edekọ na, a tẹ nyate obei oke uvo. Ọre na o muhọ ekiediwi no nọ Jesu avọ ikọ riẹ a ruotọ no Ugbehru Olivi na. Onana họ ẹdẹ urere nọ Jesu ọ te ruẹ okpẹwho na no ugbehru onana ze bẹsenọ ọ te rọ kparoma ze.

U kri hi Jesu avọ ahwo riẹ a te te okpẹwho na a tẹ rọ ovao rri uwou nọ a ti jo ru Ọnyavrẹ na. A gadiẹ kpohọ ubrukpẹ ulogbo obehru na, oria nọ a jọ ruẹ nọ a ruẹrẹ eware kpobi họ no kẹ ehaa idhere Ọnyavrẹ rai. Jesu o bi rẹro ehaa nana anwẹdẹ, wọhọ epanọ ọ ta nọ: “Mẹ guọlọ hrọ re me lele owhai re [ọnyavrẹ] na re mẹ tẹ ruẹ uye.”

Wọhọ epanọ o rọ notọ ze, enọ i bi ru Ọnyavrẹ na a rẹ da igho udi ene. Nọ ọ rehọ egho avesa na no, Jesu ọ tẹ lẹ ọ tẹ ta nọ: “Wha rehọ onana re wha ghale iẹe; keme mẹ ta kẹ owhai nọ, no umuona vrẹ mẹ gbẹ te da udi ubi okakọ họ bẹsenọ [uvie] Ọghẹnẹ o rẹ te tha.”

Evaọ udevie ehaa na, Jesu ọ tẹ kparoma, ọ tẹ ba ewu ehru riẹ no, ọ tẹ tọlọ omokpa, o te ku ame fihọ odhe. Wọhọ epanọ o rẹ jọ, ọnowighẹ ọ rẹ wozẹ awọ ọrara riẹ. Rekọ nọ ọnowighẹ ọ rọ etenẹ hẹ na, Jesu ọvo o te ru iruo na. Omọvo ikọ na jọ ọ hae rehọ udu obọ riẹ ru ei; ghele na, ẹsejọhọ fikinọ omahrowo jọ o gbẹ dina rọ udevie rai, ohwo ọvo o ru rie he. Whaọ oma o tẹ vo ai nọ Jesu o mu awọ rai họ ẹwozẹ.

Okenọ Jesu ọ wozẹ tei oma, Pita ọ tẹ se: “Whọ rẹ sai wozẹ awọ mẹ vievie he.”

Jesu ọ tẹ ta nọ: “Mẹ gbẹ wozẹ owhẹ hẹ, who wo abọ ọvo kugbe omẹ hẹ.”

Pita ọ tẹ kuyo inọ: “Olori, awọ mẹ ọvo ho rekọ te abọ mẹ jegbe uzou mẹ!”

Jesu ọ tẹ kuyo nọ: “Ọnọ ọ họ no o re ru vi awọ ọwozẹ hẹ, rekọ ọ fure no; whaọ wha fure no, rekọ whai kpobi hi.” Ọ ta enẹ keme ọ riẹ nnọ Judas Iskariọt ọ be gbẹguae nọ o re ro vivie ei.

Nọ Jesu ọ wozẹ awọ 12 na kpobi no, kugbe ọnọ o ti viviei, Judas, o te ku ewu riẹ họ ọ tẹ wariẹ keria. Ọ tẹ nọ nọ: “Wha riẹ epanọ me ru kẹ owhai na? Wha bi se omẹ owuhrẹ gbe Olori; wha riẹ se, keme ere mẹ rọ. Kọ otẹrọnọ mẹ nọrọ Olori gbe owuhrẹ ọ wozẹ awọ rai, ufore whai ohwo ọ wozẹ awọ ohwo re. Keme mẹ kẹ owhai oriruo no, re wha ru epanọ me ru kẹ owhai na re. Uzẹme uzẹme, mẹ ta kẹ owhai, odibo ọ rẹ ro vi olori riẹ hẹ; hayo ọnọ a vi ọ rẹ ro vi ọnọ o vi rie gbe he. Wha tẹ [riẹ] eware nana wha te ru ai, wha re wo oghale.”

Ẹvẹ uwuhrẹ onana u woma te ọrọ iruo omarokpotọ! Ikọ na a rẹ gwọlọ oria ọsosuọ họ, bi roro nọ a rọ oja te epanọ amọfa a rẹ rọ gbodibo kẹ ai ẹsikpobi. U fo re a lele oriruo Jesu. Uwuhrẹ na orọnikọ re a hae wozẹ awọ amọfa ha. Ijo, rekọ orọ unevaze nọ a rẹ rọ gbodibo ababọ ọriẹwẹ, makọ epanọ iruo na e kawo jẹ kare-isiuru te. Matiu 26:20, 21; Mak 14:17, 18; Luk 22:14-18; 7:44; Jọn 13:1-17.

▪ Eme u siuru evaọ eriwo Jesu ọrọ Jerusalẹm okenọ ọ jẹ ruọ okpẹwho na re o ru Ọnyavrẹ na?

▪ Evaọ etoke Ọnyavrẹ na, didi egho Jesu ọ wọ kẹ ikpe 12 na nọ ọ lẹ no?

▪ Didi iruo unevaze o jọ uruemu nọ a re ru kẹ erara okenọ Jesu ọ jọ otọakpọ, kọ fikieme a gbe ru ei hi okenọ Jesu avọ ikọ riẹ a je ru Ọnyavrẹ na?

▪ Eme o jọ ẹjiroro Jesu nọ o ro ru iruo ekakao ọrọ ẹwozẹ awọ ikọ riẹ na?