Uzou Avọ 112

Ọnyavrẹ Urere Jesu Ọ Kẹlino

NỌ EDIVẸ-OKA, Nisan 11, u bi te ekuhọ na, Jesu o te te oba ewuhrẹ ikọ riẹ evaọ Ugbehru Olivi. Ẹvẹ ẹdẹ na o bu iruo jẹ bẹ te! Whaọ, ẹsejọhọ nọ o je zihe kpohọ Bẹtani nọ ọ be te wezẹ, ọ tẹ ta kẹ ikọ riẹ nọ: ‘Wha riẹ nọ edẹ ivẹ e tẹ vrẹ no Ọnyavrẹ na o ti te, yọ a te rọ Ọmọ ohwo kẹ re a kpei.’

Ẹsejọhọ Jesu ọ raha okiokiọ riẹ, Edesa-Oka, Nisan 12, evaọ eriosehọ kugbe ikọ riẹ. Evaọ ẹdẹ nọ o kpemu na, ọ whọku isu egagọ na evaọ ẹgbede, yọ ọ riẹ nọ a be gwọlọ iẹe kpe. Fikiere eva Edesa-Oka o dhesẹ oma riẹ via ha, keme ọ gwọlọ nọ oware ovo o whaha Ọnyavrẹ na ha kugbe ikọ riẹ evaọ owọwọ n’otha na.

Oke nana, ilori izerẹ gbe ekpako na a kokohọ etegu ọ Kayafas ozerẹ okpehru na no. Avọ evedha fiki ẹwhọ nọ Jesu ọ whọku ai odẹ n’ukpo na, a tẹ gbẹguae re a rọ ẹghẹ mu ei re a kpei. Ghele na a be ta nọ: “Udevie eha na ha, re ozighi ọ seba ẹvia udevie ahwo na.” Ozọ ahwo na u bi mu ai, keme Jesu ọ be were ai.

Nọ isu egagọ na a be gbẹguae emuemu rai re a kpe Jesu na, ọrara jọ ọ tẹ kpahe ai. Avọ igbunu, ọrara na yọ omọvo ikọ Jesu, Judas Iskariọt, ọnọ Setan ọ kọ ibi họ eva no re o vivie Olori riẹ! Ẹvẹ eva e were rai te nọ Judas ọ nọ nọ: “Eme wha rẹ kẹ omẹ, [otẹrọnọ] mẹ rehe riẹ kẹ owhai?” A tẹ ghọghọ nnọ a rẹ kẹe ewẹ isiliva 30, unuigho ọrigbo wọhọ epanọ ọvọ Uzi Mosis o ta. No umuo oke oyena vrẹ, Judas ọ tẹ be gwọlọ emamọ oke nọ o re ro vivie Jesu evaọ idhere.

Nisan 13 o muhọ eva ukiediwo-ọre Edesa-Oka. Jesu o no Jeriko ze Edisoi-Oka, fikiere onana họ aso avọ ezeza gbe orọ urere nọ ọ be raha evaọ Bẹtani na. Okiokiọ riẹ, Edene-Oka, a te ruẹrẹ eware kpobi họ kẹ Ọnyavrẹ na, onọ u ti muhọ evaọ ukiediwo-ọre. Okioye a re ro kpe omogodẹ Ọnyavrẹ na a vẹ jẹ rehọ oma riẹ kpobi tọ. Kọ diẹse a ti jo ru ehaa na, kọ ono ọ te ruẹrẹ eware na họ?

Jesu ọ re ta kpahe eme enana ha, ẹsejọhọ re Judas ọ siọ ilori izerẹ na ba ẹvuẹ re a siọ Jesu ba emu evaọ etoke Ọnyavrẹ na. Rekọ enẹna, ẹsejọhọ eva emuhọ uvo Edene-Oka, Jesu o te vi Pita avọ Jọn no Bẹtani, ta nọ: ‘Wha nya e ruẹrẹ ehaa ọnyavrẹ na họ kẹ omai re ma re.’

A tẹ nọ nọ: “Bovẹ whọ guọlọ nọ ma jọ ruẹrẹ iẹ kpahe?”

Jesu ọ tẹ ta nọ: “Nọ wha te ruọ eva ẹwho na, ohwo nọ ọ wha ẹbẹ ame o re ti zere owhai; wha lele ie ruọ uwou nọ ọ rẹ te ruọ eva. Wha vẹ ta kẹ ọnowighẹ na nọ, ‘Owuhrẹ ọ ta kẹ owhẹ nọ, diẹse uwou erara orọ, o nọ mẹ avọ ilele mẹ a jẹ te re [ọnyavrẹ] na?’ O re ti dhesẹ ubruwou ehru nọ eware kpobi e jọ gba unu kẹ owhai; wha ruẹrẹ etẹe.”

Avro ọ riẹ hẹ inọ ọnowighẹ na yọ olele Jesu gbe ọnọ o bi rẹro ayare Jesu re a jọ uwou riẹ ru ehaa obọdẹ onana. Epanọ o rọ kpobi, okenọ Pita avọ Jọn a te Jerusalẹm, a tẹ ruẹ eware kpobi nwanọ epanọ Jesu ọ ruẹaro riẹ. Fikiere aimava na a tẹ ruẹ nnọ a ruẹrẹ omogodẹ na kpahe no gbe ọruẹrẹkpahe edekọ kpobi kẹ ẹruọsa ẹgwọlọ ahwo 13 nọ i ti ru Ọnyavrẹ na, Jesu avọ ikọ 12 riẹ. Matiu 26:1-5, 14-19; Mak 14:1, 2, 10-16; Luk 22:1-13; Ọnyano 21:32.

▪ Eme o wọhọ nọ Jesu o ru evaọ Edesa-Oka, kọ fikieme?

▪ Didi ẹguae a gba evaọ uwou ozerẹ okpehru na, kọ fikieme Judas o ro weze bru isu egagọ na?

▪ Amono Jesu o vi ruọ Jerusalẹm evaọ Edene-Oka, kọ fikieme?

▪ Eme ahwo nana nọ a vi na a ruẹ nnọ o wariẹ dhesẹ ogaga igbunu Jesu?