Uzou Avọ 114

Emu Owọwọ Ekareghẹhọ Na

NỌ JESU ọ wozẹ awọ ikọ riẹ no, ọ tẹ fodẹ ikereakere nọ o rọ Olezi 41:9, nọ o ta nọ: “Ọnọ ọ re ebrẹdi mẹ ọ kpare ithihrawọ riẹ mukpahe omẹ.” Kẹsena, ọ tẹ rova evaọ ẹzi, ọ tẹ ta nọ: “Omọvo rai jọ o re ti vivie omẹ.”

Ikọ na a te muhọ eweri omomọvo rai a tẹ jẹ ta kẹ Jesu nọ: “Mẹ o rọ okpa?” Makọ Judas Iskariọt o kuomagbe be nọ dede. Jọn, ọnọ ọ keria kẹle Jesu evaọ emẹjẹ na, ọ tẹ jẹlẹ r’uzou rẹrẹ igbama Jesu jẹ nọ nọ: “Olori, ono ọrọ?”

Jesu ọ tẹ kuyo nọ: “Omọvo ikpegbivẹ na jọ, ọnọ mẹ aviẹ a gbe bi dhe obọ họ udo na. Keme Ọmọ ohwo o rekpo wọhọ epanọ a kere kpahe iẹ, rekọ [uye u te] ohwo ọyena ọnọ o vivie Ọmọ ohwo na! A he yẹ ohwo ọyena ha u he woma kẹe.” Nọ ọ ta ere no, Setan ọ tẹ wariẹ rueva Judas, rehọ uvẹ eghogho nọ o rọ udu riẹ, onọ u yoma no. Uwhremu na evaọ aso ọyena, Jesu o te se Judas gbagba nnọ “ọmọ ọraha.”

Kẹsena Jesu ọ tẹ ta kẹ Judas nọ: “Ru onọ who re ruo vẹrẹ.” Ọvuọvo ikọ na nọ o wo otoriẹ eme Jesu ọ rọ họ. Ejọ a bi roro nnọ nọ o rọnọ Judas họ ọnọ o bi kru igho na, Jesu ọ be ta kẹe nọ: “Dẹ eware nọ ma guọlọ obọ eha na,” hayo inọ ọ nya e rọ oware jọ kẹ iyogbere na.

Nọ Judas ọ nyavrẹ no, Jesu o te muọ ehaa ọkpokpọ jọ họ kugbe ikọ ẹrọwọ riẹ. Ọ rehọ ukulu ebrẹdi, ọ tẹ lẹ fihọ iẹe, ọ tẹ bẹre iẹe, ọ tẹ rehọ iẹe kẹ ai, ta nọ: “Wha rehọ, wha re.” O te ru ei vevẹ nọ: ‘Onana u dhesẹ oma mẹ nọ a rehọ kẹ fiki rai. Wha he ru onana roro omẹ.’

Nọ aikpobi a re ebrẹdi na no, Jesu ọ tẹ rehọ egho udi, ẹsejọhọ ọrọ avọ ene evaọ Ọnyavrẹ na. Ọ tẹ jẹ lẹ fihọ iẹẹ, ọ tẹ rehọ iẹe kẹ ai, ọ tẹ ta kẹ ai nọ a da noi ze, ta nọ: “Egho ọnana họ ọvọ ọkpokpọ azẹ mẹ ọ nọ o hwẹ fiki rai na.”

Fikiere, onana o tẹ ghinẹ rọ ekareghẹhọ uwhu Jesu. Kukpe kukpe evaọ Nisan 14 a rẹ wariẹ iẹe, wọhọ epanọ Jesu ọ ta, rọ kareghẹhọ iẹe. O rẹ kareghẹhọ enọ i bi ru ehaa na kpahe oware nọ Jesu avọ Ọsẹ obọ odhiwu riẹ a ru no re a siwi ahwo-akpọ no obrukpe uwhu. Rọ kẹ ahwo Ju nọ i zihe ruọ ilele Kristi na, ehaa na o ti nwene orọ Ọnyavrẹ na.

Ọvọ ọkpokpọ na, onọ azẹ Jesu nọ o hwẹ u muhọ, u nwene ọvọ Uzi na. Jesu Kristi họ amiunugu riẹ evaọ udevie utu ivẹ—evaọ abọjọ, Jihova Ọghẹnẹ, evaọ abọdekọ riẹ, Ileleikristi 144,000 enọ a kẹ ẹzi na. U te no erọvrẹ izieraha nọ o rẹ kẹ no, ọvọ na o tẹ kuvẹ kẹ ẹma orẹwho izerẹ-ivie obọ odhiwu. Matiu 26:21-29; Mak 14:18-25; Luk 22:19-23; Jọn 13:18-30; 17:12; 1 Ahwo Kọrint 5:7.

▪ Eruẹaruẹ Ebaibol vẹ Jesu ọ fodẹ kpahe ọrivẹ jọ, kọ didi otofa ọ kẹ riẹ?

▪ Fikieme ikọ na a je weri gaga, kọ eme omomọvo rai a nọ?

▪ Eme Jesu ọ ta kẹ Judas nọ o ru, rekọ didi otofa ikọ edekọ na a kẹ ithubro enana?

▪ Nọ Judas ọ ruọ otafe no didi ehaa Jesu o muhọ, kọ eme họ ẹjiroro riẹ?

▪ Amono a rọ eva ọvọ ọkpokpọ na, kọ didi iruo ọvọ na o ru gba?