Uzou Avọ 121

Evaọ Aro Sanhẹdrin Na, je Bru Pailet

OKE u bi rrie ze. Pita ọ vro Jesu orọ avọ isiasa no, yọ ahwo Sanhẹdrin na a guẹdhọ ẹkoko rai no yọ ọvuọ oboriẹ o kpohọ no. Rekọ, nọ oke o nwane ke no evaọ ohiohiẹ Edisoi-Oka, a tẹ wariẹ kokohọ, oke onana evaọ ọgwa Sanhẹdrin rai. O wọhọ nọ ẹjiroro rai họ re a dhesẹ ẹdhọ aso nọ a gu na wọhọ nọ o kiehọ uzi. Nọ a rọ Jesu bru ai ze, a tẹ ta, wọhọ epanọ a ta evaọ oke aso na nọ: “Jọ owhẹ họ Kristi na, whọ ta kẹ omai.”

Jesu ọ tẹ kuyo nọ: ‘Mẹ tẹ ta kẹ owhai, wha rẹ te rọwo ho; jegbe mẹ tẹ nọ owhai onọ, wha sae te kẹ uyo ho.’ Rekọ, Jesu avọ aruọwha o te dhesẹ oma riẹ vevẹ, ta nọ: “Rekọ nọ umuo na vrẹ, Ọmọ ohwo ọ rẹ te keria obọze ogaga Ọghẹnẹ.”

Aikpobi a tẹ gwọlọ riẹ nnọ: “Jere, kọ whẹ họ Ọmọ Ọghẹnẹ na?”

Jesu ọ tẹ kuyo nọ: “Wha ta nọ mẹ họ ọye.”

Avọ iroro ekpe nọ o rọ udu ezae enana, uyo onana ọvo u te. A rehọ e riẹ fihọ eme izuehọ. A tẹ nọ nọ: ‘Didi isẹi efa ma gbẹ gwọlọ? Mai ọvo a jọ unu riẹ yoi no.’ Fikiere a tẹ gba Jesu, su ei vrẹ, a tẹ rehọ iẹe họ obọ Pọntiọs Pailet, ọba Rom na.

Judas, ọnọ o vivie Jesu na, o bi muẹrohọ ẹdhoguo na. Nọ ọ ruẹ nọ a brukpe Jesu no, o tẹ kẹe uye gaga. Fikiere ọ tẹ nyabru ilori izerẹ gbe ekpako na re o zihe ewẹ isiliva 30 na, ta nọ: “Mẹ raha uzi epanọ me vivie azẹ ọhaha.”

Avọ evegaga a tẹ kuyo nọ: ‘Ovẹ o jọ oyena te omai? Kiyọ ẹdhọ ra!’ Fikiere Judas o te gbolo ewẹ isiliva na fihọ etẹmpol na ọ tẹ nyae daoma re o thuwhu. Rekọ, o wọhọ nọ ogha ure nọ Judas o thuru ufi na họ u wiri, o te kie fihọ itho nọ e rọ obotọ, oma riẹ o tẹ sae ekekẹ.

Ilori izerẹ na a riẹ oware nọ a rẹ rọ ewẹ isiliva na ru hu. A te ku ei họ nọ: “U fo re a fi ai họ udevie igho ho, epanọ e rọ igho azẹ.” Fikiere, nọ a s’umẹ no, a tẹ rọ ugho na dẹ otọ ọmebẹ nọ a re ki erara họ. Fikiere a te je se otọ na “otọ azẹ.”

O gbẹ rọ irioke nọ a rehọ Jesu kpohọ ọgua ọba na. Rekọ ahwo Ju nọ a lele i rie a rueva ha keme a rọwo nnọ re a kẹle Ọgẹdhọ tere u re zue ai oma. Fikiere re o lọhọ ai oma, Pailet ọ tẹ ruọ otafe. Ọ tẹ nọ nọ: “Eme wha ro gu ohwo ọnana?”

A te yo nọ: “Ohwo ọnana ọgbẹ rọ oruyoma ha, ma hẹ sae rehọ iẹe se owhẹ hẹ.”

Fikinọ ọ gwọlọ dhomahọ iẹe he, Pailet ọ tẹ kuyo nọ: “Whai oma rai wha rehọ iẹe guẹdhọ epanọ uzi rai orọ.”

Bi dhesẹ iroro ojihẹ rai, ahwo Ju na a tẹ ta nọ: “Ufore ma kpe ohwo ọvo ho.” Uzẹme, a te kpe Jesu evaọ etoke Ehaa Ọnyavrẹ na, ẹsejọhọ o te wha ẹvohẹ ze, keme ahwo buobu a wo adhẹẹ gaga kẹ Jesu. Rekọ otẹrọnọ a sai ru re ahwo Rom a rehọ uzi egọmeti mu ei re a kpei, onana o te lẹliẹ ai wo unuzou evaọ iraro ahwo na.

Fikiere isu egagọ na, ababọ ẹfodẹ ẹdhoguo ọsosuọ rai nọ a ro brukpe Jesu nnọ ọ ta eme aghọ, a te mu erue buobu họ ẹta. A tẹ bọota abasa na: “Ma ruẹ nọ ohwo nana [1] ọ be rẹriẹ orẹwho mai, gbe [2] ọ be whaha omai azọhọ ọjẹ kẹ Siza, [3] jẹ be ta nọ ọye omariẹ họ [Kristi] Ovie.”

Ẹme na inọ Jesu ọ ta nọ ọye ovie họ onọ o rọ Pailet oja. Fikiere, ọ tẹ wariẹ ruọ uwou-ovie riẹ, se Jesu kẹle oma, ọ tẹ nọ nọ: “Whẹ họ ovie ahwo Ju na?” Koyehọ whọ raha uzi na no whọ tẹ rehọ oma ra mu ovie be wọso Siza?

Jesu ọ gwọlọ riẹ epanọ Pailet o yo kpahe iẹe te, fikiere ọ tẹ nọ nọ: “Whẹ ọvo ọ ta onana no obọ ra ze; hayo amọfa a ta riẹ kpahe omẹ kẹ owhẹ?”

Pailet o te dhesẹ nọ ọ riẹ onahona ha jegbe nnọ ọ gwọlọ riẹ uzẹme na. Ọ tẹ kuyo nọ: “Mẹ ohwo Ju? Orẹwho [obọ ra] gbe ilori izerẹ a rehọ owhẹ kẹ omẹ; eme who ru?”

Jesu ọ gwọlọ jọ ẹme na rẹghẹ hẹ, keme ẹme na ọ rọ kpahe ọkwa-ovie. Fikiere uyo nọ Jesu ọ kẹ u te gbe Pailet unu. Luk 22:66–23:3; Matiu 27:1-11; Mak 15:1; Jọn 18:28-35; Iruẹru 1:16-20.

▪ Fikieme Sanhẹdrin na a rọ wariẹ kokohọ evaọ ohiohiẹ?

▪ Ẹvẹ Judas o ro whu, kọ eme a rọ ewẹ isiliva 30 na ru?

▪ Ukpenọ ae ọvo a kpei, fikieme ahwo Ju a jẹ gwọlọ nọ ahwo Rom a kpe Jesu?

▪ Didi ota ahwo Ju a bọwo Jesu?