Uzou Avọ 124

A Siobọnoi kẹ Ae je Su Ei Vrẹ

OKENỌ Pailet, fiki urirẹ oruaro Jesu nọ a kpe bẹ no nọ u duobọ tei, ọ wariẹ daoma re o siobọnoi, eva e tẹ dha ilori na viere. A s’awọ viotọ nnọ uvumọ oware o rẹ whaha ẹjiroro omuomu rai hi. Fikiere a tẹ ruabọhọ ubo rai: “Kariẹ veghe, kariẹ veghe!”

Pailet ọ tẹ kuyo nọ: “Whai ọvo wha rehọ iẹe, re wha kariẹ veghe.” (Wo ohẹriẹ no eme nọ a kake ta, ahwo Ju a rẹ sai wo udu nọ a re ro kpe igbulegbu nọ e thọ izi egagọ nọ e rro gaga.) Kẹsena, orọ avọ isiasoi, Pailet o te whowho nọ Jesu ọvowa, ta nọ: “Mẹ jọ obọ riẹ ruẹ oruthọ ọvo ho.”

Ahwo Ju, nọ a ruẹ nnọ ota rai kpahe ẹraha izi egọmeti i bi ruiruo ho, a te zihe kpemu kpohọ ota egagọ ọrọ eme-izuehọ nọ a kaki ro gu Jesu ẹdhọ evaọ Sanhẹdrin na. A ta nọ: “Ma wo uzi, fiki uzi oyena, o re whu hrọ, epanọ o ru oma riẹ ọmọ Ọghẹnẹ.”

Uzi onana o rọ okpokpọ kẹ Pailet, u te ru ozọ mu ei viere. Enẹna o vuhumu no nnọ Jesu ọ rọ ohwo gheghe he, wọhọ epanọ ewezẹ aye riẹ gbe ogaga nọ Jesu o dhesẹ no i dhesẹ na. Rekọ “ọmọ Ọghẹnẹ”? Pailet ọ riẹ nọ Galili Jesu o nọze. Ghele na, kọ o sae jọ nọ ọ rria no vẹre? Nọ ọ wariẹ rehọ iẹe ruọ uwou-ovie na, Pailet ọ tẹ nọ nọ: “Bovẹ who nọze?”

Jesu ọ j’ẹme he. Ọ ta kẹ Pailet no vẹre nnọ ovie ọ rọ rekọ inọ Uvie riẹ o rọ akpọ na ha. U wo eme efa nọ ọ rẹ ta obọnana nọ u re w’iruo ho. Rekọ, uyo nọ ọ kẹ hẹ na u te duobọte omoya Pailet, o te muọ Jesu họ edoku: “Who bi vu omẹ wa? Whọ gbẹ riẹ nọ me wo ogaga no me re ro siobọno owhẹ, me te je wo ogaga nọ mẹ rẹ rọ kare owhẹ veghe?”

Jesu ọ tẹ kuyo avọ adhẹẹ nọ: “Who wo ogaga ovo kpahe omẹ hẹ, ajokpa nọ a rehọ iẹe kẹ owhẹ no obọ ehru ze.” Ọ be t’ẹme kpahe uvẹ nọ Ọghẹnẹ ọ kẹ isu akpọ nọ a rẹ rọ kpọ eware otọakpọ. Jesu o te fibae nọ: “Fikiere ọ nọ ọ rehọ omẹ kẹ owhẹ ọ jẹ mai wo obrukpe ologbo na.” Evaọ uzẹme, Kayafas ozerẹ okpehru na gbe ogbẹguae riẹ gbe Judas Iskariọt ai kpobi na a wo owha-iruo nọ o mae gbẹdẹ vi Pailet kẹ olahiẹ Jesu na.

Nọ Jesu o duobọ tei udu viere no avọ ozodhẹ nnọ o wọhọ nọ obọ Ọghẹnẹ Jesu o noze, Pailet ọ tẹ gbẹ daoma re o siobọnoi. Rekọ ahwo Ju na a te mu Pailet họ ẹvare ku. A tẹ wariẹ ota ẹraha izi egọmeti rai na, be rehọ ẹghẹ guegue inọ: “Who te siobọno ohwo ọnana, whọ gbẹ sae jọ ọzọ Siza ofa ha; kohwo kohwo nọ o ru oma riẹ ovie yọ ọ rọ suọ Siza.”

Makọ enwoma nọ e riẹ, Pailet ọ tẹ wariẹ rehọ Jesu ziọ otafe, ọ tẹ wariẹ ta nọ: “Ovie rai ọ na!”

“Rehọ iẹ vrẹ, rehọ iẹ vrẹ, kare iẹ veghe!”

Pailet ọ tẹ nọ avọ iyiyẹ nọ: “Mẹ kare Ovie rai veghe?”

Otọ esuo ahwo Rom nọ ahwo Ju a rọ na o be dhae eva. Evaọ uzẹme, a be wọso esuo ahwo Rom! Ghele na, avọ eviẹhọ, ilori izerẹ na a tẹ ta nọ: “Ma wo ovie ọ fa thọ Siza wa ha.”

Avọ ozodhẹ kẹ ọkwa egọmeti gbe emamọ odẹ riẹ, Pailet o te kie kẹ ẹgwọlọ ahwo Ju na. Ọ tẹ rehọ Jesu rọ kẹ ai. Isoja na a ba iwu ogorurẹ na no Jesu oma a tẹ whẹ iwu riẹ họ iẹe oma. Nọ a bi su Jesu kpohọ oria nọ a te jọ kare iẹe na, a wọ ure oja riẹ fihọ iẹe uzou.

Ọre ọ va ze ziezi no evaọ Edisoi-Oka, Nisan 14; ẹsejọhọ u bi te ọre-tuzou no. Anwọ irioke Edene-Oka Jesu o ti serihọ họ, yọ ọ ruẹ uye olahiẹ sa-sa no. Fikiere o te kie evaọ otọ ure nọ ọ wọ na. Fikiere a tẹ gba ọzae jọ nọ ọ be nyavrẹ họ, Saimọn ohwo Sairini evaọ Africa, re ọ wọ ure na kẹe. Nọ a rọ edhere na, ahwo buobu, kugbe eyae, a bi lele ai, be viẹ je weli kẹ Jesu.

Nọ ọ rẹriẹ ovao ku eyae na, Jesu ọ tẹ ta nọ: “Emetẹ Jerusalem, wha viẹ kẹ omẹ hẹ, wha viẹ kẹ oma rai jegbe emọ rai. Keme, ri edẹ ebe tha, nọ a rẹ te ta nọ, ‘Ega i wo oghale, gbe idhede nọ i re yẹ hẹ, jegbe ivie nọ a ti vie he!’ . . . Keme a te ru onana eva okenọ ebe-ẹwọ e rẹ rọrọ, kẹvẹ orẹ jọ oke oyaya?”

Jesu ọ be t’ẹme kpahe ure orẹwho ahwo Ju, onọ o gbẹ dina wo ame uzuazọ jọ evaọ eva riẹ fiki Jesu nọ ọ rọ kugbe ai gbe okiọkotọ nọ e rọwo e riẹ. Rekọ nọ ahwo nana a te no orẹwho na no, ure nọ u whu no evaọ abọ-ẹzi ọvo u ti kiọkọ, ẹhẹ, ukoko orẹwho nọ o ya no. O, ẹvẹ oviẹ riẹ o te rro te nọ egbaẹmo Rom, wọhọ ikpikpakpe Ọghẹnẹ, a tẹ raha orẹwho ahwo Ju na no! Jọn 19:6-17; 18:31; Luk 23:24-31; Matiu 27:31, 32; Mak 15:20, 21.

▪ Didi ota ahwo Ju na a bọo Jesu nọ a ruẹ nọ ota kpahe esuo rai u w’iruo ho?

▪ Fikieme ozọ u je mu Pailet viere?

▪ Ono ọ mae raha uzi evaọ oware nọ o via kẹ Jesu na?

▪ Evaọ ekuhọ, ẹvẹ izerẹ na a ro ru re Pailet o siobọno Jesu re a kpei?

▪ Eme Jesu ọ ta kẹ eyae nọ e jẹ viẹ kẹe, kọ eme o wo họ iroro rọ ta kpahe ure nọ o rẹ jọ ‘rọrọrọ’ kẹsena o vẹ jọ “oyaya”?