Uzou Avọ 122
No Pailet bru Herọd jẹ Wariẹ Zihe Ze
DEDE nọ Jesu ọ daoma re ọ kuẹe dhere Pailet inọ ọye yọ ovie he, o ru rie vevẹ nnọ Uvie riẹ o rọ enwoma kẹ Rom hu. Jesu ọ ta nọ: “Uvie mẹ orọ akpọ na ha; uvie mẹ ohẹ jọ orọ akpọ na, idibo mẹ e hẹ họre kẹ omẹ re a se omẹ ba ẹrehọ kẹ ahwo Ju; rekọ enẹna uvie mẹ orọ etenẹ hẹ.” Fikiere Jesu ọ tẹ ta isiasa soso nnọ o wo Uvie, dede nọ u no akpọ na ze he.
Ghele na, Pailet ọ tẹ gbẹ ta haro nọ: “Jere yọ owhẹ ovie?” Koyehọ, whẹ ovie whọ rọ o tẹ make rọnọ Uvie ra o rọ abọ akpọ na ha?
Jesu ọ tẹ jẹ Pailet riẹ nnọ o roro gba, yo nọ: “Whọ ta nọ mẹ ovie. Fiki onana a je yẹ omẹ, fiki onana mẹ jẹ ze eva akpọ na, re me se isẹi kẹ uzẹme [na]. Kohwo kohwo nọ ọrọ ọ rọ uzẹme, o re yo uru mẹ.”
Ẹhẹ, ugogo ẹjiroro nọ Jesu ọ rọ ziọ otọakpọ họ re o se isẹri kẹ ‘uzẹme na,’ uzẹme kpahe Uvie riẹ. Jesu ọ ruẹrẹ oma kpahe re ọ jọ oruọzewọ kẹ uzẹme na a tẹ maki kpei fihọ iẹe. Dede nọ Pailet ọ nọ nọ: “Eme họ uzẹme?” o du hẹrẹ re a ru ẹme na vẹ kẹe he. Eme nọ o yo na i te no nọ o re ro bruoziẹ.
Pailet o te zihe bru ogbotu na nọ e rọ otafe uwou-ovie na hẹrẹ. Ababọ avro avọ Jesu nọ ọ rọ abotọ riẹ, ọ tẹ ta kẹ ilori izerẹ gbe ahwo nọ e rọ kugbei nọ: “Mẹ jọ obọ ohwo nana ruẹ oruthọ ọvo ho.”
Avọ evedha fiki oziẹ-obro na, ogbotu na a te muhọ ebo: “Ọ be ba ahwo họ, yọ owuhrẹ nya wariẹ Judia kpobi, muhọ no obọ Galili ri te obonẹ.”
Ababọ iroro igheghẹ ahwo Ju na u gbe Pailet unu no. Fikiere, nọ ilori izerẹ gbe ekpako na a gbe bi bo na, Pailet o te kuomarẹriẹ bru Jesu ọ tẹ nọ nọ: “Who yo eware ibuobu nọ a ro se isẹi kpe owhẹ na?” Ghele na, Jesu ọ daoma ọvuọvo re ọ kuyo ho. Urirẹ riẹ evaọ ota iyoma enana kpobi u te gbe Pailet unu.
Nọ ọ ruẹ nọ Jesu ohwo Galili, Pailet ọ tẹ ruẹ edhere nọ o re ro ku ẹme na n’uzou. Osu Galili, Herọd Antipas (ọmọ Herọd Ologbo na), ọ rọ evaọ Jerusalẹm kẹ Ọnyavrẹ na, fikiere Pailet o te vi Jesu bru ei. Vẹre, Herọd Antipas ọye o bru uzou Jọn Ọhọahwo-Ame na, ozọ u te je mu Herọd nọ o yo kpahe iruo igbunu nọ Jesu o bi ru, be dhozọ nọ Jesu yọ Jọn ọnọ ọ kparoma no iwhuowhu ze no.
Whaọ, eva e tẹ were Herọd thesiwa fikinọ ọ be te ruẹ Jesu. Orọnikọ fikinọ o wo ọdawẹ kpahe ewoma Jesu hu hayo inọ ọ gwọlọ daoma ruẹ sọ eme nọ a ta kpahe iẹe na uzẹme hayo erue he. Ukpoye, o riẹ oja je wo ẹruore nnọ ọ te ruẹ Jesu nọ o ti ru oware igbunu jọ.
Rekọ Jesu ọ rọwo ru ẹgwọlọ Herọd ho. Evaọ uzẹme, nọ Herọd ọ be nọe enọ, ọ j’ẹme he. Avọ omovuọ, Herọd avọ otu isoja riẹ a tẹ jẹ rehọ Jesu zaharo. A rehọ iwu enwranwra gọe ẹgọ a tẹ rehọ iẹe s’ẹkoko. A tẹ wariẹ vi ei se Pailet. Fikiere, Herọd avọ Pailet, enọ e jọ ewegrẹ vẹre, a te zihe ruọ emamọ egbẹnyusu.
Nọ Jesu o zihe ze, Pailet o te se ilori izerẹ na, isu ahwo Ju na, gbe ahwo na kpobi kuku ọ tẹ ta nọ: “Wha rehọ ohwo ọnana se omẹ wọhọ ọnọ ọ be rẹriẹ ahwo; whaọ, ri, no mẹ guọlọ otọ riẹ iraro rai na, mẹ ruẹ abe-ọriọ ọvuọvo evaọ obọ riẹ hẹ, erọ eware nọ wha ro gu ei na; hayo kọ Herọd gbe [he], keme o vi rie zihe se omai. Ri, o ru oware nọ u te uwhu hu; fikiere, mẹ rẹ fa e, re me siobọno i.”
Fikiere Pailet o te whowho Jesu ọvowa isiava soso. Ọ gwọlọ siobọnoi, keme ọ riẹ nọ fiki ihri-eriọ ọvo izerẹ na a rọ rehọ iẹe ze na. Nọ Pailet ọ gbẹ be daoma re o siobọno Jesu na, ovuẹ jọ u te tei obọ nọ o ga viere inọ a siobọ noi. Nọ ọ rọ agbara ẹdhoguo riẹ na, aye riẹ ọ tẹ vuẹ uwou ze, ta kẹe nọ: “Who ru ohwo okiẹrẹe ọnana oware ovo ho, keme mẹ [ruẹ] uye eware buobu eva ewezẹ nẹnẹ na [ababọ avro onọ u no obọ Ọghẹnẹ ze] fiki riẹ.”
Ghele na, kọ ẹvẹ Pailet ọ sai ro siobọno ọzae ọvowa ọnana, epanọ ọ riẹ nọ u fo eruo na? Jọn 18:36-38; Luk 23:4-16; Matiu 27:12-14, 18, 19; 14:1, 2; Mak 15:2-5.
▪ Ẹvẹ Jesu ọ kuyo onọ kpahe ọkwa-ovie riẹ?
▪ Eme họ ‘uzẹme na’ onọ Jesu ọ raha uzuazọ riẹ evaọ otọakpọ je sisẹri kẹ na?
▪ Eme họ ẹdhoguo Pailet, didi uyo ahwo na a kẹ, kọ ẹvẹ Pailet o ru Jesu?
▪ Ono họ Herọd Antipas, fikieme eva e jẹ were iẹe thesiwa nọ ọ ruẹ Jesu, kọ ẹvẹ o ru rie?
▪ Fikieme o jẹ jọ Pailet oja re o siobọno Jesu?