Uzou Avọ 129

Omarọvia Efa

ILELE na a gbẹ rọ ọkora. A ri wo otoriẹ oware nọ uki na o jẹ rọ ufofe he, yọ a rọwo iyẹrẹ eyae na gbe he. Fikiere ubrobọ akọ owọwọ Ẹdoka na, Kleopas gbe olele ọfa a te no Jerusalẹm bi kpohọ Emeọs, oria nọ u thabọ te ole ikilomita 11.

Nọ a rọ edhere, bi gbiku kpahe eware nọ e via ẹdẹ ọyena, ọrara jọ o te kuomagbe ai. Ọ tẹ nọ nọ: “Nọ didi eme whai ohwo ọ be ta kẹ ohwo epanọ wha be nya na?”

Ilele na a te dikihẹ, ovao rai avọ ọkora, Kleopas ọ tẹ kuyo nọ: “Whẹ ọvo ọ rọ ogbe obọ Jerusalem, whọ gbẹ riẹ eware nọ i ru ẹdẹ inẹnẹ na ha?” Ọ tẹ nọ nọ: “Didi eware?”

“Eware nọ e kpahe Jesu e Nazarẹt,” ere a kuyo. “Ilori izerẹ gbe ikpahwo mai e rehọ riẹ kẹ, a [te] brukpe i [jẹ] kare iẹ veghe. Rekọ ma rọ ẹro kpahe iẹ nọ ọ rẹ te ta ahwo Izrẹl.”

Kleopas avọ ogbẹnya riẹ a te gbiku eware igbunu ẹdẹ ọyena—iyẹrẹ enjẹle nọ e roma via gbe uki ufofe na—rekọ a tẹ fodẹ igbunu rai kpahe otofa eware enana. Ọrara na ọ tẹ whọku ai nọ: “O igheghẹ, avọ eva nọ e rẹ rọwo ẹmẹmera eme nọ eruẹaro kpobi e ta na! Kọ u gbe fo ho re Kristi na ọ ruẹ uye eware enana jegbọ [re] ọ ruọ oruaro riẹ?” Fikiere ọ tẹ fodẹ ikere nọ e t’ẹme kpahe Kristi na.

Uwhremu na a tẹ kẹle Emeọs, ọrara na o te ru wọhọ epaọ ẹsenọ ọ be nyavrẹ. Fikinọ a gwọlọ yo eme na viere, ilele na a tẹ ta nọ: “Lele omai jọ, keme owọwọ u bi te no.” Fikiere ọ tẹ wẹriẹ kẹ emuọriọ. Nọ ọ jẹ lẹ jẹ bẹre ebrẹdi jẹ rehọ iẹe kẹ ai no, a te vuhumu nnọ ohwo nana Jesu nọ o ku ovioma ohwo họ. Rekọ ọ tẹ rayẹ.

A te ti wo otoriẹ oware nọ ọrara na ọ rọ riẹ tere! A tẹ nọ nọ: “Kọ eva mai egbẹ ghariẹ okenọ ọ jẹ ta eme ko mai eva edhere, nọ o je dhesẹ ikerakere na kẹ omai [na]?” Ababọ okioraha, a tẹ kparoma a tẹ dhẹ vẹrẹ vẹrẹ zihe kpohọ ugbobọ Jerusalẹm, oria nọ a jọ ruẹ ikọ na gbe ahwo nọ a kokohọ kugbe ai. Taure Kleopas avọ ogbẹnya riẹ a te rovie unu, edekọ na a tẹ ta avọ oghọghọ nọ: “[Olori] na ọ ghinẹ kparoma [no], ọ rọ oma via kẹ Saimọn!” Aimava na a tẹ jẹ ta epanọ Jesu ọ rọ roma via kẹ ai. Onana họ orọ avọ isiane evaọ ẹdẹ ọyena nọ ọ roma via kẹ ilele riẹ sa-sa no.

Jesu ọ tẹ nwane roma via orọ avọ isiasoi. Dede nọ ethẹ na e kare fiki ozọ ahwo Ju nọ u bi mu ikọ na, ọ tẹ rueva, dikihẹ udevie rai, ọ tẹ ta nọ: “Udhedhẹ u te owhai.” Ozọ u te mu ai, bi roro nọ ẹzi a be ruẹ na. Fikiere, bi dhesẹ nnọ orọnikọ ẹzi hi, Jesu ọ tẹ ta nọ: “Fikieme wha jẹ be rova, kọ fiki eme enanọ i je no eva rai ze? Wha ri abọ mẹ gbe awọ mẹ, mẹ ọ vo na; wha rọ obọ te omẹ, re wha ruẹ; keme ẹzi o re wo iwo gbe enwa ha wọhọ epanọ wha ruẹ nọ me wo na.” Rekọ, a be rọwo ghele he.

Re o fiobọhọ kẹ ai rọwo nọ Jesu ọ ghinẹ rọ, ọ tẹ nọ nọ: “Wha wo oware ore etenẹ?” Nọ o mi emeri jọ nọ a vuhu jẹ riẹe no, ọ tẹ ta nọ: “Enana họ eme mẹ nọ mẹ ta kẹ owhai, oke nọ mẹ avọ owhai a gbẹ jọ [taure me te ti whu], epanọ eware kpobi erẹte gba hrọ enọ a kere họ eva uzi Mosis gbe eruaro na gbe ilezi kpahe omẹ.”

Be gbẹ ruabọhọ oware nọ o wọhọ uwuhrẹ Ebaibol kugbe ai, Jesu o te wuhrẹ nọ: “Enẹ a kere nọ, Kristi na ọ rẹ te ruẹ uye ọ vẹ kparoma no iwhuowhu ẹdẹ avesa, [re] a rọ odẹ riẹ vuovuẹ eva ikurẹriẹ gbe ẹrọvrẹ izieraha kẹ erẹwho kpobi na muhọ no Jerusalem. Whai họ isẹi eware nana.”

Ma riẹ oware nọ o soriẹ nọ Tọmas ọ rọ rọ ẹguae Ẹdoka obọdẹ ọnana ha ha. Fikiere edẹ nọ i lele i rie, edekọ na avọ oghọghọ a tẹ ta kẹe nọ: “Ma ruẹ Olori [na] no.”

Tọmas o te si ikẹ nọ: “Ajokpa mẹ rẹ ruẹ abọ riẹ ẹta ibubẹ na, me dhe obọ mẹ họ ẹta ibubẹ hẹ, mẹ rẹ rọwa ha.”

Whaọ, edẹ eree evaọ obaro ilele na a tẹ wariẹ kokohọ evaọ uwou. Tọmas ọ rọ kugbe ai enẹna. Dede nọ ethẹ na e kare, Jesu ọ tẹ wariẹ dikihẹ udevie rai ọ tẹ ta nọ: “Udhedhẹ u te owhai.” Kẹsena, nọ ọ rẹriẹ ovao ku Tọmas, o te ziziei nọ: “Rehọ uziobọ ra te etenẹ, whọ ruẹ abọ mẹ; whọ riẹ obọ ra, te abefẹ mẹ; whọ jọ ababọ ẹrọwọ họ.”

Tọmas o te bo nọ: “Ọnowo mẹ, Ọghẹnẹ mẹ!”

Jesu ọ tẹ nọ nọ: “Epanọ whọ ruẹ omẹ whọ jẹ rọwo? Enọ e ruẹ hẹ nọ e rọwo ghele i wo oghale.” Luk 24:11, 13-48; Jọn 20:19-29.

▪ Didi enọ ọrara jọ ọ nọ ilele ivẹ evaọ edhere ọ Emeọs?

▪ Eme ọrara na ọ ta nọ o ghariẹ idu ilele na?

▪ Ẹvẹ ilele na a rọ riẹ ohwo nọ ọrara na ọ rọ?

▪ Nọ Kleopas avọ ogbẹnya riẹ a te Jerusalẹm, didi iyẹrẹ ejaja a yo?

▪ Omarọvia avisoi vẹ Jesu ọ rọ via kẹ ilele riẹ, kọ eme ọ ja riẹ via?

▪ Eme ọ via edẹ eree evaọ obaro nọ Jesu ọ roma via orọ avọ isoi no, kọ ẹvẹ u ro mu Tọmas ẹro uwhremu na inọ Jesu ọ kparoma no?