Uzou Avọ 130

Eva Abade Galili

IKỌ na a zihe kpohọ Galili no, wọhọ epanọ Jesu ọ kake ta kẹ ai nnọ a ru. Rekọ a riẹ oware nọ a rẹ jọ obei ru hu. U dina kri no, Pita ọ tẹ ta kẹ Tọmas, Nataniẹl, Jemis gbe oniọvo riẹ Jọn, gbe ikọ ivẹ edekọ nọ: “Me bi kpo okọ eri.”

Ezeza edekọ na a tẹ kuyo nọ: “Ma re lele owhẹ nya.”

Evaọ aso ọyena kpobi, a kpe oware ovo ho. Rekọ, nọ oke u muhọ erie ze no, Jesu ọ tẹ roma via evaọ unueri na, rekọ ikọ na a vuhumu nnọ Jesu hu. O te bo nọ: “Emaha na, wha wo eri jọ?”

A te bo no okọ na ze nọ: “Ijo.”

Ọ tẹ ta nọ: “Wha fi ogbọ na họ obọze okọ na, wha rẹ te ruẹ omojọ.” Nọ a ru erei, a gbẹ be sai si eriri rai hi fiki ubu iyei na.

Jọn o te bo nọ: “Olori na!”

Nọ o yo onana, Pita o te ku ewu họ, keme ọ jọ ẹbẹba, ọ tẹ la fihọ abade na. Ọ tẹ ya enwene imita 90 kpohọ okpa. Ikọ edekọ na a te bi okọ osese na ziọ okpa, bi si eriri nọ iyei e vọ na.

Nọ a te okpa no, a tẹ ruẹ erae nọ a kokohọ, avọ eri nọ a rọ tọ, yọ ebrẹdi e riẹ. Jesu ọ tẹ ta nọ: “Wha rehọ iyei jọ nọ wha kpei obọna rọ ze.” Pita ọ tẹ ruọ okọ na o te si eriri na ruokpa. Iyei ilogbo 153 e rọ eva riẹ!

Jesu o te zizie ai nọ: “Wha ti furie ohọwo rai.”

Ọvuọvo evaọ usu rai o wo udu nọ ọ rẹ rọ nọ nọ, “Whẹ ono?” ho keme aikpobi a riẹ nnọ Jesu. Onana họ omarọvia orọ avọ isiahrẹ riẹ anwẹ nọ ọ kparoma no, yọ orọ avọ esa riẹ kẹ ikọ na ususu. Ọ tẹ kẹ ai emu, kẹ omomọvo ebrẹdi gbe emeri.

Nọ a re emu re no, Jesu, ẹsejọhọ bi rri kpohọ ofẹ iyei ibuobu na, ọ tẹ nọ Pita nọ: “Saimọn, ọmọ Jọn, who you omẹ vi enana?” Ababọ avro ọ be nọ nọ, Kọ okọ iyei-ikpe na o were owhẹ vi onọ mẹ ruẹrẹ owhẹ kpahe kẹ?

Pita o te yo nọ: “Ere Olori, whọ riẹ nọ me you owhẹ.”

Jesu ọ tẹ kuyo nọ: “Kuọ imigodẹ mẹ.”

Ofariẹ, orọ avọ isiava, ọ tẹ nọ nọ: “Saimọn, ọmọ Jọn, who you omẹ?”

Pita o te yo gaga nọ: “Ere Olori, whọ riẹ nọ me you owhẹ.”

Jesu ọ tẹ wariẹ j’uzi kẹe nọ: “Thuru igodẹ mẹ.”

Kẹsena, orọ avọ isiasa, ọ tẹ nọ nọ: “Saimọn, ọmọ Jọn, [who] you omẹ?”

Pita o te muhọ ẹrova. Ẹsejọhọ o bi roro sọ Jesu ọ be vro omarokpotọ riẹ. Whaọ, nọ a jẹ dawo Jesu kẹle na, isiasa Pita ọ vro nọ ọ riẹ riẹ hẹ. Fikiere Pita ọ tẹ ta nọ: “Olori, whọ riẹ eware kpobi; whọ riẹ nọ me you owhẹ.”

Jesu o te je kẹe orọ avọ isiasa nọ: “Kuọ igodẹ mẹ.”

Fikiere Jesu ọ tẹ rehọ Pita ro dhesẹ kẹ edekọ na kpahe iruo nọ ọ gwọlọ nọ a ru. O ti no otọakpọ obọnana, yọ ọ gwọlọ nọ a kobaro evaọ odibọgba kẹ ahwo nọ a ti siwi ziọ owa igodẹ Ọghẹnẹ na.

Epanọ a gba je kpe Jesu fikinọ o ru iruo nọ Ọghẹnẹ o vi rie nọ o ru na, ere o dhesẹ obọnana nnọ Pita ọ te ruẹ uye re. Jesu ọ ta kẹe nọ: “Nọ whọ jọ ọmaha, who je mu eku ra ga, whọ vẹ nya kpo obonọ uje owhẹ; rekọ nọ whọ tẹ [who no], whọ rẹ te riẹ abọ ra, omọfa o reti mu eku ra ọ rẹ te wha owhẹ kpo oria nọ uje owhẹ hẹ.” Ghelọ ikpakpe nọ o be hẹrẹ Pita, Jesu ọ tuduhọ iẹe awọ nọ: ‘Lele omẹ ọvo.’

Nọ o kuomarẹriẹ, Pita ọ tẹ ruẹ Jọn ọ tẹ nọ nọ: “Olori, eme ohwo ọnana o re ruẹ?”

Jesu o te yo nọ: ‘O tẹ ruọ omẹ nọ ọ jọ bẹsenọ omẹ rẹ tha, ovẹ o jọ oyena t’owhẹ? Lele omẹ ọvo!’ Ilele na buobu a te wo otoriẹ eme Jesu enana wọhọ nnọ Jọn ukọ na o ti whu vievie he. Rekọ, wọhọ epanọ Jọn ukọ na ọ te ta evaọ obaro, orọnikọ Jesu ọ ta nọ o ti whu hu hu, rekọ Jesu ọ ta nọ: ‘O tẹ ruọ omẹ nọ ọ jọ bẹsenọ mẹ rẹ tha, ovẹ o jọ oyena t’owhẹ?’

Uwhremu na, Jọn ọ tẹ jẹ ta eme obọdẹ enana: “Jegbọ eware ibuobu efa jọ re nọ Jesu o ru; enọ re a te kere ai kpobi, me roro nọ akpọ na dede ọ sae gba ebe nọ a he ro kere ai hi.” Jọn 21:1-25; Matiu 26:32; 28:7, 10.

▪ Eme o dhesẹ nọ ikọ na a riẹ oware nọ a re ru hu evaọ Galili?

▪ Ẹvẹ ikọ na a ro vuhu Jesu eva Abade Galili?

▪ Brẹse Jesu ọ roma via no anwẹ nọ ọ rọ kparoma?

▪ Ẹvẹ Jesu o ro dhesẹ oware nọ ọ gwọlọ nọ ikọ na a ru?

▪ Ẹvẹ Jesu o ro dhesẹ epanọ Pita o ti ro whu?

▪ Didi eme Jesu ọ ta kpahe Jọn nọ ilele na buobu a w’otọ riẹ thọ?