Unueri Abade Galili

Evaọ owọwọ urere nọ Jesu ọ jọ kugbe ikọ riẹ, ọ vuẹ rai nọ: “Mẹ tẹ kparoma ze no, mẹ te jọ obọ Galili hẹrẹ owhai.” (Matiu 26:32; 28:7, 10) Fikiere, ilele riẹ buobu a te kpobọ Galili, rekọ eme a te jọ obei ru?

Nọ u te oke jọ no, Pita ọ tẹ vuẹ ikọ ezeza jọ nọ: “Me bi kpohọ iyei-ikpe.” Ikọ ezeza na a tẹ ta kẹe nọ: “Ma bi lele owhẹ nya.” (Jọn 21:3) Rekọ evaọ aso yena soso a kpe eri ọvo ho. Nọ oke u muhọ erie no, Jesu ọ tẹ romavia evaọ unueri na, rekọ ikọ na a vuhu i rie he. Jesu ọ tẹ kpare unu nọ ae nọ: “Emaha na, kọ wha wo oware jọ nọ a rẹ re?” A tẹ kuyo nọ: “Ijo!” Jesu ọ tẹ ta kẹ ae nọ: “Wha fi ẹriri rai họ obọze okọ na wha ti kpe iyei jọ.” (Jọn 21:5, 6) A te kpe iyei nọ i bu te epanọ a gbẹ jẹ sai ro si ẹriri na ha.

Jọn ọ tẹ vuẹ Pita nọ: “Olori na!” (Jọn 21:7) Pita ọ tẹ nwani ku ewu ehru riẹ họ, keme ewu na ọ jariẹ oma okenọ o je kpe iyei na ha. Ọ tẹ la ruọ abade na jẹ ya oria nọ u thabọ te oware wọhọ irula egba esa (300) te okpa. Ilele edekọ na a tẹ rọ ẹmẹrera te okpa yọ a bi si ẹriri nọ iyei e vọ na.

Nọ a te okpa, a tẹ “ruẹ iwowo-erae nọ a fi emeri họ be tọ gbe ebrẹdi.” Jesu ọ tẹ ta nọ: “Wha rehọ iyei jọ nọ wha kpe obọnana ze.” Pita o te si ẹriri na fihọ okpa avọ iyei nọ i bu te udhuhrẹ gbe ikpegbesa (153) nọ e rrọ eva riẹ. Jesu ọ tẹ ta nọ: “Wha nyaze te re emu.” Ilele na ọvuọvo ọ sae gbaudu nọe he inọ: “Whẹ yọ ono?” keme a riẹ nọ Jesu. (Jọn 21:9-12) Onana họ orọ avọ isiasa nọ Jesu ọ romavia kẹ ilele riẹ nọ e rrọ oria ovo.

Jesu ọ tẹ kẹ ae omomọvo ebrẹdi gbe emeri re a re. Ẹsejọhọ Jesu o je rri iyei nọ a kpe na nọ ọ nọ Pita nọ: “Saemọn ọmọ Jọn, kọ who you omẹ vi eware nana?” Kọ Pita ọ be roma kẹ iruo iyei-ikpe na vi iruo nọ Jesu ọ gwọlọ nọ o ru? Pita ọ kẹ uyo nọ: “Olori, whọ riẹ nọ me you owhẹ gaga.” Jesu ọ tẹ ta kẹe nọ: “Kuọ imigodẹ mẹ.”—Jọn 21:15.

Jesu ọ tẹ wariẹ nọe nọ: “Saemọn ọmọ Jọn, kọ who you omẹ?” Ẹsejọhọ onọ na u gbe Pita unu, ọ tẹ rọ eva riẹ kpobi ta nọ: “Ee, Olori, whọ riẹ nọ me you owhẹ gaga.” Jesu ọ tẹ wariẹ ta kẹe nọ: “Sẹro igodẹ esese mẹ.”—Jọn 21:16.

Jesu ọ tẹ nọe orọ avọ isiasa nọ: “Saemọn ọmọ Jọn, kọ who you omẹ gaga?” Ẹsejọhọ obọnana u bi gbe Pita unu sọ Jesu o gbe fievahọ iẹe. Pita ọ tẹ ta no eva riẹ kpobi ze nọ: “Olori, whọ riẹ eware kpobi; whọ riẹ nọ me you owhẹ gaga.” Jesu ọ tẹ jẹ wariẹ ta oware nọ Pita o re ru, inọ: “Kuọ igodẹ esese mẹ.” (Jọn 21:17) Ẹhẹ, u fo nọ enọ e be kobaro a rẹ rẹrote ahwo kpokpọ nọ e be ziọ ukoko Ọghẹnẹ.

A mu Jesu je kpei fikinọ o ru iruo nọ Ọghẹnẹ ọ kẹ riẹ nọ o ru. Obọnana ọ tẹ ta nọ ọkpọ oware utioye o te via kẹ Pita. Jesu ọ ta nọ: “Okenọ whọ gbẹ jọ ọmaha, whẹ ọvo whọ jẹ hai ku ewu họ jẹ nya kpohọ oria kpobi nọ u je owhẹ. Rekọ nọ whọ tẹ kpako no, whọ te riẹ abọ ra, omọfa o ve ku ewu họ owhẹ oma, o ve su owhẹ kpohọ oria nọ whọ gwọlọ họ.” Jesu ọ tẹ tuduhọ iẹe awọ nọ: “Lele omẹ ẹsikpobi.”—Jọn 21:18, 19.

Nọ Pita ọ ruẹ Jọn ukọ na, ọ tẹ nọ Jesu nọ: “Olori, kọ ẹvẹ kpahe ọzae nana?” Ẹvẹ uzuazọ ukọ Jesu nana nọ o you gaga na o te jọ evaọ obaro? Jesu ọ kuyo nọ: “O tẹ rrọ oreva mẹ nọ ọ rẹ jariẹ bẹsenọ mẹ rẹ nyaze, ovẹ o jariẹ te owhẹ?” (Jọn 21:21-23) U fo nọ Pita o re lele Jesu ababọ awaọruọ kpahe oware nọ amọfa a ti ru. Ghele na, Jesu o bi dhesẹ nọ Jọn ọ te tọ vi ikọ edekọ na yọ ọ te jọ eruẹaruẹ ruẹ Jesu nọ ọ te nyaze evaọ ogaga Uvie riẹ.

Evaọ uzẹme, Jesu o ru eware efa buobu nọ i bu vi eware nọ a rẹ sai kere fihọ iko-ebe.