Uzou 17

Duku Ufuoma Evaọ Udevie Ahwo Ọghẹnẹ

1, 2. Ẹvẹ uyerakpọ ohwo o jẹ wọhọ ọrọ ahwo nọ a be rria oria nọ ofou ọ jọ raha ọraha?

MA REHỌ iẹe nọ ofou ọgaga jọ o fowu raha oria nọ whọ be rria no. Uwou ra u kporo no, yọ ekwakwa ra kpobi i vru no. Emu ọ riẹ hẹ. O wọhọ nọ ẹruore ọvuọvo ọ riẹ hẹ. Idudhe na, a tẹ dhogbo ze avọ emuore. A tẹ rọ emu gbe iwu ze gbidiki. A tẹ bọ emamọ uwou k’owhẹ. Avro ọ riẹ hẹ, who re yere ohwo nọ o ru enana kpobi k’owhẹ.

² Oware nọ o wọhọ onana o be via nẹnẹ na. Wọhọ ofou ọyena, ọkparesuọ Adamu avọ Ivi e wha araha ologbo se uyẹ ohwo-akpọ. Uwou Aparadase ohwo ọ gbẹ riẹ hẹ. No okioye ze, egọmeti ohwo-akpọ ọ re sae ko ahwo dhere no ẹmo, ethube, gbe ẹdhoguo-okienyẹ hẹ. Egagọ i ru ahwo buobu nọ ohọo emu ẹzi u bi ro kpe ai. Evaọ abọ ẹzi, Jihova Ọghẹnẹ ọ be rehọ emuore, iwu, gbe uwou rọ kẹ. Ẹvẹ o bi ro ru oyena?

‘ỌRIGBO ẸRỌWỌ GBE AREGHẸ NA’

3. Ẹvẹ Jihova ọ be rọ rehọ eruẹrẹfihotọ kẹ ohwo-akpọ, kọ iriruo vẹ i dhesẹ i rie?

³ Eware nọ a rọ dhogbo bru ahwo ze u wo edhere nọ a rẹ rọ ghale ai, yọ Jihova o wo oghẹrẹ ọruẹrẹfihọ ẹzi otiọye na kẹ ahwo riẹ re. Wọhọ oriruo, Emọ-Izrẹl a jọ ‘ukoko Jihova’ evaọ ikpe 1,500. Ejọ evaọ udevie rai e jọ wọhọ edhere nọ Ọghẹnẹ o je ro wuhrẹ ai Uzi riẹ. (1 Iruẹru-Ivie 28:8; 2 Iruẹru-Ivie 17:7-9) Evaọ ikpe-udhusoi ọsosuọ C.E., Jihova ọ tẹ rehọ ukoko Ileleikristi na ro mu. A rọ ikoko mu, i je ruiruo evaọ otọ ọkpọvio otu ẹruọsa nọ ikọ gbe ekpako na i ru via. (Iruẹru 15:22-31) Epavo na re nẹnẹ, Jihova o bi yerikugbe ahwo riẹ ẹkwoma ugboma nọ u koko-oma họ. Ẹvẹ ma rọ riẹ onana?

4. Ono họ ‘ọrigbo ẹrọwọ gbe areghẹ’ evaọ oke mai na, kọ ẹvẹ eruẹrẹfihotọ ẹzi Ọghẹnẹ e be rọ rehọ oma via?

⁴ Jesu ọ ta nọ evaọ etoke ọzino riẹ evaọ ogaga Uvie, a te ruẹ ‘ọrigbo nọ o wo ẹrọwọ avọ areghẹ’ nọ e te kẹ ilele Riẹ ‘emu nọ oke u te.’ (Matiu 24:45-47) Okenọ a rehọ Jesu mu wọhọ Ovie obọ odhiwu evaọ ukpe 1914, ono ‘ọrigbo’ ọnana ọ jọ? U vẹro inọ ọ jọ isu-ichọche Ikpichọche na ha. Evaọ abọ ologbo riẹ, a jẹ rehọ iwuhrẹ nọ e be tha egọmeti orẹwho obọ rai uke evaọ Ẹmo Akpọ I kuọ uthuru rai. Rekọ Ileleikristi uzẹme nọ Ọghẹnẹ ọ rọ ẹzi ọfuafo riẹ wholo no a jẹ vaha emu ẹzi ẹruoke a tẹ jẹ rọ abọ nọ Jesu o se “uthuru okakao” na. (Luk 12:32) Ileleikristi enana nọ a ro mu na a je whowho kpahe Uvie Ọghẹnẹ viukpọ egọmeti ahwo. Fikiere, evaọ ikpe buobu nọ e vrẹ no ima ahwo ikiẹrẹe erọ “igodẹ efa” a kuomagbe “ọrigbo” nọ a ro mu na no evaọ egagọ uzẹme. (Jọn 10:16) Fikiọ ‘ọrigbo ẹrọwọ’ na gbe Otu Ẹruọsa oke nana riẹ nọ o bi ro ruiruo, Ọghẹnẹ ọ be kpọ ahwo riẹ nọ a koko-oma họ re a ru emu, iwu, gbe iwou buobu kẹ ahwo nọ e gwọlọ wo eruẹrẹfihotọ enana kpobi.

‘EMU EVAỌ ẸRUOKE’

5. Eyero ẹzi vẹ ọ rọ akpọ na nẹnẹ, rekọ eme Jihova o bi ru kpahe onana?

⁵ Jesu ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Matiu 4:4) U yoma kẹhẹ inọ, ahwo buobu a be gaviezọ kẹ eme Ọghẹnẹ hẹ. Wọhọ epanọ Emọs ọruẹaro Jihova ọ ta, anọ “orọnọ ohọo emuore, hayo o rọ uru-ame he, rekọ o rọ ẹme ỌNOWO na o yo” họ ohọo nọ o rẹ te jọ. (Emọs 8:11) Makọ ahwo nọ e wọ egagọ fihọ uzou dede ohọo ẹzi u bi kpe ai. Ghele na, oreva Jihova họ “re ahwo kpobi a wo usiwo, re a ze te riẹ uzẹme na.” (1 Timoti 2:3, 4) Nya lele oyena, ọ be rehọ emu ẹzi buobu rọ kẹ. Rekọ diẹse a sai jo duku ei?

6. Ẹvẹ Jihova ọ rọ rehọ edhere ẹzi ko ahwo riẹ evaọ oke anwae?

⁶ No anwae ze, Jihova ọ be vaha emu ẹzi kẹ ahwo riẹ kpobi wọhọ ekru. (Aizaya 65:13) Wọhọ oriruo, izerẹ Emọ-Izrẹl a koko ezae na họ, eyae na, emaha na rọ kẹ ohrẹ ogbotu ọ Uzi Ọghẹnẹ. (Iziewariẹ 31:9, 12) Evaọ otọ ọkpọvio otu ẹruọsa na, Ileleikristi ikpe-udhusoi ọsosuọ a wo ọruẹrẹfihotọ ikoko je ru iwuhrẹ kẹ ohrẹ gbe okruga ahwo na kpobi. (Ahwo Rom 16:5; Filimọn 1, 2) Isẹri Jihova a bi lele oriruo ọnana. A zizie owhẹ re who kpohọ iwuhrẹ rai kpobi.

7. Ẹvẹ ekpohọ iwuhrẹ Oleleikristi ẹsikpobi u ro w’abọ kpahe eriariẹ gbe ẹrọwọ?

⁷ Ẹhẹ, ẹsejọhọ who wuhrẹ eware buobu no evaọ ewuhrẹ Ebaibol na rọ kẹ omobọ ra. Ẹsejọhọ ohwo jọ o fiobọhọ k’owhẹ no. (Iruẹru 8:30-35) Rekọ a rẹ sae rehọ ẹrọwọ ra dhesẹ okakọ nọ o rẹ sai lo je whu no otẹrọnọ a gbẹ sẹro riẹ ziezi hi. Fikiere, u fo re whọ re emamọ emu ẹzi. (1 Timoti 4:6) Iwuhrẹ Ileleikristi e rẹ kẹ ọruẹrẹfihotọ iwuhrẹ noke ruoke nọ a ruẹrẹ họ re e ko owhẹ ziezi evaọ ẹzi je fiobọhọ k’owhẹ gbẹ hae rro evaọ ẹrọwọ nọ who bi ru ẹrọwọ ra kpahe Ọghẹnẹ rro viere na.—Ahwo Kọlọsi 1:9, 10.

8. Fikieme a jẹ t’udu họ omai awọ nọ ma kpohọ iwuhrẹ Isẹri Jihova?

⁸ Iwuhrẹ na i wo obọdẹ iruo efa jọ re. Pọl o kere nọ: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, wha hẹ se oma ba e kugbe he.” (Ahwo Hibru 10:24, 25) Ẹme ahwo Grik nọ a fa wọhọ “epanọ ọ rẹrọ jaja” o rẹ sai dhesẹ nọ “re a thọ.” Itẹ Ebaibol jọ e ta nọ: “Utehru o rẹ thọ utehru da, ohwo o ve ru ohwo woma.” (Itẹ 27:17) Mai kpobi a gwọlọ ‘ẹthọ’ ẹsikpobi. Ọyawọ ikẹdẹ kẹdẹ no akpọ na ze ọ rẹ sai kpe ẹrọwọ mai no. Nọ ma te kpohọ iwuhrẹ Ileleikristi, ma rẹ sae bọ ohwohwo ga. (Ahwo Rom 1:11, 12) Ahwo ukoko na a bi lele ohrẹ Pọl ukọ na re “ohwo ọ hẹ wha ohwo udu, ohwo ọ kpare ohwo,” eware itieye na e rẹ thọ ẹrọwọ mai. (1 Ahwo Tẹsalọnika 5:11) Iwuhrẹ Ileleikristi nọ ma rẹ jọ ẹsikpobi u re dhesẹ nọ ma you Ọghẹnẹ o rẹ jẹ k’omai uvẹ nọ ma re ro jiri iei.—Olezi 35:18.

“WHẸ UYOYOU HỌ OMA”

9. Ẹvẹ Jihova o ro fi oriruo h’otọ evaọ edhesẹ uyoyou?

⁹ Pọl o kere nọ: “Wha whẹ uyoyou họ oma, onọ orọ ọwhẹgbe eware kpobi.” (Ahwo Kọlọsi 3:14) Jihova ọ rehọ aruoriwo k’omai ẹgọ ọnana no. Evaọ edhere vẹ? Ileleikristi a rẹ sai dhesẹ uyoyou keme yọ ubi ẹzi ọfuafo Jihova jọ nọ Ọghẹnẹ ọ kẹ. (Ahwo Galesha 5:22, 23) Jihova omariẹ o dhesẹ uyoyou nọ o mae rro no ẹkwoma Ọmọ ọvo riẹ nọ o vi ze re ma sai wo uzuazọ ebẹdẹ bẹdẹ. (Jọn 3:16) Edhesẹ ologbo uyoyou onana o tẹ rọ oriruo k’omai evaọ edhesẹ okwakwa nana. Jọn ukọ na o kere nọ: “Re Ọghẹnẹ o te you omai ere, ufore mai ohwo o you ohwo ere re.”—1 Jọn 4:11.

10. Ẹvẹ ma sai ro wo erere no ‘oma inievo na kpobi’ ze?

¹⁰ Iwuhrẹ nọ who re kpohọ evaọ Ọgua Uvie o rẹ te k’owhẹ uvẹ ziezi nọ who re ro dhesẹ uyoyou. Obei whọ te jọ nya ku oghoghẹrẹ ahwo sasa. Ababọ avro ibuobu rai i re ti siowhẹ urru. Dede na, makọ evaọ udevie ahwo nọ e be gọ Jihova a wo uruemu sasa. Ẹsejọhọ evaọ okenọ u kpemu whọ jẹ hai sioma no ahwo nọ i wo isiuru hayo oghẹrẹ uruemu ovo na kugbe owhẹ hẹ. Rekọ, Ileleikristi a re ‘you imoni na kpobi.’ (1 Pita 2:17) Fikiere, ru ei wọhọ ute ra re whọ riẹ ahwo nọ e rọ Ọgua Uvie na—makọ ohwo kpobi enọ ikpe rai, uruemu, uyẹ, hayo enọ isukulu rai i wo ohẹriẹ no era. Ẹsejọhọ whọ te ruẹ nọ ahwo jọ a kparobọ evaọ ekwakwa eghaghae jọ.

11. Fikieme uruemu sasa nọ e rọ udevie ahwo Jihova i gbe ro kpokpo owhẹ hẹ?

¹¹ Jọ ohẹriẹ uruemu nọ o rọ evaọ ukoko na u kpokpo owhẹ hẹ. Wọhọ udhesẹ, ma rehọ iẹe nọ imoto buobu e rọ akotọ ra be dhẹ evaọ edhere. Orọnọ aikpobi a be dhẹ siawọ oghẹrẹ ovo ho, hayo kọ aikpobi e rọ oma ovo ho. Ejọ e dhẹ emaele buobu no, rekọ wọhọ owhẹ, ejọ i muhọ obọ. Dede, ghele ehẹriẹ nana, aikpobi a be dhẹ edhere na vrẹ. Epavo na o rọ kugbe ahwo nọ i ru ukoko na via. Orọnikọ aikpobi a re wo ekwakwa Oleleikristi evaọ okiọvo na ha. Ofariẹ, orọnikọ aikpobi e rọ oghẹrẹ ovo evaọ ugboma gbe iroro ho. Ejọ e gọ Jihova ikpe buobu vrẹ no; efa i muhọ obọ. Ghele na, aikpobi a be dhẹ edhere nọ u re su kpohọ uzuazọ ebẹdẹ bẹdẹ, eva “iroro gbe oziẹ-obro ọvo.” (1 Ahwo Kọrint 1:10) Fikiere, rri kpohọ ekwakwa iwoma na ukpenọ whọ tẹro vi abọ oyẹlẹ ahwo nọ e rọ ukoko na. Ere o ruo u ti ru udu ra ruọruọ, keme who re ti vuhumu nọ Ọghẹnẹ ọ ghinẹ rọ udevie ahwo nana. Ababọ avro, etenẹ whọ gwọlọ jọ.—1 Ahwo Kọrint 14:25.

12, 13. (a) Otẹrọnọ ohwo jọ evaọ ukoko na o ru owhẹ thọ, eme whọ rẹ sai ru? (b) Fikieme u je wuzou re whọ siọ ẹgo ba e fihọ eva?

¹² Nọ ahwo kpobi a gba ha na, ẹsejọ ohwo jọ evaọ ukoko na ọ rẹ sae ta hayo ru oware nọ u re dh’owhẹ uzou. (Ahwo Rom 3:23) Jemis olele na o te kere gbagba nọ: “Keme eva idhere buobu ma bi ro ru thọ, rekọ, ohwo nọ ọ rẹ rọ ẹrọo riẹ ta thọ họ, ọye họ ohwo nọ ọ gbakiete.” (Jemis 3:2) Ẹvẹ who re ru otẹrọnọ ohwo jọ o ru owhẹ thọ? Itẹ Ebaibol jọ e ta nọ: “Areghẹ owoma o re ru ofu ohwo kpotọ, oro rọkẹ ẹe re o rri oruthọ jọ vo.” (Itẹ 19:11) Re a wo areghẹ u dhesẹ re a rri vrẹ okafe oware, u dhesẹ re whọ riẹ oware nọ o soriẹ nọ ohwo na ọ jẹ ta hayo ru epanọ o ru na. Ibuobu mai a re dhesẹ areghẹ evaọ inoma nọ ma re gu kpahe iruthọ mai. Fikieme who gbe dhesẹ areghẹ ọvo na ha re who ruru sebaẹgba amọfa?—Matiu 7:1-5; Ahwo Kọlọsi 3:13.

¹³ Jọ o thọrọ owhẹ ẹro ho inọ ma rẹ rọ vrẹ amọfa otẹrọnọ ma gwọlọ wo erọvrẹ no obọ Jihova ze. (Matiu 6:9, 12, 14, 15) Ma te bi ru uzẹme na, ma rẹ rehọ edhere uyoyou yerikugbe amọfa. (1 Jọn 1:6, 7; 3:14-16; 4:20, 21) Fikiere, whọ tẹ nya ku ẹbẹbẹ jọ kugbe ohwo jọ evaọ ukoko na, họre re whọ siọ ẹgo ba e wo fihọ eva. Whọ tẹ rehọ uyoyou gẹgọ, whọ rẹ daoma ku ẹbẹbẹ na họ, yọ who re dhizu re who te wou unu hu otẹrọnọ who ru thọ.—Matiu 5:23, 24; 18:15-17.

14. Didi ekwakwa ma rẹ rọ g’ẹgọ?

¹⁴ Ẹgọ ẹzi mai o re kugbe ekwakwa efa nọ i wobọ kugbe uyoyou. Pọl o kere nọ: “Wha whẹ ọrẹri gbe eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri.” Nọ uyoyou o te kugbe ekwakwa nana họ eware nọ i ru “uruemu okpokpọ” ohwo Ọghẹnẹ na via. (Ahwo Kọlọsi 3:10, 12) Kọ whọ te daoma re whọ gọ oma ra ẹgọ evaọ edhere ọnana? Maero nọ whọ tẹ rọ uyoyou inievo gọ oma ra ẹgọ who re ti wo oka nọ a ro vuhu ilele Jesu mu, keme ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:35.

ORIA UFUOMA

15. Ẹvẹ ukoko na o jẹ wọhọ uwou?

¹⁵ Ukoko na o wọhọ uwou re, oria adhẹzọ nọ whọ sae jọ ruẹ ufuoma. Whọ rẹ jọ eva riẹ ruẹ ahwo udu oruọzewọ enọ e be daoma ru oware nọ u kiete evaọ aro Ọghẹnẹ. Ibuobu rai e nya se uruemu gbe iroro iyoma evo na ba no enọ whọ be daoma fi kparobọ na. (Taitọs 3:3) A rẹ sai fiobọhọ k’owhẹ, keme a ta k’omai nọ ma hae ‘wha uye ohwohwo.’ (Ahwo Galesha 6:2) Evaọ uzẹme, re a le edhere nọ u re su kpohọ uzuazọ ebẹdẹ bẹdẹ yọ owha nọ whọ rẹ wọ kẹ omobọ ra. (Ahwo Galesha 6:5; Ahwo Filipai 2:12) Ghele, Jihova ọ rehọ ukoko Oleleikristi na kẹ no wọhọ edhere ogbunu nọ o re ro fiobọhọ jẹ thomai uke. Epanọ ẹbẹbẹ ra e maki yoma te kẹha, who wo obufihọ ologbo nọ ọ rọ k’owhẹ—ukoko uyoyou nọ u re ti dikihẹ emu ra evaọ oke uye hayo ọbẹwẹ.—Wawo Luk 10:29-37; Iruẹru 20:35.

16. Didi obufihọ ekpako ukoko a rẹ kẹ?

¹⁶ Evaọ udevie ahwo nọ a rẹ te dhẹ wariẹ owhẹ họ ti fiobọhọ k’owhẹ họ ‘ahwo nọ i wo ekẹ’—ekpako ukoko nọ a ro mu, hayo esẹro, enọ e be rọ unevaze gbe evawere sẹro uthuru na. (Ahwo Ẹfẹsọs 4:8, 11, 12; Iruẹru 20:28; 1 Pita 5:2, 3) Rọ kpahe ai, Aizaya ọ ruẹaro nọ: “Omomọvo ọ vẹ te jọ wọhọ oria nọ u sioma no ofou, oria nọ idhere no ẹkporo, wọhọ oko-ame eva oria oyaya, wọhọ edhedhẹ utho ulogbo nọ u ruru otọ oyaya.”—Aizaya 32:2.

17. (a) Didi obufihọ Jesu ọ jẹ mae gwọlọ nọ ọ rẹ kẹ? (b) Didi ọruẹrẹfihotọ Ọghẹnẹ ọ yaa nọ o re ti ru lọhọ kẹ ahwo riẹ?

¹⁷ Okenọ Jesu ọ jọ otọakpọ, uyoyou ẹruọsa isu egagọ o jariẹ vievie he. Uyerakpọ ahwo na i duobọ tei gaga, ọ tẹ gwọlọ nọ o re fiobọhọ kẹ ai evaọ ẹzi. Jesu ọ re ohrọ rai keme “a rọ oyoya, a tẹ jẹ vaha wọhọ igodẹ nọ i wo othuru hu.” (Matiu 9:36) Ẹvẹ onana o nwane dhesẹ olahiẹ ibuobu te nẹnẹ enọ i bi thihakọ ẹbẹbẹ buobu avọ ohwo ọvo nọ a be ruẹ nya bru hu kẹ obufihọ gbe omosasọ ẹzi! Rekọ ahwo Jihova a wo obufihọ ẹzi, keme ọ yaa nọ: “Mẹ vẹte rehọ ithuru-igodẹ mu kẹ ae nọ e rẹte sẹro rai, a gbẹ te dhẹ ozọ ofa ha, hayo oma o rẹte lọhọ ae he, hayo ọvuọvo o gbeti vrẹ hẹ.”—Jerimaya 23:4.

18. Fikieme ma jẹ nya bru ọkpako nọ ma tẹ gwọlọ obufihọ ẹzi?

¹⁸ Daoma whọ riẹ ekpako ukoko nọ a ro mu na. A wo otoriẹ buobu evaọ efihiruo eriariẹ Ọghẹnẹ, keme a nyate ute nọ e rọ Ebaibol na nọ ọsẹro ọ rẹ nya te. (1 Timoti 3:1-7; Taitọs 1:5-9) Whọ siọ omọvo rai jọ ba ẹnya bru hu whọ tẹ gwọlọ obufihọ ẹzi re who fi uruemu hayo iroro jọ nọ e wọso ẹgwọlọ Ọghẹnẹ kparobọ. Whọ rẹ te ruẹ nọ ekpako na a bi lele ohrẹ Pọl: “Wha ta udu họ enọ udu u re bro awọ, wha fiobọhọ kẹ enọ e ko, wha wo ikiakọ kẹ ahwo kpobi.”—1 Ahwo Tẹsalọnika 2:7, 8; 5:14.

REAWERE UFUOMA KUGBE AHWO JIHOVA

19. Didi eghale Jihova o ku kuọ ahwo nọ e be gwọlọ ufuoma evaọ ukoko riẹ no?

¹⁹ Dede nọ ma be rria udevie uyerakpọ sebaẹgba enẹna, Jihova ọ be k’omai emu, iwu, gbe uwou. Ghele, ma rẹ hẹrẹ eyaa akpọ ọkpokpọ Ọghẹnẹ re ma tẹ te ruẹ irere aparadase iwo. Rekọ ahwo nọ e rọ ukoko Jihova nẹnẹ a be reawere ufuoma aparadase ẹzi. Rọ kpahe ai, Izikiẹl ọ ruẹaro nọ: “A rẹ rria avọ omofọwẹ, ohwo ọvo ọ gbẹ whẹ ozọ họ ae ẹro ho.”—Izikiẹl 34:28; Olezi 4:8.

20. Ẹvẹ Jihova ọ te rọ hwosa kẹ oware nọ ma raha kpobi fiki egagọ riẹ?

²⁰ Ẹvẹ eva e rẹ were omai te inọ Jihova o ru ọruẹrẹfihotọ ẹzi lọhọ ẹkwoma Ẹme gbe ukoko riẹ! Si kẹle ahwo Ọghẹnẹ. Who siuke kpemu fiki ozọ oware nọ egbẹnyusu hayo imoni ra a re ti roro kpahe owhẹ fiki eriariẹ Ọghẹnẹ nọ who bi wo ho. Ejọ e rẹ te dheva fikinọ whọ be nyusu kugbe Isẹri Jihova je bi kpohọ iwuhrẹ evaọ obọ Ọgua Uvie na. Rekọ Ọghẹnẹ ọ rẹ te hwosa k’owhẹ vọvọ rọ kẹ eware nọ whọ raha kpobi fiki egagọ riẹ. (Malakae 3:10) Ofariẹ, Jesu ọ ta nọ: “Uzẹme mẹ ta kẹ owhẹ, ohwo ọvo ọ rọ họ, ọnọ ọ siọ uwou ba, hayo imoni emezae, hayo imoni emetẹ, hayo oni, hayo ọsẹ, hayo emọ, hayo etọ fiki mẹ gbe usiuwoma, rekọ o re wo ekpahọ udhusoi enẹna, iwou, gbe imoni emezae, gbe imoni emetẹ, gbe ini, gbe emọ gbe etọ, gbe ẹlahiẹ; gbe uzuazọ ebẹdẹ bẹdẹ eva akpọ nọ ọ be tha.” (Mak 10:29, 30) Ẹhẹ, oware nọ whọ nya seba kpobi kẹha hayo onọ who re thihakọ riẹ, whọ rẹ sae ruẹ usu evawere gbe ufuoma ẹzi evaọ udevie ahwo Ọghẹnẹ.

DAWO ERIARIẸ RA

Ono họ ‘ọrigbo ẹrọwọ gbe areghẹ na’?

Didi ọruẹrẹfihotọ Jihova o ru no rọ kẹ ẹkuọ ẹzi mai?

Ẹvẹ ahwo nọ e rọ ukoko Ileleikristi na a sai ro fiobọhọ k’omai?

[Uwoho nọ o rrọ ẹwẹ-obe avọ 165]