Uwuhrẹ 6

Eme Họ Uvie Ọghẹnẹ?

Bovẹ Uvie Ọghẹnẹ o rọ? (1)

Ono họ Ovie riẹ? (2)

Kọ amọfa a ti su kugbe Ovie na? Otẹrọ ere, bro ahwo? (3)

Eme u dhesẹ nọ ma be rria evaọ edẹ urere na? (4)

Eme Uvie Ọghẹnẹ o ti ru kẹ ohwo-akpọ evaọ obaro? (5-7)

1. Okenọ ọ jọ otọakpọ, Jesu o wuhrẹ ilele riẹ re a lẹ kẹ Uvie Ọghẹnẹ. Uvie yọ egọmeti nọ ovie o re wuzou riẹ. Uvie Ọghẹnẹ yọ egọmeti obọdẹ. A rehe riẹ mu evaọ ob’odhiwu yọ o ti su otọakpọ ọnana. O ti ru odẹ Ọghẹnẹ họ ọrẹri hayo ru ei fuafo. U ti ru re a ru oreva Ọghẹnẹ evaọ otọakpọ wọhọ epanọ a bi ru ei evaọ ob’odhiwu.—Matiu 6:9, 10.

2. Ọghẹnẹ ọ yeya nọ Jesu ọ te jọ Ovie Uvie Riẹ. (Luk 1:30-33) Okenọ Jesu ọ jọ otọakpọ, o dhesẹ nọ ọ te jọ Osu owowou, okiẹrẹe, gbe ọgbagba. Nọ o zihe kpohọ odhiwu, a rehọ riẹ mu Ovie Uvie Ọghẹnẹ ovavo ho. (Ahwo Hibru 10:12, 13) Evaọ 1914, Jihova ọ tẹ kẹ Jesu udu-esuo nọ Ọ yaa kẹe. Anwọ okioye ze, Jesu o bi ro su evaọ ob’odhiwu wọhọ Ovie nọ Jihova o ro mu.—Daniẹl 7:13, 14.

3. Jihova ọ salọ ezae gbe eyae ẹrọwọ jọ no otọakpọ na ze re a kpohọ odhiwu. A ti lele Jesu su ahwo-akpọ wọhọ ivie, ibroziẹ, gbe izerẹ. (Luk 22:28-30; Eviavia 5:9, 10) Jesu o se ogba-isu enana evaọ Uvie riẹ “uthuru okakao.” A bu te 144,000.—Luk 12:32; Eviavia 14:1-3.

4. Nọ Jesu ọ nwani zihe ruọ Ovie no, o te gbolo Setan gbe ikọ imuomu riẹ no odhiwu jẹ ze otọakpọ. Fikioye eware e jẹ rọ yoyoma gaga evaọ otọakpọ anwọ 1914 ze. (Eviavia 12:9, 12) Emo, ohọo, eyao, evihọ seuziba-ekoko—enana kpobi yọ abọ “oka” nọ u dhesẹ nọ Jesu o bi su gbe inọ eyero ọnana ọ rọ edẹ urere riẹ.—Matiu 24:3, 7, 8, 12; Luk 21:10, 11; 2 Timoti 3:1-5.

5. Kẹle na Jesu o ti broziẹ ahwo, hẹriẹ ae wọhọ epanọ othuru igodẹ ọ rẹ hẹriẹ igodẹ no ewe. “Igodẹ” na họ ahwo nọ a dhesẹ oma rai via no wọhọ enọ e rehọ oma kpotọ kẹ esuo riẹ. A ti wo uzuazọ ebẹdẹ bẹdẹ evaọ otọakpọ. “Ewe” na họ ahwo nọ a siọ Uvie Ọghẹnẹ. (Matiu 25:31-34, 46) Evaọ obaro kẹle na, Jesu ọ te raha ahwo nọ e wọhọ ewe kpobi no. (2 Ahwo Tẹsalonika 1:6-9) Whọ tẹ gwọlọ jọ omọvo “igodẹ” Jesu, whọ rẹ gaviezọ kẹ ovuẹ Uvie na hrọ je ru lele oware nọ who wuhrẹ.—Matiu 24:14.

6. Enẹna a ghale akpọ na kpohọ eko erẹwho buobu no. Ọvuọ egọmeti riẹ a wo. Ẹsibuobu erẹwho enana e rẹ họre ohwohwo. Rekọ Uvie Ọghẹnẹ ọ te rehọ eria ọ egọmeti ohwo-akpọ kpobi. O ti su otọakpọ na kpobi wọhọ egọmeti ọvuọvo. (Daniẹl 2:44) Kẹsena ẹmo, emuemu, gbe ozighi e gbẹ te jọ họ. Ahwo kpobi a vẹ te rria kugbe evaọ udhedhẹ gbe okugbe.—Maeka 4:3, 4.

7. Evaọ oke Isuẹsu Odu Ikpe Jesu, ahwo ẹrọwọ a te rro te ẹgbagba, otọakpọ na kpobi o vẹ te jọ aparadase. Etoke ekuhọ odu ikpe na, yọ Jesu o ru eware kpobi nọ Ọghẹnẹ ọ gwọlọ nọ o ru no. Oke oyena o ve ti zihe Uvie na kẹ Ọsẹ riẹ. (1 Ahwo Kọrint 15:24) Keme jabọ whọ gbẹ vuẹ egbẹnyusu gbe iyoyou ra kpahe oware nọ Uvie Ọghẹnẹ o ti ru hu?

[Picture on page 13]

Evaọ otọ esuo Jesu, omukpahọ hayo omohẹriẹ e gbẹ te jọ họ