Eme Họ Uvie Ọghẹnẹ?

1. Eme họ Uvie Ọghẹnẹ?

Uvie Ọghẹnẹ yọ egọmeti nọ a ro mu evaọ obọ odhiwu. O te rehọ ẹta egọmeti nọ i kiọkọ kpobi, yọ Ọghẹnẹ ọ te rehọ Uvie na ru oreva riẹ gba evaọ obọ odhiwu gbe otọakpọ. Emamọ usi o rrọ inọ Uvie Ọghẹnẹ u ti ru eware nana. Kẹle na, Uvie Ọghẹnẹ o te jọ emamọ egọmeti nọ ohwo-akpọ kpobi ọ gwọlọ. O te lẹliẹ okugbe jọ udevie ahwo kpobi nọ a rrọ otọakpọ na.​—Se Daniẹl 2:44; Matiu 6:9, 10; 24:14.

Uvie kpobi u re wo ovie. Jihova ọ rehọ Ọmọ riẹ Jesu mu re ọ jọ Ovie ọrọ Uvie Ọghẹnẹ.​—Se Eviavia 11:15.

Rri ividio na Eme họ Uvie Ọghẹnẹ?

2. Fikieme Jesu ọ rọ rrọ Ovie nọ o fo?

Ọmọ Ọghẹnẹ yọ Ovie nọ o fo keme ọ rrọ wowou yọ ọ rẹ dadamu oware nọ u kiehọ. (Matiu 11:28-30) U te no ere no, o wo ogaga nọ o re ro fiobọhọ kẹ ahwo keme o ti su no obọ odhiwu ziọ otọakpọ na. Nọ a kpare Jesu no uwhu ze no, o te muvrẹ kpohọ odhiwu, ọ tẹ keria be hẹrẹ evaọ obọze Jihova. (Ahwo Hibru 10:12, 13) Ukuhọ riẹ, Ọghẹnẹ ọ tẹ kẹe ogaga re o muhọ esuo.​—Se Daniẹl 7:13, 14.

3. Amono a ti lele Jesu su?

Utu ahwo jọ nọ a se “ahwo nọ a rrọ erẹri” a ti lele Jesu su evaọ obọ odhiwu. (Daniẹl 7:27) Ahwo ọsosuọ nọ a salọ evaọ ahwo nọ a rrọ erẹri na họ ikọ Jesu nọ i kru ẹrọwọ rai. Rite oke mai na, Jihova ọ gbẹ be salọ ezae gbe eyae nọ i wo ẹrọwọ nọ e te jọ usu erẹri na. A te kpare ahwo nana no uwhu ze evaọ ugboma ẹzi wọhọ epanọ a kpare Jesu.​—Se Jọn 14:1-3; 1 Ahwo Kọrint 15:42-44.

Bro ahwo a bi kpohọ odhiwu? Jesu o se rai “uthuru okakao.” (Luk 12:32) Unu rai kpobi o te jọ idu udhuhrẹ-gbene (144,000). A ti lele Jesu su otọakpọ na.​—Se Eviavia 14:1.

4. Eme ọ via nọ Jesu o muhọ esuo no?

Uvie Ọghẹnẹ u muhọ esuo evaọ ukpe 1914.a Nọ a rehọ Jesu mu ovie no, oware ọsosuọ nọ o ru họ, o le Setan avọ ikọ-imuomu riẹ ziọ otọakpọ. Eva e tẹ dha Setan gaga, o te muọ ebẹbẹ họ ẹwha fihọ akpọ na soso. (Eviavia 12:7-10, 12) Anwọ oke yena ze, ebẹbẹ ohwo-akpọ i bi dhe ebuebu. Ẹmo, ohọo, ẹyao, gbe etọ nọ i bi nuhu yọ abọjọ “oka” nọ u dhesẹ nọ kẹle na, Uvie na u ti mu akpọ na soso họ esuo.​—Se Luk 21:7, 10, 11, 31.

5. Eme Uvie Ọghẹnẹ u bi ru?

Uvie Ọghẹnẹ o be rọ ẹkwoma usi uwoma ota akpọ-soso fiobọhọ kẹ ogbotu ahwo buobu nọ a no erẹwho kpobi ze wo okugbe ọvo. Ima ahwo buobu nọ a wo omaurokpotọ a zihe ruọ ilele Jesu no. Uvie na o te thọ ahwo nana evaọ okenọ o te raha uyero-akpọ omuomu nana. Fikiere ahwo kpobi nọ a gwọlọ wo erere no Uvie Ọghẹnẹ ze a re wuhrẹ epanọ a re ro yoẹme kẹ Jesu.​—Se Eviavia 7:9, 14, 16, 17.

Evaọ etoke ikpe odu ọvo (1,000), Uvie na u ti ru ẹjiroro ọsosuọ nọ Ọghẹnẹ o wo kẹ ahwo-akpọ gba. Akpọ na soso o ti zihe ruọ aparadase. Ukuhọ riẹ, Jesu o ve ti zihe Uvie na kẹ Ọsẹ riẹ. (1 Ahwo Kọrint 15:24-26) Kọ whọ riẹ ohwo jọ nọ whọ gwọlọ vuẹ kpahe Uvie Ọghẹnẹ?​—Se Olezi 37:10, 11, 29.