Uwuhrẹ 11

Erọwọ gbe Iruemu-Ẹwho nọ E rẹ Dha Ọghẹnẹ Eva

Didi eghẹrẹ erọwọ gbe iruemu e rọ thọthọ? (1)

Kọ Ileleikristi a rẹ rọwo inọ Ọghẹnẹ yọ Esanerọvo? (2)

Fikieme Ileleikristi uzẹme a gbe ru ehaa Kresimesi, Isita, hayo edẹ-eyẹ hẹ? (3, 4)

Kọ iwhuowhu na a sae nwa enọ e be rria uzuazọ oma? (5)

Kọ Jesu o whu evaọ uruwhere? (6)

Ẹvẹ u wuzou te re a ru Ọghẹnẹ evawere? (7)

1. Orọnikọ erọwọ gbe iruemu-ẹwho kpobi e rọ thọthọ họ. Rekọ Ọghẹnẹ ọ rẹ jẹ ae rehọ họ otẹrọnọ i no egagọ erue ze hayo nọ i te mukpahe iwuhrẹ Ebaibol.—Matiu 15:6.

2. Esanerọvo: Kọ Jihova yọ Esanerọvo—imasa nọ e rọ Ọghẹnẹ ọvo? Ijo! Jihova, Ọsẹ na, “ọvo họ uvi Ọghẹnẹ.” (Jọn 17:3; Mak 12:29) Jesu yọ Ọmọ ọtuyẹ Riẹ, ọ tẹ jẹ rọ otọ Ọghẹnẹ. (1 Ahwo Kọrint 11:3) Ọsẹ na ọ rro vi Ọmọ na. (Jọn 14:28) Ẹzi ọfuafo na yọ ohwo ho; ogaga iruo Ọghẹnẹ ọ rọ.—Emuhọ 1:2; Iruẹru 2:18.

3. Kresimesi avọ Isita: A yẹ Jesu evaọ December 25 ho. A yẹ riẹ ole October 1, etoke ukpe nọ ithuru-igodẹ a re fi uthuru rai họ otafe evaọ aso. (Luk 2:8-12) Jesu ọ kẹ Ileleikristi ujaje re a ru ẹdẹ-eyẹ riẹ vievie he. Ikpoye, ọ vuẹ ilele riẹ re a koko, hayo kareghẹhọ uwhu riẹ. (Luk 22:19, 20) Kresimesi avọ iruemu riẹ i no egagọ erue ze. Epọvo na orọ kpahe iruemu ehaa Isita, wọhọ ike-ọhọ gbe eruke nọ a re ro ru ehaa na. Ileleikristi ọsosuọ a ru ehaa Kresimesi hayo Isita ha, epọvo na re kugbe Ileleikristi uzẹme inẹnẹ.

4. Edẹ-Eyẹ: Ehaa ẹdẹ-eyẹ ivẹ nọ a t’ẹme te evaọ Ebaibol na họ enọ ahwo nọ a jẹ gọ Jihova ha a ru. (Emuhọ 40:20-22; Mak 6:21, 22, 24-27) Ileleikristi ọsosuọ na a ru ehaa edẹ-eyẹ hẹ. Iruemu ehaa ẹdẹ-eyẹ o ruo i no egagọ erue anwae ze. Ileleikristi uzẹme a re ru ọghọ a vẹ jẹ were eva kugbe oke ọfa evaọ udevie ukpe na.

5. Ozodhẹ Iwhuowhu Na: Enọ i whu no e sai ru oware ovo ho hayo oware ovo o rẹ dae he. Ma sae fiobọhọ kẹ ai hi, yọ a sae nwa omai oma gbe he. (Olezi 146:4; Okokahwohọ 9:5, 10) Ẹwẹ na o re whu; ọ rẹ gbẹ rria nọ ohwo o te whu no ho. (Izikiẹl 18:4) Rekọ ẹsejọ ijẹle imuomu, nọ a re se idhivẹri, a re ru oma rai wọhọ izi ahwo nọ i whu no. Iruemu kpobi nọ i w’obọ kugbe ozodhẹ hayo egagọ iwhuowhu e rọ thọthọ.—Aizaya 8:19.

6. Uruwhere: Jesu o whu fihọ uruwhere he. O whu fihọ ure liọliọ, hayo ure gheghe. Ẹme Grik nọ a fa fihọ “uruwhere” evaọ Ebaibol buobu u dhesẹ ete-ure ọvuọvo. Oka uruwhere na u no egagọ erue anwae ze. Ileleikristi ọsosuọ a rehọ uruwhere na ruiruo hayo gọe he. Fikiere, kọ who roro nọ o sae jọ gbagba re a rehọ uruwhere na ruiruo evaọ egagọ?—Iziewariẹ 7:26; 1 Ahwo Kọrint 10:14.

7. O rẹ sae jọ bẹbẹ re a siobọno erọwọ gbe iruemu enana jọ. Imoni gbe egbẹnyusu ra a sai ru owhẹ re whọ siọ erọwọ ra ba enwene. Rekọ re a ru Ọghẹnẹ evawere u wuzou vi ahwo-akpọ nọ a re ru evawere.—Itẹ 29:25; Matiu 10:36, 37.

[Picture on page 22]

Ọghẹnẹ yọ Esanerọvo ho

[Picture on page 23]

Kresimesi gbe Isita i no egagọ erue anwae ze

[Picture on page 23]

Ẹjiroro ọvo ọ riẹ hẹ nọ ma jẹ gọ iwhuowhu hayo dhozọ rai hi