Uwuhrẹ 14
Epanọ A Ruẹrẹ Iseri Jihova Fihọ
Okevẹ Isẹri Jihova a ro muhọ evaọ oke mai onana? (1)
Ẹvẹ Isẹri Jihova a re ru iwuhrẹ rai? (2)
Ẹvẹ a rẹ sẹro igho raha? (3)
Amono a rẹ k’obaro evaọ ukoko ọvuọvo? (4)
Didi ikokohọ ilogbo a re ru kukpe kukpe? (5)
Didi iruo a re ru evaọ obọ uzou ukoko gbe iwou ogha rai? (6)
1. Isẹri Jihova a muhọ evaọ oke mai onana evaọ etoke ikpe 1870. Evaọ oke ọsosuọ, a se rai Emọ-Iwuhrẹ Ebaibol. Rekọ evaọ 1931 a tẹ riọ odẹ Ikereakere na Isẹri Jihova. (Aizaya 43:10) No emuhọ ọkakao ze ukoko na ọ rro te ima Isẹri no, enọ e be rọ ajọwha ta usiuwoma evaọ ekuotọ nọ i bu vi 230.
2. Ikoko Isẹri Jihova buobu i re wo iwuhrẹ isiasa evaọ ẹkpoka kpobi. Ma zizie owhẹ re who kpohọ ọjọ rai. (Ahwo Hibru 10:24, 25) Ebaibol na họ ehri oware nọ a re wuhrẹ. A rẹ rehọ olẹ rovie je ku iwuhrẹ họ. A rẹ so “ile ẹzi” nọ e rẹ were udu re evaọ iwuhrẹ rai buobu. (Ahwo Ẹfẹsọs 5:18, 19) Ẹnya rai erọ ọvọvẹ, yọ a re mi azọhọ họ.—Matiu 10:8.
3. Ikoko buobu a re ru iwuhrẹ evaọ Ọgwa Uvie. Enana yọ iwou nọ erọ kpatiẹ nọ Isẹri unevaze a bọ. Whọ rẹ ruẹ emema ọvo ho, eka-uruwhere, hayo eware itieye evaọ Ọgwa Uvie na ha. Ekẹ unevaze a rẹ rọ hwosa igho nọ a raha. Rọ kẹ ahwo nọ a gwọlọ ru unevaze, etehe unevaze o riẹe.—2 Ahwo Kọrint 9:7.
4. Evaọ ukoko kpobi, ekpako, hayo esẹro, e riẹe. Ae a rẹ k’obaro evaọ ewuhrẹ ukoko na. (1 Timoti 3:1-7; 5:17) Idibo iruiruo họ ethabọ rai. (1 Timoti 3:8-10, 12, 13) A rẹ kpare ahwo nana kpehru vi enọ ikiọkọ evaọ ukoko na ha. (2 Ahwo Kọrint 1:24) A rẹ kẹ ae edẹ-ova obọdẹ jọ họ. (Matiu 23:8-10) A rẹ g’ẹgọ wo ohẹriẹ no edekọ họ. Yọ a be hwa ae osa kẹ iruo rai gbe he. Ekpako na a rẹ rehọ unevaze sẹro ẹgwọlọ ẹzi ukoko na. A rẹ sae kẹ omosasọ gbe ọbọga evaọ oke uye ebẹbẹ.—Jemis 5:14-16; 1 Pita 5:2, 3.
5. Isẹri Jihova a re ru ikokohọ ilogbo kukpe kukpe. Evaọ oke nana ikoko buobu a re kokohọ rọ kẹ ọruẹrẹfihotọ obọdẹ ọrọ uthubro Ebaibol. Ame-ọhọ ilele ekpokpọ yọ abọ ọruẹrẹfihotọ ekokohọ kpobi.—Matiu 3:13-17; 28:19, 20.
6. Oria uzou ukoko Isẹri Jihova ọ rọ obọ New York. Etẹe Ugboma Esuo na ọ rọ, oviede ekru ekpako nọ i wo eriariẹ nọ e be sẹro ikoko akpọ na soso. Iwou ogha nọ i bu viọ 100 e riẹe nya akpọ na wariẹ re. Evaọ eria enana, ahwo unevaze a re fiobọhọ kporo je vi ebe Ebaibol se ahwo. A rẹ jẹ kẹ ọkpọvio ẹruẹrẹhọ iruo usiuwoma ota na. Keme jabọ whọ gbẹ moma re who weze kpohọ uwou ogha nọ o kẹle owhẹ hẹ?