Ukoko gbe Iruo Akpọ-Soso Rai
IDHERE buobu e riẹ nọ a be rọ kpọ iruo isẹri-ise evaọ ekwotọ nọ i bu vi 230 nọ a be jọ ru iruo na. Ugogo ọkpọvio na o bi no obọ Ugboma Esuo na ze eva oria-uzou rai evaọ akpọ na nọ o rrọ Brooklyn, New York. Ugboma Esuo na u re vi ahwo-ẹro rai kpohọ eria sa-sa akpọ na re a gbẹgwae kugbe enọ e be rẹrote uwou-ogha evaọ eria eyena. Evaọ iwou ogha na, Egbẹgwae Uwou-Ogha e riẹ nọ imasa rite imahrẹ e rẹ jọ re a sẹro iruo na evaọ ekwotọ nọ e rrọ otọ ẹruọsa rai. Iwou egha enana jọ i wo emashini nọ a re ro kporo ebe, emashini na jọ i re kporo ebe vẹrẹ gaga. A rẹ ghale orẹwho hayo oria nọ uwou-ogha ovuovo o be rẹrote fihọ ibrotọ, a vẹ jẹ ghale ibrotọ na fihọ ikogho. Okogho ọvuọvo o wo oware wọhọ ikoko 20. Ọsẹro ubrotọ ọ rẹ nya ikogho nọ e rrọ ubrotọ riẹ wariẹ. Okogho kpobi o re ru ikokohọ ivẹ evaọ ẹgbukpe. Ọsẹro okogho ọ tẹ jẹ riẹ, yọ isiava evaọ ẹgbukpe o re weze kpohọ ikoko nọ e rrọ okogho riẹ, fiobọhọ kẹ Isẹri na kokohọ je ru iruo usiuwoma ota na evaọ ẹkwotọ nọ a ghale kẹ ukoko na.
Ukoko nọ o rrọ ẹwho na avọ Ọgwa Uvie riẹ họ ugogo ehri ewhowho emamọ usi na evaọ ẹwho ra. A ghale oria nọ ukoko kpobi u wo fihọ ite esese. A rẹ ghale enana kẹ Isẹri na, yọ a rẹ daoma weze bru jẹ t’ẹme kẹ ahwo evaọ iwou nọ e rrọ eria nana. Ukoko ovuovo, onọ umutho ahwo jọ hayo nọ ahwo riẹ a re bu te Isẹri 200, u wo ekpako nọ a ro mu re a rẹrote iruẹru sa-sa riẹ. Ohwo kpobi nọ o bi whowho emamọ usi na yọ uvi ohwo evaọ ukoko Isẹri Jihova. Osẹri kpobi, makọ o bi ruiruo evaọ oria nọ u w’uzou rai evaọ akpọ na, evaọ iwou-egha, hayo evaọ ikoko, o re dhomahọ iruo ẹta kẹ amọfa kpahe Uvie Ọghẹnẹ.
Ukuhọ riẹ iyẹrẹ iruo nana i ve kpohọ obọ oria-uzou na, a vẹ rehọ ae ro kere je kporo Yearbook ọrọ ẹgbukpe. Ofariẹ, a re kporo omaa ọ iyẹrẹ-iruo k’ukpe k’ukpe evaọ Uwou-Eroro Na ọrọ January 1. Ebe ivẹ enana e rẹ r’obọ k’otọ niyẹrẹ iruo k’ukpe k’ukpe ọrọ isẹri-ise kẹ Jihova gbe Uvie riẹ na evaọ otọ Kristi Jesu. Evaọ umutho ikpe jọ nọ e vrẹ na, enwenọ Isẹri gbe ahwo isiuru 14,000,000 e be hae ziọ ehaa Ekareghẹhọ uwhu Jesu na k’ukpe k’ukpe. Isẹri Jihova a be raha euwa nọ i bu vi 1,000,000,000 evaọ ẹgbukpe ro whowho emamọ usi na yọ ahwo ọkpokpọ nọ a be họ-ame i bu vi 300,000. Ebe nọ a bi fihọ ada i bu te ima egba buobu.